Pakanompong nin Kagayagayahan sa Saindong Sagradong Paglilingkod
1 Sinda nagbuelta “na may kagayagayahan.” Ipinahahayag kan pagkasaysay sa Biblia kun ano an namatean kan 70 disipulo kan sinda magreport giraray ki Jesus, pakatapos nin halawig na paghuhulit. Naeksperyensiahan ninda an panlaog na dakulang kaogmahan sa paggibo kan kabotan nin Dios. (Luc. 10:17) Ano an makatatabang sa saindo na makanompong nin kaagid na kagayagayahan sa sagradong paglilingkod?
2 Sarong Positibong Aktitud: Igwa kamo kan tao nin Dios na pribilehio na tokdoan an mga tawo manongod sa marahayon na katuyohan ni Jehova. Paagi sa saindong paghuhulit, puede nindong matabangan an saro na makatalingkas sa nakararaot na mga gibo kan kinaban na ini asin sa mga gapos nin falsong relihion. Puede nindong alokan an mga tawo kan paglaom na buhay sa sarong kinaban na mayo kan dai pagkaoroyon na nakapalibot sa sato ngonyan. Isip-isipa an kagayagayahan ni Jehova kun mapanggana nindong itinatanom an mga banhi nin katotoohan sa sarong naghihimateng puso. Magin positibo sa pamimibi na logod paluwason sa saindo kan espiritu nin Dios an bunga nin kagayagayahan mantang pinagmamaigotan nindong magibo an ministeryo sa bilog nindong puso.
3 Praktikal na Pagsasanay: An pagtotokdo na pinamayohan ni Jesus sa 70 disipulo iinagid sa sarong Pagtiripon sa Paglilingkod sa presenteng aldaw. Nagtao sia nin pagsasanay tanganing epektibo nindang magibo an saindang ministeryo. (Luc. 10:1-16) Ngonyan sinasanay kamo kan Pagtiripon sa Paglilingkod sa mga paagi nin pagdolok sa mga tawo, kun paano makapopoon nin mga pakikipag-olay, asin kun paano makapopoon asin makapamamayo nin mga pag-adal sa Biblia. Paagi sa pagmamaigot nindo asin pagpaoswag kan saindong mga abilidad sa paghuhulit, madidiskobre nindo na an ano man na tibaad pakamate nindo nin dai pagkapamugtak o kakulangan maiinaan asin malalabihan nin kompiansa patin kagayagayahan.
4 Magtorohok sa Ngapit: Nakanompong si Jesus nin kagayagayahan sa saiyang sagradong paglilingkod sa ibong kan mga pagdusa na tinagalan nia. Taano? Huli ta pinapagdanay nia an saiyang mga mata na malinaw na nakatorohok sa mga bendisyon asin pribilehio na nasa enotan nia. (Heb. 12:2) Magigibo man nindo iyan paagi sa pagpapadanay sa saindong isip asin puso na nakatorohok sa ngaran ni Jehova asin sa mga bendisyon na maabot sa bagong kinaban nin Dios. Magtatao ini nin kagayagayahan asin kahulogan sa saindong ministeryo.
5 An pagtao nin sagradong paglilingkod ki Jehova iyo an pinakadakulang pribilehio na puedeng mapasaindo ngonyan. Kun siring, logod sabihon nindo: “An paggibo kan boot mo, O Dios ko, iyo an naoogmahan ko.”—Sal. 40:8.