Mga Reperensiya Para sa Workbook sa Pagtiripon na Pamumuhay Asin Ministeryo
Oktubre 7-13
KAYAMANAN NA YAON SA TATARAMON NIN DIYOS | SANTIAGO 3-5
“Magpahiling nin Diyosnon na Kadunungan”
(Santiago 3:17) Alagad an saro na igwa nin kadunungan na gikan sa itaas inot sa gabos dalisay an puso, dangan mapagpatuninong, rasonable, andam na magsunod, pano nin pagkahirak asin marahay na mga bunga, daing ipinapaurog, bakong mapagsagin-sagin.
May Epekto daw sa Saindong Buhay “an Kadonongan Hale sa Itaas”?
9 “Enot sa gabos mabini.” An pagigin mabini nangangahulogan magin dalisay asin daing ramog bako sanang sa luwas kundi sa laog. Iinaasosyar kan Biblia an kadonongan sa puso, alagad an langitnon na kadonongan dai makalalaog sa puso na naramogan nin maraot na mga kaisipan, kamawotan, asin motibo. (Talinhaga 2:10; Mateo 15:19, 20) Minsan siring, kun an puso niato mabini—an boot sabihon, sagkod sa mapupuede para sa mga tawong bakong sangkap—kita ‘marayo sa maraot asin magibo kan marahay.’ (Salmo 37:27; Talinhaga 3:7) Bako daw na angay na an kabinian iyo an enot na kualidad nin kadonongan na ilinista? Total, kun kita bakong malinig sa moral asin espirituwal, paano ngani niato ikapababanaag an ibang kualidad nin kadonongan hale sa itaas?
10 “Dangan matoninong.” An langitnon na kadonongan nagpapahiro sa sato na pagmaigotan na kamtan an katoninongan, na bunga kan espiritu nin Dios. (Galacia 5:22) Pinagmamaigotan niato na likayan na maraot an “bungkos nin katoninongan” na nakakapasararo sa banwaan ni Jehova. (Efeso 4:3) Ginigibo man niato an bilog niatong makakaya na ikabalik an katoninongan kun iyan nararaot. Taano ta importante ini? Sinasabi kan Biblia: “Padagos kamong . . . mamuhay na matoninong; asin an Dios nin pagkamoot asin nin katoninongan mapapasaindo.” (2 Corinto 13:11) Kaya sagkod na kita padagos na namumuhay nin matoninong, mapapasato an Dios nin katoninongan. An pagtratar niato sa mga kapwa nagsasamba direktamenteng konektado sa relasyon niato ki Jehova. Paano niato mapatutunayan na kita parapatoninong? Estudyare an sarong halimbawa.
(Santiago 3:17) Alagad an saro na igwa nin kadunungan na gikan sa itaas inot sa gabos dalisay an puso, dangan mapagpatuninong, rasonable, andam na magsunod, pano nin pagkahirak asin marahay na mga bunga, daing ipinapaurog, bakong mapagsagin-sagin.
May Epekto daw sa Saindong Buhay “an Kadonongan Hale sa Itaas”?
12 “Rasonable.” Ano an kahulogan kan pagigin rasonable? Segun sa mga intelektuwal, an orihinal na tataramon sa Griego na trinadusir na “rasonable” sa Santiago 3:17 depisil na tradusiron. An mga paratradusir naggamit nin mga tataramon na arog kan “maboot,” “pasensioso,” asin “makonsiderasyon.” Ipinaririsa kan nota sa ibaba sa New World Translation na an literal na kahulogan “mapagpahunod.” Paano niato ikapaheheling na an aspektong ini kan kadonongan hale sa itaas may epekto sa sato?
May Epekto daw sa Saindong Buhay “an Kadonongan Hale sa Itaas”?
14 “Andam na magkuyog.” An tataramon sa Griego na trinadusir na “andam na magkuyog” dai manonompongan sa ibang parte kan Kristianong Griegong Kasuratan. Segun sa sarong intelektuwal, an tataramon na ini “parateng ginagamit manongod sa disiplina militar.” Nagtatao iyan kan ideya nin “madaling makombensir” asin “mapagpasakop.” An saro na ginigiyahan kan kadonongan hale sa itaas magian sa boot na nagpapasakop sa sinasabi kan Kasuratan. Dai sia nin reputasyon na nagdedesisyon dangan habo nang magpaimpluwensia sa ano man na katotoohan na kontra saiya. Imbes, madali siang magbago kun iinaatubang sa saiya an malinaw na ebidensia sa Kasuratan na sala an paninindogan nia o sala an mga konklusyon nia. Iyan daw an reputasyon nindo sa iba?
“Pano nin Pagkaherak Asin Marahay na mga Bunga”
15 “Pano nin pagkaherak asin marahay na mga bunga.” An pagkaherak importanteng kabtang kan kadonongan hale sa itaas, huli ta an siring na kadonongan sinasabing “pano nin pagkaherak.” Mangnoha na an “pagkaherak” asin “marahay na mga bunga” magkaibanan na nasasambitan. Angay ini, ta sa Biblia, an pagkaherak pinakaparateng nanonongod sa aktibong pagmalasakit sa iba, pagkaludok na nagbubunga nin dakol na gibo nin kabootan. An pagkaherak tinatawan nin kahulogan nin sarong reperensia bilang “pakamate nin kamondoan sa maraot na situwasyon nin saro asin hinihingoa na may gibohon manongod dian.” Huli kaini, an diosnon na kadonongan bakong mabublay, indiperente, o isip sana an ginagamit. Imbes, iyan may init, odok sa puso, asin mapagrisa sa iba. Paano niato ikapaheheling na kita pano nin pagkaherak?
