Gumamit nin Pamamaagi na Epektibo
1. Ano an manonodan niato sa laen-laen na pamamaaging ginamit kan enot na mga Kristiano?
1 An enot na mga Kristiano naghulit kan maogmang bareta sa mga tawong laen-laen an kultura asin relihion. (Col. 1:23) Minsan ngani saro sana an mensahe—an Kahadean nin Dios—laen-laen an pamamaagi depende sa mga kaolay. Halimbawa, pinonan ni Pedro an pakikipag-olay sa mga Judio, na may hararom na paggalang sa Kasuratan, paagi sa pagkotar ki propeta Joel. (Gui. 2:14-17) Sa ibong na lado, mangnoha kun paano si Pablo nakipagrasonan sa mga Griego siring kan nakasurat sa Guibo 17:22-31. Ngonyan, may mga tawo sa nagkapirang teritoryo na iginagalang an Kasuratan, asin lubos niatong nagagamit an Biblia sa satong pagharongharong. Pero, tibaad kaipuhan niatong magin mas mapagmansay kun nakikipag-olay sa mga bakong interesado sa Biblia o relihion, o sa mga bakong Kristiano an relihion.
2. Paano niato magagamit an alok tanganing tabangan an mga nagpapahalaga sa Biblia siring man an mga dai?
2 Gamiton nin Epektibo an Alok: An alok para sa taon na ini nin paglilingkod mabago kada duwang bulan asin itatampok an mga magasin, tract, asin brosyur. Dawa kun sa pangkagabsan bakong interesado sa Biblia an mga tawo sa satong teritoryo, makakapag-alok pa man giraray kita sa sainda nin mga artikulo na makakapukaw nin interes. Tibaad dai kita makabasa nin teksto o dai niato direktang masambitan an Biblia sa enot na pagdalaw, pero kun magpahiling nin interes an kagharong, puede kitang bumalik sa katuyohan na tabangan siang pakusogon an pagtubod sa Kaglalang asin sa Saiyang ipinasabong na Tataramon. Sa ibong na lado, kun kita naghuhulit sa mga tawong nagpapahalaga sa Biblia, puede kitang gumamit nin literatura asin pamamaagi na angay sa sainda. An totoo, ano man an itinatampok na alok para sa bulan, puede niatong ialok ano man na oras an librong Itinotokdo kan Biblia o an mga brosyur na Listen to God o Magdangog sa Dios Asin Mabuhay nin Daing Katapusan. An mahalaga iyo na gumamit nin pamamaagi na epektibo.
3. Taano ta arog sa daga an puso nin mga tawo sa satong teritoryo?
3 Andamon an Daga: An puso nin tawo arog nanggad sa daga. (Luc. 8:15) An ibang daga kaipuhan nin dakol na preparasyon bago makagamot asin magtalubo an banhi kan katotoohan. An mga paraebanghelyo kan enot na siglo mapangganang nagtanom sa gabos na klase nin daga, asin nagtao ini sa sainda nin satispaksion saka kagayagayahan. (Gui. 13:48, 52) Magigin mapanggana man kita paagi sa pagtaong atension sa satong pamamaagi.