An Kampanya sa Pagpaisi kan Memoryal Mapuon sa Marso 1
1. Nuarin ta pupunan na ipaisi an Memoryal, asin taano ta mas halawig an kampanya sa taon na ini?
1 Sa Biyernes, Marso 1, pupunan ta an satong taunan na kampanya na imbitaran an iba na mag-atender sa Memoryal. An Memoryal gigibuhon sa Marso 26, kaya an kampanya medyo mas halawig kisa kan nakaaging mga taon. Mas dakul an magkakaoportunidad na makaresibi nin imbitasyon, lalo na kun nataon na nakaistar sinda sa lugar na sakop nin dakulang teritoryo kan kongregasyon.
2. Ano an mga areglo sa pagkua nin mga kopya kan imbitasyon asin pagkubre kan teritoryo?
2 Pagigin Organisado: Matao nin instruksiyon an mga elder kun paano kukubrehan an teritoryo, pati na kun baga mawalat nin imbitasyon sa mga harong na mayong tawo. Kun may matada pang imbitasyon pagkatapos nin pagharong-harong sa bilog na teritoryo, puwede iyan na idistribwir paagi sa pagpatotoo sa publiko. Sisiguraduhon kan paraataman sa paglilingkod na igwa nin suplay nin may label na mga imbitasyon sa literature o magazine counter na makukua kan mga parahayag, pero dai iluluwas an gabos na imbitasyon. Makua sana kita kan gagamiton ta para sa sarong semana.
3. Ano an maninigo tang tandaan pag nagtatao nin imbitasyon?
3 Ano an Sasabihon Niyato? Pinakamarahay na halipot sana an sabihon tanganing mas dakul kitang makaulay. Sa pahina 4 may sampol na presentasyon na ikakabagay ta sa satong teritoryo. Siyempre, dai ta kaipuhan na maghidali kun an kagharong makikatuod o may mga hapot. Kun nagdidistribwir nin imbitasyon pag Sabado asin Domingo, maninigo ta man na ialok an mga magasin kun angay. Sa Marso 2, makonsentrar kita sa pagdistribwir kan mga imbitasyon imbes na sa pagpuon nin pag-adal sa Bibliya.
4. Taano ta dapat kitang makikabtang nin maigot sa kampanya?
4 Naglalaom kita na dakul an maatender sa Memoryal. Ipapaliwanag sa pahayag kun siisay talaga si Jesus. (1 Cor. 11:26) Tutukaron man kun paano kita nakikinabang sa saiyang kagadanan. (Roma 6:23) Asin itatampok kaiyan kun taano ta mahalaga na girumdumon niyato siya. (Juan 17:3) Lugod na makikabtang kita nin maigot sa kampanya!