Hapot
◼ Ano an puedeng gibohon nin gabos tanganing mapagdanay na nakakatabang sa pakanood an kamugtakan sa mga pagtiripon kan kongregasyon?—Deut. 31:12.
Huli sa hararom na paggalang ki Jehova asin sa saiyang probisyon na mga pagtiripon kan kongregasyon, dinadagka an gabos na umabot nin amay asin magin andam na matokdoan nia. Nakakatabang na magtukaw sa may enotan kan hall, na itinatagama an mga tukawan sa may likodan para sa mga may saradit na aki asin nahuhuring umabot kun minsan. Bago magpoon an pagtiripon, maninigong i-adjust an setting kan elektronikong mga kasangkapan tanganing dai makadisturbo sa mga nagdadangog. An mga disturbo magigin kadikit asin bakong grabe kun papagdadanayon kan gabos na presente an hararom na paggalang durante kan bilog na pagtiripon.—Ecl. 5:1; Fil. 2:4.
Kun an mga bagohan magpoon nang umatender sa mga pagtiripon, puedeng mag-alok na tumukaw sa kataed ninda an saro sa kongregasyon na nakakamidbid sa sainda. Nangorognang nakakatabang ini kun igwa sinda nin saradit na aki na dapat sanayon. An pag-atender sa mga pagtiripon tibaad bagong eksperyensia para sa saindang pamilya. Kun siring, posibleng marhay na aapresyaron nindang makatukaw sa may likodan na dian daing gayo sinda makakadisturbo sa iba kun kaipuhanon kan mga magurang na lumuwas nguna sa main hall tanganing asikasohon an mga pangangaipo kan mga aki. (Tal. 22:6, 15) An mga pamilya na may saradit na aki dai maninigong tumukaw sa suway na kuarto na dian makakabuelong magribok an mga aki. Sa pangkagabsan, pinakamarahay na sa luwas kan main hall disiplinahon kan mga magurang an mga aki o asikasohon an iba pa nindang personal na mga pangangaipo dangan bumalik sa main hall kaiba an mga aki.
An mga attendant naglilingkod tanganing mapagdanay an kamugtakan na angay para sa harong nin pagsamba. Tinatabangan ninda an mga pamilya asin an mga nahuhuri kun minsan na makakua nin angay na tukawan. An mga attendant mataktika asin mapagmansay sa pagtabang sa iba na makatukaw nin komportable na mayo nin dai kinakaipuhan na disturbo. Naggagamit sinda nin marahay na paghusgar kun inaasikaso an ano man na dai linalaoman na mga disturbo. Kun an ginigibo nin aki nakakadisturbo na sa iba, an mga attendant puedeng maboot na mag-alok nin tabang.
An gabos na presente sa mga pagtiripon para sa pagsamba puedeng makakontribwir sa kamugtakan na nakakatabang sa pakanood manongod ki Jehova asin sa saiyang katuyohan para sa matoninong asin matanos na bagong kinaban.—Heb. 10:24, 25.