An Pinakamaogmang mga Tawo sa Daga
1 “Maogma an banwaan na an Dios iyo si Jehova!” (Sal. 144:15) An mga tataramon na iyan ilinaladawan an Mga Saksi ni Jehova bilang an pinakamaogmang mga tawo sa daga. Mayo nang kagayagayahan na maorog pa sa minagikan sa paglilingkod sa solamenteng tunay asin buhay na Dios, si Jehova. Huling sia an “maogmang Dios,” an mga nagsasamba sa saiya nagpapabanaag kan saiyang dakulang kaogmahan. (1 Tim. 1:11) Ano an nagkapirang aspekto kan satong pagsamba na nakakokontribwir sa satong pagigin maogmang marhay?
2 Mga Dahelan sa Pagigin Maogma: Sineseguro sa sato ni Jesus na an kaogmahan minagikan sa pagigin “nakamamate kan [satong] espirituwal na pangangaipo.” (Mat. 5:3) An pangangaipong iyan napaninigoan kan padagos na pag-adal sa Biblia asin pag-atender sa gabos niatong Kristianong pagtiripon. An pakanood kan katotoohan sa Tataramon nin Dios pinatalingkas kita sa relihiosong kaputikan asin sala. (Juan 8:32) Itinokdo man sa sato kan Kasuratan an pinakamarahay na pamumuhay. (Isa. 48:17) Huli kaiyan, kita nagkakamit nin nakapakokosog na Kristianong pakikiiba sa laog kan satong maogmang kasararoan nin magturugang.—1 Tes. 2:19, 20; 1 Ped. 2:17.
3 Nakakukua kita nin dakulang pagkakontento sa pagkuyog sa halangkaw na mga pamantayan nin Dios sa moral, huli ta aram niato na pinoprotehiran kita kaini asin pinaoogma si Jehova. (Tal. 27:11) An sarong reporter sa peryodiko nagkomento: “Sa ibong kan gabos na estriktong pamantayan ninda, an Mga Saksi ni Jehova bakong mamondo. Al kontraryo. An mga hoben saka an mas may edad na [sa tahaw ninda] maheheling na pambihira an kagayagayahan asin timbang na marhay.” Paano niato matatabangan an iba na maeksperyensiahan man an satong maogmang buhay?
4 Tabangan an Iba na Makanompong nin Kaogmahan: An kinaban pano nin kamondoan, asin an mga tawo sa pankagabsan may madiklom na paglaom sa ngapit. Minsan siring, igwa kita nin maliwanag na paglaom, na nakaaaram na maabot an aldaw na an gabos na kamondoan magigin bagay na nakalihis na. (Kap. 21:3, 4) Kun siring, maigot kitang nakikikabtang sa ministeryo, na hinahanap an mga sadiosan an puso na hihirasan kan satong paglaom asin kan satong mga pagtubod manongod ki Jehova.—Ezeq. 9:4.
5 An sarong payunir na tugang na babae nagsabi: “Mayo na nin orog na nakakokontento kisa sa pagtabang sa mga tawo na mamidbid si Jehova asin maaraman an saiyang katotoohan.” Gibohon niato an bilog niatong makakaya na enkaminaron an dakol pa na umako nin mga pag-adal sa Biblia. An paglilingkod ki Jehova asin pagtao niato nin panahon asin kosog sa pagtabang sa iba na maglingkod sa saiya an nagtatao kan pinakadakulang kaogmahan.—Gibo 20:35.