Kamo daw Regular na Parabalangibog kan Kahadean?

¹ Naggayagaya kita gabos kan taposon kan sangang opisina sa Pilipinas an nakaaging taon nin paglilingkod na may pinakahalangkaw na kabilangan na 132,496 na parahayag kan Agosto 1999. Alagad ta an promedyong kabilangan kan mga parahayag durante kan taon na iyan 128,106. Minalataw na an nagkapira sa mga parahayag niato nagkaigwa nin kadepisilan sa pagigin regular na mga parabalangibog kan Kahadean. Sa katunayan, ipinaririsa kan mga report nin pag-analisar hale sa mga kongregasyon na an labing 19,000 kan aktibong mga parahayag dai nagreport nin pakikikabtang sa ministeryo kada bulan. Naniniwala kami na an minasunod na pagparigon sa boot makatatabang na maremedyohan an situwasyon na iyan.

² Pahalagahan an Pribilehio: Maninigong hararom an satong pagpahalaga sa satong pribilehio na ihiras sa iba an maogmang bareta kan Kahadean. An aktibidad na ini pinagagayagaya an puso ni Jehova asin tinatabangan an mga sadiosan an puso na maaraman an dalan pasiring sa buhay. (Tal. 27:11; 1 Tim. 4:​16) An regular na paghuhulit dinudugangan an satong kabatidan sa ministeryo asin nagreresulta sa pakamate nin kagayagayahan patin pagigin may nahaman.

³ Ireport an Aktibidad: An nagkapira na nakikikabtang sa paglilingkod sa langtad napababayaan na ireport sa tamang panahon an saindang aktibidad. Nungka niatong honaon na an satong paghihingoa bakong angay na ireport. (Ikomparar an Marcos 12:​41-​44.) Tunay nanggad, maninigo niatong ireport an nagibo niato! An pagkaigwa nin sarong sistema sa harong, arog baga kan paggamit nin kalendaryo, para sa pagrekord kan oras na ginamit sa ministeryo magseserbing dayaday na pagirumdom na gumibo nin tamang report tolos-tolos sa katapusan kan kada bulan.

⁴ Itao an Tabang na Kaipuhan: Tibaad kaipuhan na pakarhayon an lokal na mga areglo sa pagtabang sa mga nangangaipo nin tabang na magkaigwa nin dayaday na pakikikabtang sa ministeryo. Maninigong iareglo kan sekretaryo kan kongregasyon asin mga namamayo sa pag-adal sa libro na magkaigwa nin eksperyensiadong mga parahayag na matabang. Kun kamo may mga aki o iba pang inaadalan sa Biblia na dai pa bautisadong parahayag, sanayon sinda na ireport an saindang aktibidad kada bulan.

⁵ Girumdoma an estorya nin buhay na “Nagpapasalamat sa Halawig na Buhay sa Paglilingkod ki Jehova,” sa Torrengbantayan na Oktubre 1, 1997. Si Tugang na Ottilie Mydland na taga Norway nagin regular na parahayag kan maogmang bareta bago pa sia bautismohan kan 1921. Pakalihis nin 76 na taon, sa edad na 99, sia nagsabi: “Naoogma ako na sagkod ngonyan puede pa akong magin regular na parahayag.” Kanigoan karahay na aktitud na dapat arogon kan gabos na lingkod ni Jehova!