Maaabot daw Niato an Satong Pasohan Ngonyan na Bulan?
1 Kan Pebrero asin Abril, 1994, an sangang opisina sa Pilipinas nagreport nin labing 100,000 na pag-adal sa Biblia. Sa An Satong Ministeryo sa Kahadean na Hulyo 1998, irinekomendar na gibohon tang pasohan niato ngonyan na Agosto na maabot giraray an bilang na ini. Ano an magigibo niato bilang indibiduwal tangani na maabot an pasohan na ini?
2 Akoon an Angat: Sa dakol na kongregasyon, labing kabanga kan mga parahayag an dai nagkokondukta nin regular na pag-adal sa Biblia. Kun kamo saro sa mga ini, ineenkaminar niamo kamo na gibohon na espesyal na pasohan ngonyan na bulan na makapoon nin pag-adal sa Biblia. Kun makapoon kamo nin pag-adal sa enot na semana kaining Agosto, dangan kun iyan magpadagos nin duwa pang beses pakatapos kaiyan, iyan puedeng ireport sa katapusan kaining Agosto bilang bagong pag-adal sa Biblia.—Helingon an “Hapot” sa pahina 7.
3 Kun kamo nakikikabtang sa ministeryo, baga man sa paghuhulit sa tinampo, impormal na pagpapatotoo, o regular na paghuhulit sa harong-harong, mag-alok nin pag-adal sa Biblia sa harong. Puede nindong gibohon ini sa mismong introduksion nindo. Makatatabang man ini sa mga tawo na marealisar na kita bakong “mga paratinda kan tataramon nin Dios,” o interesado sana sa pagpasakamot nin mga magasin, kundi kita naghahanap kan mga andam na makanood dapit sa mga kahagadan nin Dios. (2 Cor. 2:17) An brosyur na Kahagadan sarong ekselenteng paagi na ialok an 16 na semanang kurso sa Biblia.—Helingon an An Satong Ministeryo sa Kahadean, Hulyo 1998, pahina 8.
4 Sa parate puedeng maponan an mga pag-adal sa mga kamidbid nindo, siring baga kan mga miembro nin pamilya, paryente, katrabaho, kaeskuela, mga nasa tindahan o saod na regular nindong nakakaolay. Taano ta dai gumibo nin listahan nin mga may posibilidad dangan helingon kun an saro kaini maako nin pag-adal sa Biblia?
5 Mga Pampamilyang Pag-adal sa Biblia: Ibinareta kaidto pa na dakol na payo nin pamilya an dai nagkokondukta nin regular na pampamilyang pag-adal, o, kun may kinokonduktahan sinda, sa parate nalilingawan nindang ireport iyan dawa ngani tibaad may dai pa bautisadong miembro kan pamilya na presente. Kun kamo sarong payo nin pamilya na napabayaan an aspektong ini kan pag-adal sa Biblia, marahay na panahon ini na itanos an bagay na iyan paagi sa pagpoon asin pagreport kan saindong pampamilyang pag-adal.
6 Dugang pa, ineenkaminar niato an mga nagkokondukta na nin mga pag-adal, siring baga kan mga payunir, na pagmaigotan na makapoon nin bagong pag-adal ngonyan na Agosto. Kun gigibohon ini kan lambang payunir, pasil sana niatong maaabot an labing 100,000 na pag-adal ngonyan na bulan. Kaya magmaigot kita gabos na maabot an satong pasohan ngonyan na bulan dangan padagos na tabangan an mga inaadalan niato na umoswag pasiring sa pagdusay.