An Video na The Wonders of Creation Reveal God’s Glory
Dakol an naoogma sa pagmamasid sa mga linalang. Alagad pira sana an biyong nakakaaram na sa paggibo kaiyan, may dikit sindang naheheling dapit sa kaisipan asin saboot kan satong Dakulang Kaglalang. (Roma 1:20) Haloy na panahon na an nakaagi, nakanood si David dapit ki Jehova paagi sa Saiyang ipinasabong na Tataramon. Pero “naheling” man ni David si Jehova asin nagin harani sa Saiya paagi sa mga linalang. (Sal. 8:3, 4) An video na The Wonders of Creation Reveal God’s Glory matabang sa sato, sa satong mga aki, asin sa satong mga tinotokdoan sa Biblia na mapagmasdan nin maingat an nagkapira sa mga linalang ni Jehova, maaraman an mga kualidad saka personalidad kan satong Dakulang Kaglalang, asin bilang resulta, magin mas harani sa saiya. Pakatapos na madalan o maheling an video, helingon kun masisimbag nindo an minasunod na mga hapot.
(1) Paanong an kadakulaan asin pagkaareglo kan pisikal na uniberso nagpapararom kan satong apresasyon ki Jehova? (Isa. 40:26) (2) Kun pagmamasdan niato nin maingat an tubig, ano an satong manonodan sa Saro na nagdisenyo kaiyan? (Kap. 14:7) (3) Paanong an kadakulaan kan daga asin an distansia kaiyan sa saldang nagpapaheling kan kadonongan ni Jehova? (4) Ano an papel kan bulan? (Sal. 89:37) (5) Paano dinisenyo ni Jehova an mga tawo tanganing ikaogma an buhay? (6) Ano an DNA? (Sal. 139:16) (7) Paano napapalaen an mga tawo sa gabos na linalang ni Jehova digdi sa daga? (Gen. 1:26) (8) Ano an saindong inaantisipar sa bagong kinaban?
Ekstrang Kabtang: (9) Paano nagkakaigwa nin mga kolor? (10) Paano nakokontra kan tubig an grabidad tangani na makasakat ini sagkod sa mga poro nin kahoy? (11) Ano an papel kan tubig sa laog kan satong hawak? (12) Magtao nin halimbawa kan pagkaoroyon sa pag-oltanan kan mga bagay na may buhay. (13) Taano ta aram kan mga linalang na makipagtabangan sa iba pang linalang? (14) Ano an “golden angle,” asin paano iyan maheheling sa mga linalang?
“Masdan Nindo” nin Maingat an mga Linalang ni Jehova: Inenkaminar kita ni Jesus na maingat na ‘masdan an mga gamgam sa langit’ asin makanood nin leksion ‘sa mga lirio sa oma.’ (Mat. 6:26, 28) An paggibo kaiyan puedeng magpararom kan satong pagtubod, magtao sa sato nin kompiansa sa Kaglalang, asin magpatalubo kan satong apresasyon sa kadonongan, kapangyarihan na magligtas, asin pagkamoot ni Jehova. Imbes na madisturbo nin labi-labi sa mga gibo kan kinaban na ini, magtao nin panahon asin maghingoa na obserbaran an ngangalasan kan mga linalang ni Jehova, saka horophoropon kun ano an itinotokdo kaiyan sa sato dapit sa satong Dios.—Sal. 19:1.