Nag-aandam daw an Saindong Pamilya Para sa Kaligtasan?
1 An naotob nang hula sa Biblia nagtatao nin nakakakombensir na ebidensia kan marikas nang nagdadangadang na katapusan kan maraot na kinaban na ini. Nabubuhay na kita ngonyan sa delikadong mga panahon na kaagid na marhay kaidtong bago kan Baha. (Mat. 24:37-39) Nakaligtas si Noe sa pagkalaglag kan suanoy na kinaban na iyan huling sia “naglakaw na kaibanan kan tunay na Dios.” (Gen. 6:9) Seguradong itinokdo ni Noe sa saiyang pamilya an mga kahagadan ni Jehova huli ta sinda nakaligtas man. Sa anong paagi puede niatong arogon si Noe asin mag-andam bilang pamilya tanganing makaligtas sa katapusan kan presenteng maraot na sistemang ini nin mga bagay?
2 Parahulit nin Katanosan: Nagmaigot si Noe sa laog nin mga 40 sagkod 50 taon bilang “sarong parahulit nin katanosan.” (2 Ped. 2:5) An saiyang kataraed, baga man nasa impluwensia nin rebeldeng nagmateryalisar na mga anghel o bako, seguradong tinuya sia sa saiyang paghuhulit. Sa parate, an satong ministeryo dai iniintindi asin inoolog-olog, na nagpapatunay na an sistemang ini nin mga bagay madali nang matapos. (2 Ped. 3:3, 4) Minsan siring, bakong arog kan mga tawo kan panahon ni Noe, dakol an naghihimate sa satong mga paghihingoa asin ‘nagbuburunyog’ sa pagsamba ki Jehova. (Isa. 2:2) Ikakaligtas sana niato an ‘satong sadiri sagkod idtong mga naghihinanyog sa sato’ kun magmamaigot kita. (1 Tim. 4:16) Mahalagang marhay nanggad para sa mga magurang na tokdoan an saindang mga aki manongod sa pagkaapurado kan paghuhulit paagi sa tataramon sagkod halimbawa!—2 Tim. 4:2.
3 “Siring Nanggad” an Ginibo Nia: An pagkaligtas ni Noe asin kan saiyang pamilya nagdepende sa saindang maingat na pagsunod sa mga instruksion ni Jehova. (Gen. 6:22) Mahalaga man na kita ngonyan magin “andam na magkuyog” sa paggiya gikan sa Biblia asin sa maimbod na oripon. (Sant. 3:17) Nagigirumdoman kan nasa edad nang mga aki sa sarong pamilya kun paano inaplikar kan saindang ama an mga suhestion na inako hale sa organisasyon ni Jehova. Halimbawa, nagkondukta sia nin pampamilyang pag-adal kada semana asin iiniba an pamilya sa ministeryo kada katapusan nin semana siring sa irinerekomendar. Hiningoa nia na saro sa saiyang mga aki an makaiba nia sa ministeryo kada semana. An karigonan nia na “siring nanggad” an gibohon nagkaigwa nin hararom na epekto sa saiyang mga aki, asin sinda gabos na anom nagdakula na maimbod na mga lingkod ni Jehova.
4 An katapusan kan sistemang ini madatong nin bigla. (Luc. 12:40) Paagi sa pag-arog ki Noe asin pagtubod para sa kaligtasan, kita asin an satong pamilya siertong magigin andam!—Heb. 11:7.