Gamiton an Haloy Nang mga Magasin

Mayong makikinabang kun isasaray o itatapok ta an haloy nang mga magasin, kaya dapat na hinguwahon tang maipasakamot iyan. An saro sanang magasin puwedeng makapukaw sa interes nin sarong tawo sa katotoohan asin magpahiro sa saiya na mag-apod sa ngaran ni Jehova. (Roma 10:13, 14) Uya an nagkapirang suhestiyon sa paggamit kan haloy nang mga magasin.

• Pag naghuhulit sa mga teritoryong bihirang gibuhon, kun mayo nin tawo sa harong tibaad puwede kang magwalat nin sarong magasin sa lugar na dai nahihiling nin iba.

• Pag nagpapatotoo sa publiko arog kan punduhan nin bus o istasyon nin tren, haputon an mga tawo kun gusto ninda nin babasahon, ipahiling an nagkapira sa haloy nang mga isyu kan magasin, asin papilion sinda.

• Pag nagduduman sa laundry shop, nursing home, klinika, o iba pang kaparehong lugar sa teritoryo nindo, magwalat sa waiting area nin pirang haloy nang isyu nin magasin. Sa parati, mas marahay na magpaaram nguna sa namamahala o katiwala kun yaon man sana siya. Kun may mahiling ka nang mga magasin diyan, dai ka na magwalat.

• Pag nag-aandam sa pagdalaw liwat, pag-isipan kun sain interesado an lambang dadalawon mo. Pamilyado daw siya? Pirmi daw siyang nagbibiyahe? Mahilig daw siya sa tinanom? Hilingon sa haloy nang mga isyu nin magasin kun may artikulong magugustuhan niya, asin ipahiling iyan sa saiya pagbalik mo.

• Pag naabutan mo sa harong an interesado na haloy mo nang dinudumanan pero dai mo nakakaulay, ipahiling an nagkapira sa haloy nang mga magasin na dai niya nabasa.