(Santiago 3:17) Alagad an saro na igwa nin kadunungan na gikan sa itaas inot sa gabos dalisay an puso, dangan mapagpatuninong, rasonable, andam na magsunod, pano nin pagkahirak asin marahay na mga bunga, daing ipinapaurog, bakong mapagsagin-sagin.
May Epekto daw sa Saindong Buhay “an Kadonongan Hale sa Itaas”?
18 “Dai nagpapalaenlaen na may ipinaoorog.” An diosnon na kadonongan napanggaganahan an prehuwisyo sa rasa asin pag-orgolyo sa nasyon. Kun kita ginigiyahan kan siring na kadonongan, hinihingoa niato na haleon sa satong puso an ano man na tendensia na magpaheling nin paboritismo. (Santiago 2:9) Dai niato ipinaoorog an iba basado sa saindang inadalan, pinansial na kamugtakan, o paninimbagan sa kongregasyon; ni minemenos man niato an siisay man sa satong mga kapwa nagsasamba, gurano man sinda kahamak sa pagheling. Kun ginibo ni Jehova an mga siring na mag-ako kan saiyang pagkamoot, maninigo nanggad na ibilang niato sinda na maninigong mag-ako kan satong pagkamoot.
19 “Bakong ipokrito.” An tataramon sa Griego para sa “ipokrito” puedeng mapanongod sa “sarong aktor na may iinaaktong papel.” Kan suanoy na mga panahon, an mga aktor na Griego asin Romano nagsusulot nin darakulang maskara kun nagpapasale. Huli kaini, an tataramon sa Griego para sa “ipokrito” iinaplikar sa saro na nagsasaginsagin, o nagpuputik. An aspektong ini kan diosnon na kadonongan maninigong makaimpluwensia bako sanang sa pagtratar niato sa mga kapwa nagsasamba kundi sa saboot man niato manongod sa sainda.
Maghanap nin Espirituwal na Kayamanan
(Santiago 4:5) O pig-iisip daw nindo na mayong katuyuhan an sinambit sa Kasuratan: “An espiritu nin pagkauri na yaon sa laog niyato padagos na nagmamawot nin manlain-lain na bagay”?
Tampok na mga Kabtang sa mga Surat ni Santiago Asin ni Pedro
4:5—Anong teksto an kinokotar ni Santiago digdi? Si Santiago dai nagkokotar nin ano man na espesipikong teksto. Minsan siring, an ipinasabong nin Dios na mga tataramon na ini posibleng basado sa pangkagabsan na ideya na yaon sa mga teksto na arog kan Genesis 6:5; 8:21; Talinhaga 21:10; asin Galacia 5:17.
(Santiago 4:11, 12) Mga tugang, ipundo na nindo an pagtaram nin tumang sa lambang saro. An siisay man na nagtataram nin tumang sa sarong tugang o nanghuhusgar sa saiyang tugang nagtataram tumang sa katugunan asin hinuhusgaran iyan. Ngunyan kun hinuhusgaran mo an katugunan, bako kang parautob kan katugunan kundi sarong hukom. 12 Saro sana an Paratao nin Katugunan asin Hukom, siya na may kakayahan na magligtas asin maglaglag. Pero ika, siisay ka man para manghusgar sa saimong kapwa?
An Pagtubod Ginigibo Kitang Mapasensia Asin Mapagngayongayo
8 Kasalan an magtaram tumang sa sarong kapagtubod. (Santiago 4:11, 12) Pero, an nagkapira mapagtatsar sa mga kapwa Kristiano, tibaad bilang resulta kan saindang aktitud na pagpakangmatanos sa sadiri o huli ta gusto nindang ilangkaw an saindang sadiri paagi sa pagmenus sa iba. (Salmo 50:20; Talinhaga 3:29) An termino sa Griego na trinadusir na ‘magtaram tumang sa’ nangangahulogan nin pakikilaban asin nagpaparisa nin sobra o falsong sahot. Ini paghokom nin bakong paborable sa sarong tugang. Paano na ini ‘pagtaram tumang sa asin paghokom sa ley nin Dios’? Bueno, an mga eskriba asin Fariseo ‘matibayon na ipinagigilid an togon nin Dios’ asin naghohokom basado sa saindang sadiring mga pamantayan. (Marcos 7:1-13) Kaagid kaiyan, kun kinondenar niato an sarong tugang na dai man kokondenaron ni Jehova, bako daw na kita ‘naghohokom sa ley nin Dios’ asin may pagkakasalang ipinaririsa na iyan kulang? Asin paagi sa bakong makatanosan na pagtatsar sa satong tugang, dai niato inootob an ley nin pagkamoot.—Roma 13:8-10.
