‘Pakangbanalon Logod an Ngaran nin Dios’
1. Ano an tema para sa 2012 na programa kan pansirkitong asamblea, asin ano an basehan kaiyan?
1 Pribilehio nanggad niato na magdara kan ngaran kan Unibersal na Soberano na si Jehova! An Dios mismo an nagtao sa sato kan ngaran nia, asin nangorogna poon kan 1931, bilang Mga Saksi ni Jehova, midbid kita na nagdadara kan daing kaagid na ngaran ni Jehova. (Isa. 43:10) Lubos na pinahalagahan kan bugtong na Aki nin Dios na si Jesus an ngaran kan saiyang Ama paagi sa pag-enot nia kaiyan sa modelong pamibi. (Mat. 6:9) An mga tataramon ni Jesus sa pamibing iyan an pinagbasehan kan tema para sa 2012 na programa kan satong pansirkitong asamblea na ‘Pakangbanalon Logod an Ngaran nin Dios.’
2. Anong impormasyon an inaantisipar niato?
2 Kun Ano an Madadangog Niato: Sa Sabado, totokaron sa pahayag na “Ipamidbid an Ngaran nin Dios Bilang Bilog na Panahon na mga Lingkod” kun taano an bilog na panahon na paglilingkod ta nakakakontentong paagi nin pamumuhay. Madadangog man niato an simposium na “Mag-ingat sa mga Bagay na Nagtatao nin Katuyawan sa Ngaran ni Jehova,” na makakatabang sa sato na makalikay sa apat na bagay na puedeng makasiod sa sato. Sa pahayag na “Kun Taano ta Dapat Pakangbanalon an Ngaran nin Dios” sisimbagon an mga hapot na, Ano an makakatabang sa sato na maghulit na may kaigotan kun an mga tawo daing gayo nagpapaheling nin interes? asin, Ano an makakatabang sa sato na magin mabunga sa ministeryo? Sa Domingo, magugustohan niato an may apat na kabtang na simposium dapit sa kun paano niato papakangbanalon an ngaran nin Dios paagi sa satong kaisipan, pagtaram, mga desisyon, asin paggawe. Nangorognang aapresyaron kan mga bagohan an pampublikong pahayag na “Papakangbanalon ni Jehova an Saiyang Dakulang Ngaran sa Armagedon.”
3. Ano an pribilehio niato, asin paano kita matatabangan kan programa?
3 Dai na nanggad mahahaloy, mahiro na si Jehova tanganing pakangbanalon an ngaran nia. (Ezeq. 36:23) Mientras tanto, may pambihira kitang pribilehio na suportaran an gabos na irinerepresentar kan banal na ngaran ni Jehova. May kompiansa kita na an programa kan pansirkitong asambleang ini makakatabang sa lambang saro sa sato na otobon an seryosong paninimbagan niato bilang paradara kan ngaran nin Dios.