Agosto—Magigin Makasaysayan sa Gibuhon na Pagpapatotoo!

1. Mantang harani na an ika-100 na anibersaryo kan Kahadian, anong espesyal na kampanya an gigibuhon sa bilog na kinaban?

¹ Mantang harani na an ika-100 na anibersaryo kan pagkaestablisar kan Kahadian nin Diyos, angay nanggad na tawan ta nin onra si Jehova paagi sa espesyal na kampanya nin pagpapatotoo! Sa Agosto, ididistribwir ta sa bilog na kinaban an bagong tract na Sain Ta Makukua an Simbag sa Importanteng mga Hapot sa Buhay? Dinadagka kaiyan an mga parabasa na hilingon sa Bibliya an mga simbag asin ipinapaliwanag kun paano sinda matatabangan kan jw.org.

2. Paano kita makakakontribwir sa makusog na ‘kurahaw nin pag-umaw ki Jehova’ na urog pang mákusog sa Agosto?

² Kurahaw nin Pag-umaw: Para tabangan an mga parahayag na mapahiwas an saindang ministeryo, sarong espesyal na probisyon an ginibo para sa mga gustong mag-auxiliary payunir sa Agosto. Sa bulan na iyan, puwedeng mag-auxiliary payunir na inaabot an kahagadan na 30 oras. Huling igwa iyan nin limang Biyernes, Sabado, asin Domingo, dakul na parahayag na nagtatrabaho o nag-eeskuwela an makakapag-auxiliary payunir. Kun an saindong aki o tinutukduan sa Bibliya kuwalipikado na asin gusto nang magin parahayag, makipag-ulay tulos sa parakoordinar kan grupo nin kamagurangan. Kun makaibahan ta sinda sa mahalagang bulan na ini, makakapakusog nanggad iyan sa sainda! Dawa ngani dakul na regular payunir an nagbabakasyon pag Agosto pakatapos na maabot an kahagadan na oras sa sarong taon, tibaad puwede nindang liwaton an saindang iskedyul tanganing lubos na makikabtang sa espesyal na kampanyang ini. Ngunyan na an panahon para pag-ulayan kan pamilya kun paano sinda makakakontribwir sa makusog na ‘kurahaw nin pag-umaw ki Jehova’ na urog pang mákusog sa bulan nin Agosto.​—Esd. 3:11; Tal. 15:22.

3. Ano an linalauman mapadapit sa espesyal na kampanyang ini?

³ Dawa ngani nakikabtang na kita kaidto sa arog kaining kampanya nin pagdistribwir, linalauman ta na magigin makasaysayan ini. Puwede daw niyatong hinguwahon na magkaigwa nin bagong peak sa bilang nin parahayag, auxiliary payunir, asin oras sa Agosto? Sa pagtatapos kan 2014 na taon nin paglilingkod, lugod na bendisyunan ni Jehova an mga lingkod niya sa bilog na kinaban sa paghihinguwang gibuhon na pinakasibot na bulan sa pagpapatotoo an Agosto!​—Mat. 24:14.