Pagbasa sa Bibliya
(Santiago 3:1-18) Mga tugang ko, dakul sa saindo an dai dapat magin mga paratukdo, huling aram niyato na mas magabat an gigibuhon na paghusgar sa sato. 2 Gabos kaya kita napapasala nin dakul na beses. Kun an siisay man dai napapasala sa pigtataram niya, saro siyang tawong perpekto, na kayang rendahan an bilog niyang hawak. 3 Kun binubugtakan niyato nin renda an mga nguso nin mga kabayo tanganing sumunod an mga ini sa sato, nakokontrol ta man an bilog nindang hawak. 4 Pagmasdi man an mga barko: Dawa ngani darakulaon an mga iyan asin dinadara nin makusog na mga duros, nakokontrol an direksiyon kaiyan paagi sa saditon na timon sain man gustuhon kan timonel. 5 Kaya siring man, an dila sadit na parte kan hawak, alagad ta grabeng mga paghambog an ginigibo kaiyan. Isipa na sana kun paano kayang suluon nin saditon na kalayo an mahiwason na kakahuyan! 6 An dila saro man na kalayo. Sa gabos na kabtang kan satong hawak, an dila pano-pano nin karatan, huli ta dinidigtaan kaiyan an bilog na hawak saka siring sa kalayo rinaraot kaiyan an buhay nin saro, asin an kalayo kaiyan pinapalaad kan Gehenna. 7 An gabos na klase nin mga layas na hayop asin gamgam asin hayop na nagkakamang saka mga linalang sa dagat puwedeng pagaruon asin napapagaro nin mga tawo. 8 Alagad mayo nin tawo na kayang pagaruon an dila. Dai iyan makontrol asin pirming nakakadanyar, saka pano nin nakakagadan na kamandag. 9 Paagi kaiyan inuumaw ta si Jehova, an Ama, alagad ta paagi man kaiyan isinusumpa ta an mga tawo na ginibo “sa ladawan nin Diyos.” 10 Hali sa iyo man sanang nguso minaluwas an pag-umaw asin an pagsumpa. Mga tugang ko, dai dapat mangyari an arog kaini. 11 An sarong burabod dai minapaluwas nin mahamis na tubig asin mapait na tubig hali sa iyo man sanang pigluluwasan, bako? 12 Mga tugang ko, an puon nin higera dai makakapamunga nin mga oliba, asin an puon nin ubas dai man makakapamunga nin mga igos, bako daw? Pati an tubig na maasgad dai man makakapaluwas nin tubig na tâbang. 13 Siisay an madunong asin may pakasabot diyan sa saindo? Paagi sa marahay na paggawi, ipahiling niya na an gabos na bagay ginigibo niya nin may kahuyuan na bunga nin kadunungan. 14 Alagad kun igwa diyan sa mga puso nindo nin grabeng pagkauri asin hilig na makipagdaugan, dai nindo ipagparahambog an saindong kadunungan, ta iyan magigin pagputik sa katotoohan. 15 Bako ini an kadunungan na gikan sa itaas; iyan kinabanon, sa-hayop, sa-demonyo. 16 Huli ta kun sain igwa nin pagkauri asin hilig na makipagdaugan, yaon man an kariribukan asin gabos na klase nin karatan. 17 Alagad an saro na igwa nin kadunungan na gikan sa itaas inot sa gabos dalisay an puso, dangan mapagpatuninong, rasonable, andam na magsunod, pano nin pagkahirak asin marahay na mga bunga, daing ipinapaurog, bakong mapagsagin-sagin. 18 Dugang pa, an mga nakikipagkatuninungan nagsasabwag sa matuninong na mga kamugtakan asin nag-aani kan bunga nin pagigin matanos.
Oktubre 14-20
KAYAMANAN NA YAON SA TATARAMON NIN DIYOS | 1 PEDRO 1-2
“Magpakabanal Kamo”
(1 Pedro 1:14, 15) Bilang masinunod na mga aki, dai na kamo magpamolde sa mga pagmawot nindo kaidtong mayo pa kamong aram, 15 kundi arog kan Banal na Diyos na nag-apod sa saindo, magin man kamong banal sa gabos nindong paggawi,
An Pantubos—Sarong “Perpektong Regalo” Gikan sa Ama
5 Paano niyato maipapahiling na pinapahalagahan niyatong marhay an pangaran ni Jehova? Paagi sa satong paggawi. Ipinagbubuot ni Jehova na magin kitang banal. (Basahon an 1 Pedro 1:15, 16.) Nangangahulugan ini na si Jehova sana an sasambahon niyato asin na kukuyugon ta siya nin bilog na puso. Dawa kun pinepersegir kita, ginigibo ta an pinakamakakaya niyato tanganing makapamuhay kauyon kan saiyang matanos na mga prinsipyo asin pagbuot. Kun gigibuhon niyato kun ano an matanos, mapapaliwanag ta an satong ilaw asin mapapamuraway ta an pangaran ni Jehova. (Mat. 5:14-16) Bilang banal na banwaan, mapapatunayan niyato paagi sa kun paano kita namumuhay na marahay an mga pagbuot ni Jehova asin na bakong totoo an mga akusasyon ni Satanas. Kun kita man magkasala, tunay kitang nagsusulsol asin tinatalikdan an mga gibong malapastangan sa pangaran ni Jehova.—Sal. 79:9.
(1 Pedro 1:16) huli ta nasusurat: “Magpakabanal kamo, huli ta ako banal.”
Kun Paano Kita Mapili nin Libangan
6 Sinasabi sa sato ni Jehova: “Magpakabanal kamo, huli ta ako banal.” (1 Pedro 1:14-16; 2 Pedro 3:11) Aakuon sana ni Jehova an satong pagsamba kun iyan banal, o malinig. (Deuteronomio 15:21) Dai magigin malinig an satong pagsamba kun naggigibo kita nin mga bagay na ikinakaanggot ni Jehova, arog kan mga bagay na imoral, madahas, o may koneksiyon sa demonismo. (Roma 6:12-14; 8:13) Asin dai man mauugma si Jehova kun nalilibang kita sa siring na mga bagay. Paagi kaiyan, puwedeng magin maati an satong pagsamba asin dai iyan akuon ni Jehova, saka puwede kaiyan na rauton an satong relasyon sa saiya.
Maghanap nin Espirituwal na Kayamanan
(1 Pedro 1:10-12) Mapadapit sa kaligtasan na ini, matiyagang nagsiyasat asin guminibo nin maingat na pag-adal an mga propeta na nagpropesiya manungod sa daing kapantay na kabuutan na para nanggad sa saindo. 11 Padagos nindang inestudyaran kun arin na partikular na panahon o kun anong kapanahunan an ipinaparisa kan espiritung yaon sa sainda may koneksiyon ki Cristo, mantang patiinot iyan na nagpapatotoo manungod sa mga pagsakit na aagihan ni Cristo asin sa kamurawayan na kasunod kaiyan. 12 Ihinayag sa sainda na naglilingkod sinda, bako para sa saindang sadiri, kundi para sa saindo, may koneksiyon sa mga bagay na ngunyan ipinaisi na sa saindo kaidtong mga nagpahayag sa saindo kan maugmang bareta sa tabang kan banal na espiritu na ipinadara hali sa langit. Sa mismong mga bagay na ini, an mga anghel interesadong marhay na makaaram.
