Hapot
◼ Paano matatabangan kan mga attendant an mga magurang sa pagtabang sa saindang mga aki na mapagdanay an marahay na ugale sa mga pagtiripon?
An mga aki naturalmenteng mahiro, bakong tuod na tumukaw sa laog nin halawig na mga oras. Pakatapos nin sarong pagtiripon, an mga aki igwa nin nakatagong bagsik na tibaad magtulod sa sainda na magdalagan asin lapagon an ibang aki sa Kingdom Hall o sa iba pang mga lugar na pinagtitiriponan, sa paradahan, o sa dalan-dalan. Minsan siring, totoo an talinhaga: ‘An aki na pinababayaan sana magdadara nin kasopganan sa saiyang magurang.’—Tal. 29:15.
Makamomondo na an nagkapira sa satong may edad nang mga tugang na lalaki asin babae nakolgan nin grabe huli ta nabangga sinda nin mga aki asin natumba. Ini nagin dahelan nin dai maninigong kapurisawan siring man nin dai kinakaipuhan na gastos para sa mga magurang asin sa kongregasyon. Para sa sainda mismong seguridad asin pagigin ligtas sa peligro nin iba, an mga aki dai maninigong pagtogotan na magdalagan asin magkawat sa laog o luwas kan Kingdom Hall.
An mga magurang igwa nin paninimbagan sono sa Kasuratan na sanayon an saindang mga aki na trataron na may tamang paggalang an satong mga lugar nin pagsamba. (Ecl. 5:1a) Sa satong Kristianong mga pagtiripon, asamblea, asin kombension, iinaasignar an mga attendant tangani na siertohon na ‘ginigibo an gabos na bagay sa disenteng paagi’ asin na igwa nin “kahusayan.” (1 Cor. 14:40; Col. 2:5) Sinda dapat na magdanay na listo bago, durante, asin pakatapos kan programa, sa laog sagkod luwas. Kun an sarong aki nagdadarodalagan o nagigin pasaway, puedeng maboot na paontokon kan attendant an aki, asin puede niang ipaliwanag sa aki kun taano an siring na gawe-gawe ta dai puede. An mga magurang man kan aki maninigo na maboot na sabihan manongod sa problema asin sa pangangaipo na bantayan an aki. Maninigo na maghimate an magurang.
Masasabotan na kun beses an mga omboy asin saradit na aki puedeng maghibi o magin maribok durante kan mga pagtiripon. An mga attendant, na minaabot nin kisuerra 20 minutos bago pumoon an programa, puedeng ireserba an huring duwang raya sa auditoryum para sa mga magurang na gustong tumukaw dian kataed kan saindang sadit na mga aki. An iba sa sato maninigong makikooperar paagi sa pagtao kan mga tukawan na iyan sa sainda.
Kun nakariribok an sarong aki, maninigong humiro an magurang. Kun dai humiro an magurang asin nakadidisturbo na an ribok, maninigong maboot na kaolayon kan attendant an magurang kun gusto niang iluwas an aki sa auditoryum. Kun iniimbitaran niato sa mga pagtiripon an mga bagohan na may saradit na aki, maninigo kitang tumukaw kataed ninda asin tabangan sinda sa mga aki kun an mga ini naghihibi o nakariribok sa ibang paagi.
Nagtatao sa sato nin kagayagayahan na maheling an mga aki na laen-laen an edad na nasa Kingdom Hall asin mamasdan an saindang marahay na gawe-gawe sa laog kan pamilya nin Dios. (1 Tim. 3:15) Paagi sa paggalang ninda sa areglo ni Jehova para sa pagsamba, sinda nagtatao nin onra sa saiya asin sinda pinahahalagahan kan gabos sa kongregasyon.