Dugang Pang mga Oportunidad Para Umawon si Jehova
1. Anong bagong areglo an makakatabang sa sato na ‘umawon si Jehova nin labi-labi’?
1 Kaining nakaaging Marso, sarong bagong areglo an ginibo na nagtatao nin oportunidad sa mga parahayag na mag-auxiliary payunir sa kahagadan na 30 oras kada Marso asin Abril saka sa bulan kan regular na pagdalaw kan paraataman nin sirkito. Kun duwang bulan an makokobrehan kan dalaw, an mga parahayag na nag-aplay para sa kahagadan na 30 oras makakapili sa arin man sa duwang bulan para mag-auxiliary payunir. An gabos na auxiliary payunir makakaatender sa bilog na pakikipagmiting kan paraataman nin sirkito sa mga regular asin espesyal payunir. Nangangahulugan ini na kun dai niyato kayang abuton an kahagadan na 50 oras, puwede ta pa man giraray ‘umawon nin labi-labi si Jehova’ bilang mga auxiliary payunir sagkod sa apat na beses kada taon sa kahagadan na 30 oras!—Sal. 109:30; 119:171.
2. Sa ano makikinabang an mga auxiliary payunir durante kan dalaw kan paraataman nin sirkito?
2 Durante kan Dalaw kan Paraataman nin Sirkito: Mas dakul na ngunyan an makakapag-auxiliary payunir durante kan dalaw kan paraataman nin sirkito asin makikinabang sa pagparinigunan nin buot huli sa pag-iba sa saiya sa ministeryo. (Roma 1:11, 12) Posibleng dakul na auxiliary payunir an mabakasyon sa trabaho durante kan semanang iyan tanganing makapaglingkod na kaibanan an paraataman nin sirkito. An mga nagtatrabaho sa ordinaryong mga aldaw puwedeng maghapot sa saiya kun makakaibanan ninda siya sa paglilingkod pag Sabado o Domingo. Dugang pa, makakapakusog nanggad sa mga auxiliary payunir an pag-atender sa miting kaiba kan mga regular asin espesyal payunir!
3. Taano ta marahayon na panahon an Memoryal para mag-auxiliary payunir?
3 Durante nin Marso Asin Abril: An mga nag-aprobetsar kan dating areglo, na mag-auxiliary payunir na may kahagadan na 30 oras sa sarong bulan sa panahon nin Memoryal, puwede nang dugangan pa an saindang ‘atang nin pag-umaw’! (Heb. 13:15) An Marso asin Abril marahayon na bulan tanganing pahiwason an satong ministeryo bilang auxiliary payunir. Sa mga bulan na iyan kada taon, nakikikabtang kita sa nakakaugmang kampanya nin pag-imbitar sa iba na mag-atender sa Memoryal. Saro pa, huling pinapahiwas nin dakul an saindang ministeryo sa panahon nin Memoryal, iba-ibang parahayag an makakaibanan ta. Pagkatapos kan Memoryal, pinapatalubo ta an interes kan mga nag-atender asin pinapakusog an entusiyasmo ninda para sa espesyal na pampublikong pahayag. Minomotibar ka daw kan saimong puso na aprobetsaran an dugang pang mga oportunidad na ini na mag-auxiliary payunir?—Luc. 6:45.