Tampok na mga Kabtang sa mga Surat ni Santiago Asin ni Pedro
1:10-12. Minawot nin mga anghel na maaraman asin masabotan an hararom na espirituwal na mga katotoohan na isinurat nin mga propeta nin Dios kan suanoy na mga panahon mapadapit sa kongregasyon nin linahidan na mga Kristiano. Minsan siring, an mga bagay na ini nagin maliwanag sana kan ponan ni Jehova na tawan nin atension an kongregasyon. (Efe. 3:10) Bako daw na maninigo niatong arogon an halimbawa kan mga anghel asin hingoahon na siyasaton an “harararom na bagay nin Dios”?—1 Cor. 2:10.
(1 Pedro 2:25) Huli ta garo kamo kaidto mga karnero na nagkaralagalag, alagad ngunyan kamo buminalik na sa pastor asin paraataman kan saindong mga kalag.
it-2 565 ¶3
Paraataman
An Kahuruhalangkawing Paraataman. Malinaw na kinotar kan inot na Pedro 2:25 an Isaias 53:6 may koneksiyon sa ‘garo mga karnero na nagkaralagalag,’ dangan sinabi ni Pedro: “Alagad ngunyan kamo buminalik na sa pastor asin paraataman kan saindong mga kalag.” Siguradong an Diyos na Jehova an pinapanungdan kaini, huli ta an mga sinuratan ni Pedro dai man nalagalag parayo ki Cristo Jesus, imbes, paagi saiya naibalik an mga ini pasiring sa Diyos na Jehova, na iyo an Kahuruhalangkawing Pastor kan saiyang banwaan. (Sal 23:1; 80:1; Jer 23:3; Eze 34:12) Saro man na paraataman si Jehova, an saro na nagsisiyasat. (Sal 17:3) An pagsiyasat (sa Griego, e·pi·sko·peʹ) posibleng konektado sa kapahayagan kan saiyang paghukom, arog kan inot na siglo C.E. sa Jerusalem, na dai nakasabot sa panahon kan “pagsisiyasat [sa Griego, e·pi·sko·pesʹ]” sa saiya. (Lu 19:44) O puwede ining magtao nin magayon na epekto asin mga pakinabang para sa mga nagpapamuraway sa Diyos sa aldaw “kan saiyang pagsiyasat [sa Griego, e·pi·sko·pesʹ].”—1Pe 2:12.
Pagbasa sa Bibliya
(1 Pedro 1:1-16) Hali ki Pedro, na sarong apostol ni Jesu-Cristo, para sa temporaryong mga residente na nagkasuruway-suway asin yaon sa Ponto, Galacia, Capadocia, Asia, asin Bitinia, sa saindo na mga pinili 2 uyon sa aram na kaidto kan Diyos na Ama, kamo na mga pinabanal kan espiritu, sa katuyuhan na magin masinunod kamo asin magin malinig paagi sa dugo ni Jesu-Cristo: Lugod na urog pa kamong magkamit nin daing kapantay na kabuutan asin nin katuninungan. 3 Pag-umawon an Diyos asin Ama kan satuyang Kagurangnan na Jesu-Cristo, huling uyon sa saiyang dakulang pagkahirak pinangyari niya an panibagong pagkamundag niyato tanganing magkaigwa kita nin sarong nagdadanay na paglaom paagi sa pagkabuhay liwat ni Jesu-Cristo hali sa mga gadan, 4 asin tanganing akuon niyato an sarong mana na dai nalalapa asin mayong digta saka dai napapara. Nakatagama iyan sa saindo sa langit, 5 iyo, sa saindo na dahil sa pagtubod iniingatan nin Diyos paagi kan saiyang kapangyarihan para magkamit kan kaligtasan na ihahayag sa panahon kan katapusan. 6 Huli kaini naggagaya-gaya nanggad kamo, maski ngani sa presente kaipuhan kamong magtios sa dikit na panahon nin lain-lain na kasakitan, 7 tanganing an nabalo nang pagtubod nindo, na mas dakula an halaga kisa sa bulawan na puwedeng maraot maski pinaagi na ini sa kalayo, magin dahilan na mag-ako kamo nin pag-umaw asin kamurawayan saka onra sa panahon na ihayag na si Jesu-Cristo. 8 Dawa dai pa lamang nindo siya nahiling, namumutan nindo siya. Dawa dai nindo siya nahihiling ngunyan, nagtutubod kamo sa saiya asin nauugmang marhay mala ta an saindong kagaya-gayahan dai maipaliwanag asin pambihira nanggad, 9 huling nakakasigurado kamo na an pagtubod nindo maresulta sa saindong kaligtasan. 10 Mapadapit sa kaligtasan na ini, matiyagang nagsiyasat asin guminibo nin maingat na pag-adal an mga propeta na nagpropesiya manungod sa daing kapantay na kabuutan na para nanggad sa saindo. 11 Padagos nindang inestudyaran kun arin na partikular na panahon o kun anong kapanahunan an ipinaparisa kan espiritung yaon sa sainda may koneksiyon ki Cristo, mantang patiinot iyan na nagpapatotoo manungod sa mga pagsakit na aagihan ni Cristo asin sa kamurawayan na kasunod kaiyan. 12 Ihinayag sa sainda na naglilingkod sinda, bako para sa saindang sadiri, kundi para sa saindo, may koneksiyon sa mga bagay na ngunyan ipinaisi na sa saindo kaidtong mga nagpahayag sa saindo kan maugmang bareta sa tabang kan banal na espiritu na ipinadara hali sa langit. Sa mismong mga bagay na ini, an mga anghel interesadong marhay na makaaram. 13 Kaya andamon nindong marhay an saindong isip para sa gibuhon; pagdanayon nindong malinaw an saindong pag-iisip sa gabos na bagay; ibugtak nindo an saindong paglaom sa daing kapantay na kabuutan na ipapahiling sa saindo sa panahon na ihayag na si Jesu-Cristo. 14 Bilang masinunod na mga aki, dai na kamo magpamolde sa mga pagmawot nindo kaidtong mayo pa kamong aram, 15 kundi arog kan Banal na Diyos na nag-apod sa saindo, magin man kamong banal sa gabos nindong paggawi, 16 huli ta nasusurat: “Magpakabanal kamo, huli ta ako banal.”
