Mga Suhestion sa Pag-atubang kan An Dios daw Talagang May Pagmakolog sa Sato?

Pagkatapos sambiton an sarong bareta nin trahedya, puede nindong sabihon:

“Napag-isip-isip na daw nindo kun taano ta tinotogotan nin Dios na magdusa an mga tawo kun talagang may pagmakolog sia sa sato? [Pasimbagon.] An brosyur na ini nagtatao nin nakakakontentong simbag sa hapot na iyan asin ipinapaheling kaini kun ano an gigibohon nin Dios sa harani nang ngapit. [Ipaheling an mga ilustrasyon sa pahina 27, asin basahon an Salmo 145:16 nin direkta sa parapo 22.] Paano daw hahaleon nin Dios an gabos na pagdusa na naeeksperyensiahan nin katawohan? Gusto kong ipaliwanag an hapot na iyan sa sunod kong pagdalaw.” Ialok an brosyur, asin iareglo na bumalik.

Pagdalaw nindo liwat, puede nindong sabihon:

“Kan nakaaging pagdigdi ko, binasa ta an tekstong ini. [Basahon o kotaron an Salmo 145:16.] Dangan ibinangon ko an hapot na: Paano daw hahaleon nin Dios an gabos na pagdusa na naeeksperyensiahan nin katawohan?” Ipakua sa saiya an brosyur nia. Dangan buksan sa pahina 27-8, asin pag-olayan an parapo 23-5. Alokon nin pag-adal sa Biblia, o iareglo na pag-olayan an parapo 26-7 sa sunod na pagdalaw.

An sarong tinedyer na parahayag puedeng magsabi:

“Dakol na kagubay ko an nahahadit kun ano an magigin kamugtakan kan kinaban pag-abot nin 10 o 15 taon. Ano daw sa paghona mo an magigin kamugtakan nin buhay sa panahon na iyan? [Pasimbagon.] An mga problemang naheheling niato ngonyan nagpaparisa na kita nabubuhay na sa huring mga aldaw. [Basahon an 2 Timoteo 3:1-3.] An brosyur na ini nagtatao nin simbag sa minasunod na mga hapot. [Basahon an mga hapot na yaon sa tutob, asin ialok an brosyur.] Pagbalik ko, kun igwa ka nin pirang minuto, gusto kong ipakipag-olay an sarong nakakaparigon sa boot na sinasabi dapit sa katapusan nin helang asin paggurang.” Iareglo na bumalik.

Pagbalik nindo, puede nindong sabihon:

“Kan nakaaging mag-olay kita, nasambitan ko na gusto kong ipakipag-olay an manongod sa katapusan nin helang asin paggurang. Yaon iyan digdi.” Ipakua sa saiya an brosyur nia. Dangan basahon saka ipaliwanag an parapo 6-7 sa pahina 23-4. Iareglo na pag-olayan an parapo 8-9 sa sunod na pagdalaw.

Kun may kapartner na aki, an adulto an puedeng magpamidbid sa saindang duwa asin magsabi:

“Kun puede, gusto ni ________ na basahon sa saindo an sarong teksto. [Babasahon kan aki an Salmo 37:29 asin matao nin halipot na komento.] Ipinapaliwanag kan brosyur na ini kun paano ootobon nin Dios an saiyang katuyohan para sa katawohan asin sa daga. [Ipaheling an mga retrato sa pahina 24-7.] Pagbalik mi, gusto kong ipaheling sa saindo an makangangalas na panuga kan Biblia dapit sa pagkabuhay liwat.” Ialok an brosyur, asin iareglo na bumalik.

Pagdalaw nindo liwat, an adulto puedeng magsabi:

“Kan nakaaging pagdalaw ko, binasa mi an Salmo 37:29 asin sinabi ko na gusto kong ipaheling sa saindo an sinasabi kan Biblia manongod sa pagkabuhay liwat. Mangnoha nindo an sinasabi digdi.” Ipakua sa saiya an brosyur nia. Dangan pag-olayan an parapo 12-14 sa pahina 24-5. Alokon nin pag-adal sa Biblia, o iareglo na pag-olayan an parapo 15-16 sa sunod na pagdalaw.