Mga Paraataman na Nangengenot—An Sekretaryo
1 An sekretaryo kan kongregasyon igwa nin mahalagang marhay na kabtang sa pagsegurado na ‘an gabos na bagay ginigibo sa disente asin aregladong paagi.’ (1 Cor. 14:40) Bilang miembro kan Komite sa Paglilingkod kan Kongregasyon, sia an nag-aasikaso kan mga pakikikomunikar asin importanteng rekord kan kongregasyon. Minsan ngani tibaad dai naheheling kan gabos an saiyang mga obligasyon arog kan sa ibang kamagurangan, kaipuhan asin inaapresyar na marhay an saiyang mga paglilingkod.
2 Kun nakareresibi nin mga surat hale sa Sosyedad o sa iba, inaasikaso iyan kan sekretaryo asin sinisierto nia na iyan nasisimbag kun kaipuhan. Sinisierto nia na an mga surat na nareresibi ikalibot sa kamagurangan dangan isinasaray iyan bilang reperensia. Sia an nagsisiyasat kan mga porma sa pagpedido nin mga magasin asin literatura patin nagpapadara kaiyan sa Sosyedad. Sia an direktang nangangataman sa mga nag-aasikaso kan kuenta asin mga suskripsion siring man kan gabos na bagay na konektado sa kombension.
3 Mantang dapat na ipadara kan sekretaryo an bulanan na report nin paglilingkod sa langtad kan kongregasyon sa Sosyedad sa ikaanom na aldaw kan bulan, kaipuhan na kita gabos magreport tolos-tolos kan satong paglilingkod sa langtad sa katapusan kan bulan. Dangan itinatala nia an mga report nin paglilingkod sa Congregation’s Publisher Record cards. An siisay man na parahayag puedeng helingon an saiyang personal na rekord nin aktibidad.
4 Kun may parahayag na magbalyo o maghale sa kongregasyon, an sekretaryo an naghahagad o nagpapadara sa kamagurangan sa ibong na kongregasyon nin surat na nagpapamidbid sa parahayag kaiba an Congregation’s Publisher Record card nia.—Our Ministry, p. 104-5.
5 An sekretaryo an nagrerepaso kan aktibidad kan mga payunir, na ipinapaaram sa kamagurangan, asin nangorogna sa paraataman sa paglilingkod, an ano man na mga problema na tibaad naeeksperyensiahan kan mga payunir. Inaabisohan nia an mga konduktor sa Pag-adal sa Libro kan Kongregasyon dapit sa mga parahayag na iregular sa paglilingkod sa langtad. Kapwa an sekretaryo asin paraataman sa paglilingkod an nangengenot sa pagkoordinar kan mga paghihingoa na asikasohon an mga inaktibo.—An Satong Ministeryo sa Kahadean, Disyembre 1987, p. 1.
6 Paagi sa pagkaigwa nin orog na pakasabot manongod sa mga obligasyon kan sekretaryo, gibohon logod niato an satong makakaya na tabangan siang magin mas pasil na otobon an saiyang pagkapinaniniwalaan.—1 Cor. 4:2.