Oktubre 21-27
KAYAMANAN NA YAON SA TATARAMON NIN DIYOS | 1 PEDRO 3-5
“An Katapusan kan Gabos na Bagay Harani na”
(1 Pedro 4:7) Alagad an katapusan kan gabos na bagay harani na. Kun siring, magin tultol an saindong isip, asin magin mapagbantay kamo may koneksiyon sa saindong mga pamibi.
“Magin Mapinamibi”
“AN PINAKAMASAKIT na oras na magdanay na mata iyo an mag-aagahon,” an sabi nin sarong dating nagtatrabaho sa banggi. Posible nanggad na mauyon diyan an iba na an trabaho nangangaipong magdanay na mata sa bilog na banggi. An mga Kristiyano ngunyan napapaatubang sa kaagid na kadipisilan huling yaon na sa pinakamadiklom na peryodo an garo halawigon na banggi kan maraot na sistema nin mga bagay ni Satanas. (Roma 13:12) Peligroso nanggad para sa sato na mapaturog sa ultimo ora na ini! Kaipuhan tang “magin tultol an isip” asin maghimati sa sadol kan Kasuratan na “magin mapinamibi.”—1 Ped. 4:7, NW.
(1 Pedro 4:8) Urog sa gabos, magkaigwa nin makusog na pagkamuot sa lambang saro, huli ta an pagkamuot nakakatahob sa dakul na kasalan.
Kun Paano Mamimidbid Asin Dadaogon an Ano Man na Espirituwal na Kaluyahan
Sa katapustapusi, marigon na papagdanayon sa isip an mamomoton na konseho ni apostol Pedro: “Harani na an katapusan kan gabos na bagay. Magin marahay an kaisipan, kun siring, asin magin puka sa pagpamibi. Orog sa gabos, magkaigwa nin makosog na pagkamoot sa lambang saro, huli ta an pagkamoot nakatatahob sa dakol na kasalan.” (1 Pedro 4:7, 8) Pasil na marhay na togotan an pagkabakong sangkap nin tawo—an sa ibang tawo asin an sa sato—na makalaog sa satong puso asin isip asin magin mga balakid, singkogan. Aram na marhay ni Satanas an kaluyahan na ini nin tawo. An bangaon dangan sakopon saro sa saiyang tusong mga taktika. Kun siring, kita dapat na magin marikas sa pagtahob sa siring na mga kasalan nin makosog na pagkamoot sa lambang saro asin dai “tawan nin lugar an Diablo.”—Efeso 4:25-27.
(1 Pedro 4:9) Magin mapag-istimar sa lambang saro na daing paggumod-gumod.
An Marahayon na Ugali na Pagigin Mapag-istimar—Kaipuhan Nanggad!
2 Dinagka ni Pedro an mga tugang: “Magin mapag-istimar sa lambang saro.” (1 Ped. 4:9) Sa Griego, an “pagkamapag-istimar” literal na nangangahulugan nin “kapadangatan o kabuutan sa mga estranghero.” Alagad, mangnuhon na dinagka ni Pedro an saiyang Kristiyanong mga tugang na magin mapag-istimar “sa lambang saro,” buot sabihon, sa mga dati na nindang kabisto asin kairiba. Paano iyan makakatabang sa sainda?
3 Makakatabang iyan na magin dayupot sinda sa lambang saro. Pag-isipan an sadiri mong eksperyensiya. Naimbitaran ka na daw nin sarong tugang sa saiyang harong? Bako daw na nauugma kang marhay pag nagigirumduman mo iyan? Naimbitaran mo na man daw sa harong an pira mong kakongregasyon? Bako daw na huli kaiyan nagin mas dayupot kamong mag-aramigo? An pagigin mapag-istimar sarong marahay na paagi tanganing mas mamidbid ta an mga tugang. Kaipuhan kan mga Kristiyano kan panahon ni Pedro na magin mas dayupot sa lambang saro mantang mas naggagrabe an mga kamugtakan. Totoo man ini para sa mga Kristiyano sa “huring mga aldaw” na ini.—2 Tim. 3:1.
Maghanap nin Espirituwal na Kayamanan
(1 Pedro 3:19, 20) Asin sa arog kaining kamugtakan siya nagduman sa mga espiritung nakapreso asin naghulit sa mga ini, 20 na nagin masinuway kaidto kan an Diyos mapasensiyang naghahalat kan panahon ni Noe, mantang ginigibo an arka, na diyan pipirang tawo, walo sanang kalag, an naligtas sa mga tubig kan baha.
Hapot Hali sa mga Parabasa
Sinasabi kan Bibliya na si Jesus ‘naghulit sa mga espiritu na nasa bilangguan.’ (1 Ped. 3:19) Ano an buot sabihon kaini?
