Sanggatos na Ribo!

Iyan an bilang nin mga pag-adal sa Biblia na gusto niatong maheling na ireport sa Pilipinas para sa bulan nin Agosto 1998. Posible daw na maabot niato iyan? Iyo! Kan Pebrero asin Abril, 1994 nagreport kita nin labing 100,000 pag-adal. Kan panahon na idto, labi sana sa 118,000 na parahayag an nasa langtad. Ngonyan igwa kita nin labing 126,000 na parahayag, pero an satong mga pag-adal sa Biblia sagkod sa ngonyan na taon nin paglilingkod may promedyo sanang 78,807. Totoo na an dakol sa satong dating mga inaadalan bautisado na ngonyan asin kun siring dai na puedeng ibilang, alagad linalaoman na padagos na makapopoon nin bagong mga pag-adal tanganing masalidahan an mga ini. Taano ta dai determinadong maghingoa na makapoon nin bagong pag-adal sa Biblia ngonyan na bulan na puedeng ireport sa Agosto? Probaran na gamiton sa enot na pagsongko an simpleng suhestion sa pagpoon nin pag-adal sa brosyur na Kahagadan na yaon sa parapo 5 kan artikulong nasa pahina 8 kaining An Satong Ministeryo sa Kahadean. Kun an gabos na labing 16,000 na regular payunir saka an mga parahayag sa kongregasyon determinadong makapaghihingoa na makapoon nin bagong pag-adal na irereport sa Agosto, bakong depisil na maabot an satong pasohan na 100,000 pag-adal. Kanigoan kadakulang kurahaw iyan nin pag-omaw ki Jehova!​—Sal. 47:1.