‘Lubos na Magpatotoo’
1. Anong marahay na halimbawa sa ministeryo an itinao ni apostol Pablo?
1 ‘Utubon mo an bilog mong katungdan.’ (2 Tim. 4:5, An Marahay na Bareta Biblia) Tunay nanggad na may katalingkasan sa pagtaram si apostol Pablo na itao an konsehong ini ki Timoteo. Sa katunayan, sa pag-ultanan kan 47 asin 56 C.E., nakatulong biyahe si Pablo sa pagmisyonero. Pauruutrong nasambitan sa libro nin Guibo an ‘lubos na pagpatotoo’ ni Pablo. (Gui. 23:11; 28:23, NW) Paano niyato iyan magigibo ngunyan?
2. Paano kita lubos na makakapagpatotoo kun naghaharong-harong?
2 Sa Harong-Harong: Sa paghihinguwang makaulay an mga kagharong na dai pa nuarin man nakadangog kan maugmang bareta, tibaad kaipuhan niyatong dumalaw sa ibang oras. An padre de pamilya tibaad nasa harong kun banggi o katapusan kan semana. Maninigong hinguwahon niyato na may makaulay sa kada harong, na pauruutrong nagdadalaw sa mga dipisil maabutan. Paano kun mayong mangyari sa saimong paghihinguwa? Tibaad magkaigwa nin marahay na resulta an pagpatotoo paagi sa surat o telepono.
3. Ano an mga oportunidad mo na makapagpatotoo sa publiko o nin impormal?
3 Sa Publiko o sa Impormal na Paagi: Ihinahayag kan mga lingkod ni Jehova ngunyan an tunay na ‘kadunungan’ sa gabos na magdadangog kaiyan. Kun beses, ginigibo iyan sa mismong mga kalsada o sa pampublikong mga lugar. (Tal. 1:20, 21) Dawa nasa pang-aroaldaw na gibuhon, iniisip ta pa man daw giraray na makapagpatotoo? Masasabi daw na sibot kitang gayo sa paghuhulit kan tataramon? (Gui. 18:5) Kun iyo, nauutob niyato an satong obligasyon na ‘lubos na magpatotoo.’—Gui. 10:42, NW; 17:17; 20:20, 21, 24.
4. Paano nakakatabang an pamibi asin paghurop-hurop sa satong lubos na pagpatotoo?
4 Alagad kun beses, huli sa personal na mga kaluyahan o pagkamasusupgon, tibaad mag-alangan kitang magpatotoo. Siyertong nasasabutan ni Jehova an satong mga limitasyon. (Sal. 103:14) Minsan siring, kun nag-aalangan kita, puwede kitang mamibi na magkaigwa nin kusog nin buot na magpatotoo. (Gui. 4:29, 31) Siring man, kun personal na nag-aadal asin naghuhurop-hurop sa Tataramon nin Diyos, puwede kitang magkonsentrar sa pagpararom kan satong apresasyon sa nakakalabing halaga kan maugmang bareta. (Fil. 3:8) Mapahiro ini sa sato na ihayag iyan na may kaigutan!
5. Paano kita makakapakikabtang sa kautuban kan hula ni Joel?
5 Ihinula ni Joel na bago an dakula asin makangingirhat na aldaw ni Jehova, an banwaan nin Diyos padagos na maabante asin dai matugot na may makaulang sa sainda sa paghuhulit. (Joel 2:2, 7-9) Lugod na makikabtang kita nin lubos sa dai na nuarin man mauutrong gibuhon na ini nin pagpapatotoo!