▪ Sinabi ni apostol Pedro na an mga espiritung ini iyo idtong nagin ‘mga masumbikal, kan an pakatios nin Diyos naghalat kan mga aldaw ni Noe.’ (1 Ped. 3:20) Malinaw na an pinanunungdan ni Pedro iyo an espiritung mga linalang na uminiba ki Satanas sa pagrebelde. Sinambit ni Judas an mga anghel na ‘dai nag-ingat kan saindang sadiring katungdan, kundi nagbaya kan saindang inuuntukan,’ na nagsasabing ‘ibinugtak [sinda nin Diyos] sa daing tapos na pagkagapos sa irarom nin kadikluman sagkod sa paghukom sa dakulang aldaw.’—Jud. 6.
Sa anong paagi na an espiritung mga linalang nagin masumbikal kan panahon ni Noe? Bago kan Delubyo, an maraot na espiritung mga linalang na ini nagsulot nin pisikal na hawak—na bakong katuyuhan nin Diyos para sa sainda. (Gen. 6:2, 4) Apuwera kaini, an mga anghel na iyan na nakidurog sa mga babayi naggibo nin sarong bagay na sala nanggad. Dai sinda linalang nin Diyos para makidurog sa mga babayi. (Gen. 5:2) An maraot asin masumbikal na mga anghel na ini lalaglagon sa itinalaan na panahon nin Diyos. Sa ngunyan, arog kan sinabi ni Judas, yaon sinda sa ‘irarom nin kadikluman’—sarong espirituwal na bilangguan, sabi ngani.
Kasuarin asin paano naghulit si Jesus sa ‘mga espiritung ini na nasa bilangguan’? Isinurat ni Pedro na nangyari ini pagkatapos na si Jesus “binuhay sa espiritu.” (1 Ped. 3:18, 19) Tandaan man na sinabi ni Pedro na si Jesus “naghulit.” An pagkasabi ni Pedro sa paaging garo baga nangyari na nagpaparisa na an paghuhulit nangyari bago ginibo ni Pedro an inot niyang surat. Kun siring, minalataw na pagkabuhay liwat ni Jesus, sinabi niya sa maraot na mga espiritu an dapit sa biyong makatanusan na padusa na maninigo sa sainda. Iyan bakong paghuhulit na nagtatao nin ano man na paglaom sa sainda. Imbes, paghuhulit iyan nin paghukom. (Jon. 1:1, 2) Kan ipinahiling ni Jesus an saiyang pagtubod asin kaimbudan sagkod sa kagadanan dangan binuhay siya liwat—na nagpapatunay na mayo nanggad nin kapangyarihan sa saiya an Diyablo—nagkaigwa si Jesus nin basehan sa pagpahayag kan siring na paghukom.—Juan 14:30; 16:8-11.
Sa maabot na panahon, gagapuson ni Jesus asin iaapon si Satanas sa bûngaw pati an mga anghel na idto. (Luc. 8:30, 31; Kap. 20:1-3) Sagkod na dai pa nag-aabot iyan, an masumbikal na mga espiritung ini yaon sa irarom nin makuring espirituwal na kadikluman, asin sigurado an pangultimong kalaglagan ninda.—Kap. 20:7-10.
(1 Pedro 4:6) Sa katunayan, iyan an dahilan kaya an maugmang bareta ipinahayag man sa mga gadan, na sa siring, maski hinukuman sinda base sa pangluwas nindang itsura sigun sa pagmansay nin mga tawo, sinda mabuhay kauyon kan espiritu sigun sa pagmansay nin Diyos.
Tampok na mga Kabtang sa mga Surat ni Santiago Asin ni Pedro
4:6—Sairisay an “mga gadan” na ‘pinahayagan kan maogmang bareta’? An mga ini iyo an mga ‘gadan kaidto sa saindang mga kalapasan asin mga kasalan,’ o an mga gadan sa espirituwal bago ninda naaraman an maogmang bareta. (Efe. 2:1) Pero, pagkatapos nindang magtubod sa maogmang bareta, nagpoon na sindang “mabuhay” sa espirituwal.
