Maghulit na May Kompiansa sa Komersial na Teritoryo
1. Taano ta dai kita dapat madesesperar kun iniisip niato na nakakanerbios an paghulit sa lugar nin negosyo?
1 Nakakanerbios daw para saimo an paghulit sa mga lugar nin negosyo? Kun iyo, dai madesesperar, huling dawa si Pablo, na pusoan asin daing takot na ministro, kinaipuhan na ‘magin maisog,’ o magpakapusoan, tanganing makapaghulit. (1 Tes. 2:2) Pag-olayan niato an nagkapirang bagay na parateng ikinakahadit kun naghuhulit sa komersial na teritoryo asin an praktikal na mga suhestion tanganing mapangganahan iyan.
2. Taano ta dai kita dapat mahadit na tibaad mauyam an mga tawohan?
2 Mauuyam daw an mga Tawohan Kun Maabala Sinda? Sa dakol na lugar nin komersio, yaon an mga tawohan tanganing magserbi sa publiko, kaya inaasahan nindang may maabala sa sainda. Sinda parateng magalang huli ta puedeng ibilang ka ninda na potensial na kostumer. Paagi sa pagbado nin may dignidad, pagigin maogma asin makikatood, maeenkaminar mo sinda na trataron ka nin may paggalang.
3. Ano an puede tang gibohon tanganing dai mairitar an mga kostumer?
3 Dapat Daw na Sabihon Ko an Sakong Presentasyon sa Atubangan nin Dakol na Kostumer? Kun posible, pumili nin oras na an mga tindahan bako gayong matawo, arog baga kun minabukas pa sana sinda. Maghalat sagkod na mayo nang kostumer an manedyer o an kahera bago sia dolokon. Gibohon na halipot sana an presentasyon mo.
4. Ano an puede tang sabihon kun naghuhulit sa lugar nin komersio?
4 Ano an Sasabihon Ko? Kun may nagkapirang tawohan, makipag-olay sa namamahala. Puede mong sabihon: “Depisil manompongan sa harong an mga nagtatrabaho, kaya binisita mi kamo digdi. Aram kong may trabaho kamo kaya madali sana ako.” Tanganing dai isipon na nagpapabakal kita, sa parate pinakamarahay na dai pagsambiton an areglo sa donasyon apuera sana kun hapoton kita kun paano sinusuportaran an satong gibohon. Depende sa klase kan negosyo, puede kang humagad nin permiso sa manedyer na togotan kang makipag-olay nin halipot sana sa mga tawohan. Otrohon sa sainda an presentasyon mo. Kun an sarong tawohan garo baga sibot, pahalipoton an presentasyon asin walatan sia nin tract. Kun bakong posible na makipag-olay sa mga tawohan, tibaad puede kang togotan na magwalat nin literatura sa pahingaloan ninda o sa ibang komun na lugar.
5. Taano ta makakapaghulit kitang may kompiansa sa lugar nin negosyo?
5 May kompiansang naghulit si Jesus asin si Pablo sa mga tawo na yaon sa lugar kan saindang negosyo, asin iyan maggigibo mo man. (Mat. 4:18-21; 9:9; Gui. 17:17) Hagadon ki Jehova na tabangan kang magin kalmado asin pusoan. (Gui. 4:29) Parateng may makakaolay sa komersial na teritoryo, kaya taano ta dai probaran an mabungang paaging ini nin paghuhulit?