Sarong Nakakagayagayang Marhay na Gibohon
1. Anong gibohon na espirituwal na pagpaomay an nangyayari sa satong panahon?
1 Napano nin dakulang kagayagayahan an mga nakaheling nin pisikal na pagpaomay kan enot na siglo. (Luc. 5:24-26) Sa satong panahon, naggagayagaya kita sa gibohon na espirituwal na pagpaomay. (Kap. 22:1, 2, 17) Kanigoan kaogmang basahon an mga eksperyensia nin mga indibiduwal na nababago an buhay huli kan Tataramon ni Jehova asin kan banal na espiritu! Minsan siring, mas nakakakontento an pakikikabtang sa gibohon na ini paagi sa pagkondukta nin progresibong pag-adal sa Biblia.
2. Anong kagayagayahan an maeeksperyensiahan niato mantang an saro tinotokdoan niato kan katotoohan?
2 Ano an ngaran nin Dios? Taano ta tinotogotan nia an pagsakit? Ano an gigibohon kan Kahadean nin Dios para sa katawohan? Naoogma kita bako sana sa pagsimbag sa siring na mga hapot kundi sa pakaheling man sa kagayagayahan kan tinotokdoan sa Biblia kun nanonodan nia an katotoohan. (Tal. 15:23; Luc. 24:32) Mantang nag-ooswag an sarong tinotokdoan sa Biblia, tibaad ponan nia nang gamiton an ngaran ni Jehova, liwaton an saiyang pagbado asin pagpakarhay sa sadiri, pondohon an nakakadanyar na mga gibo, asin magpatotoo sa iba. Kun sia mag-oswag sagkod sa pagdusay asin pagpabautismo, sia magigin tugang asin kapwa trabahador niato. An kada saro sa positibong mga lakdang na ini dahelan na maggayagaya.—1 Tes. 2:19, 20.
3. Anong praktikal na mga lakdang an magigibo niato tanganing makapoon nin pag-adal sa Biblia?
3 Puede daw Kamong Makikabtang? Kun gusto nindong makikabtang sa nakakagayagayang marhay na gibohon na ini, makiolay ki Jehova para sa pribilehiong makapagkondukta nin pag-adal sa Biblia, dangan humiro kaoyon kan saindong mga pamibi. (1 Juan 5:14) Maghulit sa lugar asin oras na manonompongan an mga tawo. Mag-alok nin pag-adal sa Biblia sa lambang angay na okasyon. (Ecl. 11:6) Kun kamo nakanompong nin interesado asin nakatanom nin banhi nin katotoohan, bumalik tanganing baribion iyan.—1 Cor. 3:6-9.
4. Taano ta maninigo na may pagkaapurado kitang mag-alok nin pag-adal sa Biblia?
4 Kadakol pang tawo an nagugutom asin napapaha sa katanosan. Siisay an matabang sa sainda na mapanigoan an saindang espirituwal na pangangaipo paagi sa pagkondukta nin pag-adal sa Biblia sa sainda? (Mat. 5:3, 6) Gikan sa boot niatong ipresentar an satong sadiri tanganing tumabang na matapos an paghuhulit asin paggibo nin mga disipulo bago matapos an pag-ani.—Isa. 6:8.