Pagbasa sa Bibliya
(1 Pedro 3:8-22) Bilang panghuri, kamo gabos magpahiling nin pagkasararo nin isip, nin pakikidamay, nin pagkamuot na siring kan sa magturugang, nin mamumuton na pagmalasakit, asin nin kapakumbabaan. 9 Dai magbalos nin maraot sa maraot o nin insulto sa insulto. Imbes, balusan iyan nin mabuot na mga tataramon, huli ta inapod kamo para sa arog kaiyan na buhay, tanganing sa siring magkamit kamo nin bendisyon. 10 Huli ta “an siisay man na nagmamawot nin marahay na buhay asin gustong mabuhay nin maugma dapat na bantayan an saiyang dila na dai magsabi nin maraot asin an saiyang mga ngabil na dai magtaram nin pandadaya. 11 Talikdan niya an maraot asin gumibo siya nin marahay; makipagkatuninungan siya asin pagmaigutan niyang mapagdanay iyan. 12 Huli ta an mga mata ni Jehova nakahiling sa mga matanos, asin an saiyang mga talinga nagdadangog sa saindang pagngayo-ngayo, alagad habo ni Jehova sa mga naggigibo nin maraot na mga bagay.” 13 Siisay man nanggad an makakagibo sa saindo nin maraot kun magi kamong maigot sa paggibo nin marahay? 14 Alagad dawa pa kun magsakit kamo alang-alang sa katanusan, maugma kamo. Minsan siring, dai nindo katakutan an saindang kinakatakutan, asin dai man kamo mapurisaw. 15 Kundi sa saindong mga puso midbidon nindo an pagigin banal kan Cristo bilang Kagurangnan, na pirming andam na idepensa an saindong paglaom sa siisay man na naghahagad nin rason mapadapit diyan, alagad ginigibo ini na may kahuyuan asin hararom na paggalang. 16 Pagdanayon nindo an malinig na konsiyensiya, tanganing sa ano man na paagi na kamo tinataraman nin maraot, idtong mga nagtataram laban sa saindo mapasupog huli kan saindong marahay na paggawi bilang mga parasunod ni Cristo. 17 Huli ta mas marahay pang magsakit kamo dahil naggigibo kamo nin marahay, kun iyan an itinutugot nin Diyos, kisa magsakit kamo dahil naggigibo kamo nin maraot. 18 Si Cristo baga nagadan nin saro sanang beses para sa gabos na panahon alang-alang sa mga kasalan, sarong matanos na tawo na nagadan para sa mga bakong matanos, tanganing giyahan kamo pasiring sa Diyos. Ginadan siya na nasa hawak na laman alagad binuhay sa hawak na espiritu. 19 Asin sa arog kaining kamugtakan siya nagduman sa mga espiritung nakapreso asin naghulit sa mga ini, 20 na nagin masinuway kaidto kan an Diyos mapasensiyang naghahalat kan panahon ni Noe, mantang ginigibo an arka, na diyan pipirang tawo, walo sanang kalag, an naligtas sa mga tubig kan baha. 21 An katimbang kaini na bawtismo iyo man ngunyan an nagliligtas sa saindo (bakong paagi sa paghali kan ramog kan laman, kundi paagi sa paghagad sa Diyos nin sarong malinig na konsiyensiya), paagi sa pagkabuhay liwat ni Jesu-Cristo. 22 Siya nasa tuo nin Diyos, huli ta nagduman siya sa langit, asin an mga anghel asin an mga awtoridad saka an mga kapangyarihan ipinasairarom sa saiya.
Oktubre 28–Nobyembre 3
KAYAMANAN NA YAON SA TATARAMON NIN DIYOS | 2 PEDRO 1-3
“Pirming Isaisip an Pag-abot kan Aldaw ni Jehova”
(2 Pedro 3:9, 10) Si Jehova dai nag-aatraso sa pag-utob kan saiyang panuga, siring kan pighuhuna nin ibang tawo, kundi mapasensiya siya sa saindo huling habo niyang malaglag an siisay man, imbes, gusto niya na an gabos magkaigwa nin oportunidad na magsulsol. 10 Alagad an aldaw ni Jehova maabot na siring sa sarong parahabon, na diyan an mga langit mapapara na may makusog na ragubrob, asin an mga elemento na sobra an init magkakaturunaw, asin an daga saka an mga bagay na ginibo diyan biyong mahahayag.
‘Papangyayarihon ni Jehova na Magibo an Hustisya’
11 Pero, paano niato maninigong saboton an pag-asegurar ni Jesus na “marikas” na papangyayarihon ni Jehova na magibo an hustisya? Ipinapaheling kan Tataramon nin Dios na ‘minsan ngani matinios si Jehova,’ gigibohon nia tolos an hustisya kun nasa tama nang panahon. (Lucas 18:7, 8; 2 Pedro 3:9, 10) Kan panahon ni Noe, kan umabot an Baha, an mga marigsok nalaglag tolos-tolos. Siring man, kan panahon ni Lot, kan mag-oran nin kalayo hale sa langit, nalaglag an mga marigsok. Si Jesus nagsabi: “Siring man an mangyayari sa aldaw na iyan na ihahayag an Aki nin tawo.” (Lucas 17:27-30) Sa giraray, an mga marigsok maagi nin “biglang pagkalaglag.” (1 Tesalonica 5:2, 3) Tunay nanggad, lubos kitang makakapagkompiar na dai totogotan ni Jehova an kinaban ni Satanas na maglawig pa nin sarong aldaw sa hinahagad kan hustisya.
(2 Pedro 3:11, 12) Huling an gabos na bagay na ini magkakaturunaw sa arog kaining paagi, isip-isipon nindo kun dapat na magin anong klaseng tawo kamo. Dapat na kamo mga tawong banal an paggawi asin igwa nin mga gibong nagpapahiling nin debosyon sa Diyos, 12 mantang hinahalat nindo saka pirming isinasaisip an pag-abot kan aldaw ni Jehova, na paagi kaiyan an mga langit lalaglagon sa kalayo asin an mga elemento magkakaturunaw sa grabeng init!
“An Dakulang Aldaw ni Jehova Harani Na”
18 Bakong makangangalas na si apostol Pedro nagsasadol sa sato na papagdanayon na harani sa isip “an presensia kan aldaw ni Jehova”! Paano niato magigibo ini? An sarong paagi iyo an pagigin kalabot “sa banal na mga gawe asin gibo nin diosnon na debosyon.” (2 Pedro 3:11, 12) An pagdadanay na sibot sa siring na mga aktibidad makakatabang sa sato na galagang antisiparon an pag-abot kan “aldaw ni Jehova.” An Griegong tataramon na trinadusir na “pinapagdadanay na harani sa isip” literal na nangangahulogan na “pinaparikas.” Dai talaga niato mapaparikas an natatadang panahon sagkod na umabot an aldaw ni Jehova. Pero, mantang hinahalat niato an aldaw na iyan, an panahon garo baga mas marikas nanggad an pag-agi kun sibot kita sa paglilingkod sa Dios.—1 Corinto 15:58.
Maghanap nin Espirituwal na Kayamanan
(2 Pedro 1:19) Kaya an mga tataramon nin propesiya mas urog na nagin siyerto sa sato, asin marahay an ginigibo nindong pagpokus nin atensiyon sa mga tataramon na iyan, na siring sa sarong lampara na nagliliwanag sa madiklom na lugar (sagkod na umabot an maagahon asin sumirang an bituon na makaaga) sa saindong mga puso.
