Ano an Nanonodan nin Iba sa Pagmasid Ninda sa Saindo?
1. Ano an nanodan kan mga disipulo ni Jesus sa pagmasid ninda sa saiya?
1 Si Jesus nagsabi: “Pasana nindo an sakong sakal asin makanood kamo sa sako.” (Mat. 11:29) Malinaw nanggad, nagtokdo sia sa iba paagi sa pagpaheling nin marahay na halimbawa, bako sanang paagi sa saiyang mga tataramon. Isip-isipa kun ano an nanodan kan mga disipulo sa pagmasid ninda ki Jesus. Sia mahoyo, maboot, asin mamomoton. (Mat. 8:1-3; Mar. 6:30-34) Sia totoong mapakumbaba. (Juan 13:2-5) Mantang iniibanan ninda si Jesus sa ministeryo, naheling kan mga disipulo na sia mayong kapagalan asin epektibo sa pagtokdo kan katotoohan sa iba. (Luc. 8:1; 21:37, 38) Ano an epekto sa iba kun nagmamasid sinda sa sato sa ministeryo?
2. Paanong an satong marahay na itsura asin paggawe sa ministeryo nagwawalat nin marahay na impresyon sa mga kagharong?
2 Mga Kagharong: An satong mabining gubing, marahay na paggawe, asin sinserong personal na interes sa mga tawo puedeng magkaigwa nin mapuersang epekto sa mga kagharong. (2 Cor. 6:3; Fil. 1:27) Naririsa ninda na parate niatong ginagamit an Biblia. An iba naghahanga na magalang kitang naghihinanyog kun nagtataram sinda. Tandaan nanggad na an pagpaheling nin marahay na halimbawa sa mga bagay na ini puedeng makaakit sa mga tawo sa mensahe kan Kahadean.
3. Puede kitang magkaigwa nin anong positibong epekto sa satong mga tugang?
3 An Satong mga Tugang: Isip-isipa man an magigin positibong epekto niato sa satong mga tugang. Nakakaolakit an kaigotan niato sa ministeryo. Kun paanong an batbat minapatarom sa batbat, an satong iinandam na marhay na presentasyon nagpapahiro sa iba na pakarhayon an saindang abilidad sa pag-eebanghelyo. (Tal. 27:17) An satong mahigos na paggibo nin tamang rekord kan mga nagpapaheling nin interes dangan tolos-tolos na pagbalik nakakamotibar sa iba na gibohon man iyan. Makakatao kita nin marahay na impluwensia sa satong mga tugang paagi sa lubos na pag-otob kan satong ministeryo.—2 Tim. 4:5.
4. Taano ta maninigo niatong analisaron sa panapanahon an satong halimbawa?
4 Taano ta dai nindo analisaron sa panapanahon kun ano an ginigibo asin sinasabi nindo saka kun ano an epekto nindo sa iba paagi sa saindong halimbawa? Paagi sa satong marahay na halimbawa, mapapaogma niato si Jehova asin mamamatean man niato an saboot ni apostol Pablo kan sia magsabi: “Magin kamong mga paraarog sa sako, siring na ako paraarog ki Cristo.”—1 Cor. 11:1.