Magplano nin Patienot!
1 An organisasyon ni Jehova nagtatao nin regular na programa nin teokratikong mga aktibidad na dinisenyo tangani na panigoan an satong espirituwal na mga pangangaipo. An pag-apresyar nagpapahiro sa sato na lubos na aprobetsaran an gabos na bagay na iinareglo, siring baga kan mga pagdalaw kan nagbibiaheng paraataman, mga asamblea asin kombension, asin iba pang espesyal na mga aktibidad na plinano sa lokal. (Mat. 5:3) Minsan siring, an nagkapira dai nakikinabang kan dakol sa espirituwal na mga probisyon na ini huli sa ibang mga plinano na ninda. Ano an magigibo tangani na malikayan ini? Paano niato masesegurado na an bakong teokratikong mga aktibidad dai makatahob “sa orog na mahalagang mga bagay”?—Fil. 1:10.
2 Kaipuhan an Madonong na Pagplano: An Talinhaga 21:5 nagsasadol: “An mga plano kan mahigos seguradong nagbubunga nin bentaha, tara an gabos na naghuhumari seguradong mapasiring sa pagkatikapo.” Tangani na makua an espirituwal na “bentaha,” kaipuhan kitang mahigos na magplano nin patienot, na isinasaisip an teokratikong mga aktibidad na nakaareglo na. Maninigo niatong iiskedyul an satong personal na mga aktibidad sa panahon na dai iyan makaoolang sa satong pagigin yaon tangani na mag-ako nin espirituwal na mga bendisyon. Kun naghihidali kita sa pagplano na gibohon an mga bagay na personalmenteng boot niatong gibohon, na dai iniisip an maabot na teokratikong mga aktibidad, posibleng umagi kita nin espirituwal na “pagkatikapo.”
3 Dai Mawaran kan Oportunidad! Kita gabos nagpaplano para sa ngapit, kabale an para sa mga bakasyon, biahe para sa negosyo, pagpasyar sa mga paryente, asin iba pa. Bago kamo manuga o kompletohon an saindong mga plano, helingon an iskedyul nin maabot na espirituwal na mga aktibidad. Kun maaraman nindo na maabot an paraataman sa sirkito o na may asambleang nakaiskedyul kadungan kan panahon na tibaad mayo kamo, gumibo nin maigot na paghihingoa na iareglo liwat an saindong mga aktibidad tangani na kamo makapakikabtang. Kita pinaiisi nin patienot na marhay manongod sa dakulang mga aktibidad na nakaiskedyul sa ngapit. An kamagurangan sa saindong kongregasyon an makapagsasabi sa saindo kun ano an plinano na sa lokal.
4 Paagi sa pag-isip para sa ngapit asin pagplano nin patienot para sa orog na mahalagang mga bagay, kita ‘mapapano nin matanos na bunga, para sa kamurawayan asin kaomawan nin Dios.’—Fil. 1:11.