Tampok na mga Kabtang sa mga Surat ni Santiago Asin ni Pedro
1:19—Siisay an “bitoon sa aga,” kasuarin sia suminirang, asin paano niato naaaraman na ini nangyari na? An “bitoon sa aga” iyo si Jesu-Cristo na igwang kapangyarihan sa Kahadean. (Kap. 22:16) Kan 1914, si Jesus suminirang sa atubangan nin gabos na linalang bilang an Mesiyanikong Hade, na ibinabareta an kapinonan nin sarong bagong aldaw. An transpigurasyon nagtao nin patanaw na bisyon kan kamurawayan ni Jesus asin kan saiyang kapangyarihan sa Kahadean, na idinodoon an pagigin masasarigan kan makahulang tataramon nin Dios. An pagtao nin atension sa tataramon na iyan nagtatao nin liwanag sa satong puso, asin sa siring pinapaaram sa sato na an Bitoon sa Aga suminirang na.
(2 Pedro 2:4) An Diyos dai nanggad nag-alangan na padusahan an mga anghel na nagkasala, kundi inapon niya sinda sa Tartaro asin kinadenahan sinda sa lugar na may grabeng kadikluman tanganing itagama sa paghukom.
Tampok na mga Kabtang sa mga Surat ni Santiago Asin ni Pedro
2:4—Ano an “Tartaro,” asin kasuarin iinapon dian an rebeldeng mga anghel? An Tartaro sarong arog-bilanggoan na kamugtakan na an ilinalaag iyo an espiritung mga linalang sana—bakong mga tawo. Iyan an pagigin nasa grabeng kadikloman nin isip kun mapadapit sa maliwanag na mga katuyohan nin Dios. An mga nasa Tartaro mayo nin paglaom para sa ngapit. Iinapon nin Dios sa Tartaro an rebeldeng mga anghel kan panahon ni Noe, asin magdadanay sinda sa ibinabang kamugtakan na iyan sagkod na laglagon sinda.
Pagbasa sa Bibliya
(2 Pedro 1:1-15) Hali ki Simon Pedro, na sarong uripon asin apostol ni Jesu-Cristo, para sa mga nag-ako nin pagtubod na kasinghalaga kan samuyang pagtubod, na inako ninda dahil sa pagigin matanos kan satuyang Diyos asin kan Paraligtas na si Jesu-Cristo: 2 Lugod na urog pa kamong magkamit nin daing kapantay na kabuutan asin nin katuninungan paagi sa tamang kaaraman mapadapit sa Diyos asin ki Jesus na satuyang Kagurangnan, 3 huling an saiyang kapangyarihan bilang Diyos nagtao sa sato kan gabos na bagay na kaipuhan niyato para makapamuhay kita na may debosyon sa Diyos, asin inako ta an mga bagay na ini huling nagkaigwa kita nin tamang kaaraman manungod sa Saro na nag-apod sa sato paagi sa saiya mismong kamurawayan asin karahayan. 4 Paagi sa mga bagay na iyan tinawan niya kita kan mahalagang marhay asin makangangalas nanggad na mga panuga, tanganing paagi sa mga ini magkaigwa man kamo nin mga karakteristiko nin pagkadiyos, palibhasa nakadulag na kamo sa karatan kan kinaban na bunga nin salang kamawutan. 5 Huli sa mismong bagay na ini, gibuhon nindo an gabos na paghihinguwa na maidagdag sa saindong pagtubod an karahayan, sa saindong karahayan an kaaraman, 6 sa saindong kaaraman an pagpupugol sa sadiri, sa saindong pagpupugol sa sadiri an pakatagal, sa saindong pakatagal an debosyon sa Diyos, 7 sa saindong debosyon sa Diyos an pagkamuot sa mga tugang, sa saindong pagkamuot sa mga tugang an pagkamuot sa gabos. 8 Huli ta kun an mga bagay na ini yaon sa saindo asin nagsusupay, tatabangan kamo kaiyan na dai magin inaktibo o kaya bakong mabunga kun mapadapit sa tamang kaaraman manungod sa satuyang Kagurangnan na Jesu-Cristo. 9 Alagad kun an siisay man mayo kan mga bagay na ini, siya sarong buta, na ipinipirong an saiyang mga mata sa liwanag, asin nalilingawan niyang siya lininig na sa mga kasalan na nagibo niya kaidto. 10 Kaya, mga tugang, urog pa nindong gibuhon an saindong pinakamakakaya tanganing masiyerto nindo an pag-apod asin pagpili sa saindo, huli ta kun padagos nindong ginigibo an mga bagay na ini, dai nanggad kamo masusudya. 11 Sa katunayan, sa paaging ini bebendisyunan kamo nin mamuraway na paglaog sa daing sagkod na Kahadian kan satuyang Kagurangnan asin Paraligtas na si Jesu-Cristo. 12 Sa dahilan na iyan, buot ko na pirmi kamong pagirumdumon kan mga bagay na ini, maski ngani aram na nindo iyan asin masarig na an pundasyon nindo sa katotoohan na yaon sa saindo. 13 Alagad iniisip ko na sagkod na yaon pa ako sa tabernakulong ini, tama sanang pukawon ko kamo paagi sa mga pagirumdom, 14 huling aram ko na an sakuyang tabernakulo madali nang halion, siring kan lininaw man sa sako kan satuyang Kagurangnan na Jesu-Cristo. 15 Danay kong gigibuhon an sakong pinakamakakaya tanganing pag huminali na ako, magirumduman nindo an mga bagay na ini.