Nagtatagal daw Kamo?
1 “Dai na ako nin orog pa kadakulang dahelan sa pagpasalamat kisa mga bagay na ini, . . . na an sakong mga aki padagos na naglalakaw sa katotoohan.” (3 Juan 4) An pakatagal kan espirituwal na mga aki ni Juan nagtao sa saiya nin dakulang kagayagayahan. Siertong ikinaoogmang marhay kan satong langitnon na Ama na maheling an minilyon kan saiyang magigin mga aki na “padagos na naglalakaw sa katotoohan”!—Tal. 23:15, 16; 27:11.
2 Mantang an banwaan nin Dios sa kabilogan nagpoprosegir sa maigot na Kristianong aktibidad, may nagkapira na luway-luway na nagluya. Dawa ngani an mga ini posibleng nagin mabagsik kan enot nindang manodan an katotoohan, sa pag-agi nin mga taon, pamugtak na sinda na magkaigwa na sana nin dikit o paminsanminsan na pakikikabtang sa paggibo nin mga disipulo.
3 Siempre, tibaad may mga nagluya huli sa pisikal na mga limitasyon asin epekto nin naglalangkaw na edad. Minsan siring, sinda dapat na komendaran huli sa saindang pakatagal. Ginigibo ninda an bilog nindang makakaya. Alagad an balang saro na nagdusay kan saiyang buhay sa Dios maninigong hapoton an sadiri: ‘Tinogotan ko daw an sakong sadiri na magkonsentrar na gayo sa personal na mga pinag-aaabot kaya sadit na sana an kabtang kan intereses kan Kahadean sa sakong buhay? Ako daw nagin medyo “gabinhod,” o ako daw “maigot” pa man giraray na naghihingoa?’ (Kap. 3:15, 16; Luc. 13:24) Kita logod gabos mapagngayongayong horophoropon an satong ginigibo asin gumibo nin pag-oswag kun kinakaipuhan, na ginigirumdom na si Jehova nanunuga na matao nin “kamurawayan asin onra patin katoninongan para sa gabos na naggigibo nin marahay.”—Roma 2:10.
4 Kun Paano Makakatagal: Ano an nakatabang ki Jesus na makatagal? Ipinaliwanag ni Pablo: “Huli kan kagayagayahan na ibinugtak sa atubangan nia tinios nia an hariging pasakitan, hinamak an kasopganan, asin nagtukaw sa too kan trono nin Dios.” (Heb. 12:1-3) An kagayagayahan na ibinugtak sa atubangan ni Jesus mas mahalaga nanggad kisa temporaryong mga pagbalo na kinaipuhan niang atubangon. An paggirumdom kan kagayagayahan na ibinubugtak sa atubangan niato makatatabang sa sato na magtagal man. (Kap. 21:4, 7; 22:12) Kun kita maasa ki Jehova na tawan kita nin kosog paagi sa personal na pag-adal, regular na pag-atender sa mga pagtiripon, asin daing ontok na pamimibi, mahihimo niatong magprosegir sa gibohon na itinao nia sa sato.
5 Si Jehova naggagayagaya sa pakatagal kan mga maimbod sa saiya. Kaya dugangan niato an saiyang kagayagayahan paagi sa padagos na ‘paglakaw sa katotoohan.’