Pagplano nin Patienot—Para sa Ano?
1 Kita gabos nag-iisip kan satong mga plano para sa ngapit. An mga may daganon na paglaom nag-aantisipar na mabuhay sagkod lamang sa matanos na bagong kinaban nin Dios. Alagad may mga impluwensia na puedeng umagaw kan paglaom na iyan sa puso nin saro. Kaipuhan an odok na paghihingoa tanganing danay na ikasentro an satong buhay sa intereses kan Kahadean asin dai malingling kan nakatetentar na mga mawot kan laman.—1 Juan 2:15-17.
2 Dai talaga nasasabotan kan kinaban an mga pasohan nin espirituwal na mga tawo. (1 Cor. 2:14) Mantang an iba sa katawohan naglalapigot na makamtan an kabantogan, kapangyarihan, o kayamanan, kita nagmamaigot para sa espirituwal na mga kayamanan. (Mat. 6:19-21) Kun pinagmaigotan niatong liwaton an satong kaisipan na ikomporme sa punto de vista kan kinaban manongod sa ngapit, maaabot pa daw niato an satong espirituwal na mga pasohan? Sa dai mahahaloy mababangkag an satong puso sa kinabanon na mga bagay. Paano daw niato malilikayan ini?
3 “Isolog an Kagurangnan na si Jesu-Cristo”: An sarong paagi na madedeterminaran kun baga isinesentro niato an satong ngapit sa intereses kan Kahadean iyo na siyasaton an satong pakikipag-olay. Kita daw pirepirme na sanang nagtataram manongod sa materyal na mga bagay asin kinabanon na intereses? Kun iyo, dapat na isip-isipon niato kun baga an satong puso nawawaran kan pokus kaiyan sa espirituwal na mga prinsipyo sa buhay. Tibaad kaipuhan niatong tawan nin orog na importansia an ‘pagsolog kan Kagurangnan na si Jesu-Cristo imbes na magparaplano nin patienot para sa mga mawot kan laman.’—Roma 13:14.
4 An mga hoben puedeng ‘isolog si Cristo’ paagi sa pagplano nin patienot para sa aldaw na sinda lumaog sa bilog na panahon na ministeryo. An sarong hoben na boot magregular payunir pinadakula sa sarong kultura kun saen an komun na kostumbre iyo na an hoben na mga lalaki magkaigwa nin kasegurohan sa pinansial. Huli kaini, sia nabangkag na gayo sa negosyo sagkod sa punto na sia garo mayo na sa boot na nag-aatender sa mga pagtiripon asin nakikikabtang sa ministeryo. Kan ponan nia na magtiwala sa mga tataramon ni Jesus na yaon sa Mateo 6:33 asin maghale sa saiyang mayong katuyohan na rutina, sia naglaog sa karera nin bilog na panahon na paglilingkod. Ngonyan, na may marahay na konsensia, sia naglilingkod na ki Jehova, na siring kan sabi nia, ‘sa saiyang bilog na potensial.’
5 An Biblia nagsasabi na madonong an pagplano para sa ngapit. (Tal. 21:5) Logod na kita gabos gibohon man iyan na an kabotan nin Dios an pangenot na nasa isip.—Efe. 5:15-17.