Hapot

◼ Noarin angay na mag-organisar nin sarong grupo na iba an lenguahe?

Kun an teritoryo nin sarong kongregasyon igwa nin darudakulang populasyon na nagtataram nin ibang lenguahe, maninigong pagmaigotan kan kamagurangan na mag-organisar nin paghuhulit tangani na matabangan an mga tawo na naggagamit kan lenguaheng iyan. (km-BI 7/02 p. 1) Tibaad an komunidad na naggagamit nin ibang lenguahe suruwaysuway na marhay sa bilog na teritoryo nin duwa o labi pang magkataed na kongregasyon. Sa siring na kamugtakan, an (mga) paraataman sa sirkito matao nin kaipuhan na instruksion, na sa siring tinatabangan an kalabot na mga kongregasyon na makikooperar sa paghuhulit. Sa panapanahon, puedeng mag-areglo nin pampublikong pahayag o Pag-adal sa Torrengbantayan tangani na madeterminaran kun gurano kadakol an masuportar sa mga pagtiripon na iba an lenguahe.

Puedeng mag-organisar nin sarong grupo na iba an lenguahe kun naaabot an minasunod na mga kahagadan: (1) Igwa nin mga parahayag o interesado na nakakasabot na marhay kan maogmang bareta sa ibang lenguahe na iyan. (2) Igwa nin sarong kualipikadong magurang sa kongregasyon o ministeryal na lingkod na makapangengenot asin makapamamayo nin kisuerra sarong semanal na pagtiripon. (3) An grupo nin kamagurangan andam na suportaran an grupo. Kun naabot an mga kahagadan na ini, maninigong paisihon kan kamagurangan an sangang opisina tangani na pormal na marekonoser an grupo asin makapagtao nin dugang pang mga instruksion.

An kadaklan na mga grupo nagpopoon paagi sa pagkaigwa nin Pag-adal sa Libro kan Kongregasyon nin semanal. Sa huri, puedeng aprobaran kan kamagurangan an pagdagdag nin iba pang mga pagtiripon, arog kan Pampublikong Pagtiripon asin Pag-adal sa Torrengbantayan. An Asignasyon Num. 2, 3, asin 4 sa Teokratikong Paadalan sa Pagmiministro puedeng iatubang sa suplementaryong klase kun igwa nin sarong kualipikadong magurang sa kongregasyon o ministeryal na lingkod na nakapagtataram kan lenguaheng iyan na puedeng maglingkod bilang parakonseho. Minsan siring, an grupo maiba sa kongregasyon para sa pahayag na nagtotokdo, tampok na mga kabtang kan Biblia, asin Pagtiripon sa Paglilingkod. Puede man na mag-areglo para sa grupo nin mga pagtiripon bago lumuwas sa paglilingkod sa langtad.

An gabos na nasa grupo naglilingkod sa irarom mismo kan pangangataman kan grupo nin kamagurangan. Maninigo na an kamagurangan magtao nin timbang na instruksion asin magpaheling nin inisyatiba sa pag-asikaso sa mga pangangaipo kan grupo. Pagdalaw kan paraataman sa sirkito sa nagsusuportar na kongregasyon, iaareglo man nia na maghulit kaiba kan grupo tangani na maparigon iyan sa espirituwal. Paagi sa bendisyon ni Jehova, an grupo na iba an lenguahe tibaad pag-abot nin panahon magin sarong kongregasyon.