Mga Reperensiya Para sa Workbook sa Pagtiripon na Pamumuhay Asin Ministeryo
NOBYEMBRE 4-10
KAYAMANAN NA YAON SA TATARAMON NIN DIYOS | 1 JUAN 1-5
“Dai Kamo Mamuot sa Kinaban o sa mga Bagay na Yaon sa Kinaban”
(1 Juan 2:15, 16) Dai kamo mamuot sa kinaban o sa mga bagay na yaon sa kinaban. Kun an siisay man namumuot sa kinaban, an pagkamuot sa Ama mayo sa saiya; 16 huli ta an gabos na yaon sa kinaban—an kamawutan kan laman asin an kamawutan kan mga mata saka an pagpasikat nin saro kan mga bagay na igwa siya—bakong gikan sa Ama, kundi gikan sa kinaban.
Pangaptan an Arogan na Itinao ni Jesus
13 Tibaad mangatanosan an iba na bakong gabos na nasa kinaban sala. Dawa siring, an kinaban asin an mga pan-akit kaiyan madaling ikarayo an satong atension sa paglilingkod ki Jehova. Asin mayong iinaalok an kinaban na may katuyohan na orog kitang irani sa Dios. Huli kaini, kun namomotan ta na an mga bagay na nasa kinaban, dawa an mga bagay na tibaad bako man talagang sala, namemeligro kita. (1 Timoteo 6:9, 10) Apuera kaini, an kadaklan na bagay sa kinaban talagang maraot asin puedeng makaraot sa sato. Kun nagdadalan kita nin mga pelikula o mga programa sa telebisyon na nagtatampok nin kadahasan, materyalismo, o seksuwal na inmoralidad, an mga bagay na iyan magigin puede sa sato—dangan magigin sugot sa sato. Kun nakikiasosyar kita sa mga tawo na an pangenot na interes iyo an pagpaasenso sa saindang estilo nin pamumuhay o pagpaoswag sa mga oportunidad sa negosyo, an mga bagay na iyan magigin naman may pangenot na halaga sa sato.—Mateo 6:24; 1 Corinto 15:33.
(1 Juan 2:17) Siring man, an kinaban mapapara pati na an kamawutan kaiyan, alagad an saro na naggigibo kan kabutan nin Diyos magdadanay sagkod lamang.
Pakaisipon Kun Anong Klaseng Tawo Kamo Dapat na Magin
18 An saro pang bagay na makakatabang sa sato na malabanan an “mga bagay na nasa kinaban” iyo an paggirumdom sa ipinasabong na mga tataramon ni Juan: ‘An kinaban naagi sana asin an saiyang mga hurot [o mawot]; alagad an naggigibo kan buot nin Diyos nagdadanay sagkod lamang.’ (1 Juan 2:17) An sistema ni Satanas garo baga permanente asin tunay. Pero, maabot an panahon na matatapos iyan. Mayo nin permanente sa gabos na iinaalok kan kinaban ni Satanas. Kun gigirumdumon niyato an katunayan na iyan, matatabangan kita na dai madara kan mga pang-akit kan Diyablo.
Maghanap nin Espirituwal na Kayamanan
(1 Juan 2:7, 8) Mga namumutan, sinusuratan ko kamo, bako nin sarong bagong tugon, kundi nin sarong haloy nang tugon na yaon na sa saindo puon pa sa kapinunan. An haloy nang tugon na ini iyo an tataramon na nadangog nindo. 8 Sa giraray, sinusuratan ko kamo nin tugon na siring sa sarong bagong tugon, asin an tugon na iyan parehong nagin totoo sa saiya asin sa saindo, huli ta an kadikluman pawara na asin an tunay na ilaw nagliliwanag na.
Mapagtitiwalaan an mga Pagirumdom ni Jehova
14 An Kristiyanong Griegong Kasuratan kadakul nin pagirumdom dapit sa kun paano niyato ipapahiling an pagkamuot sa lambang saro. Sinabi ni Jesus na an ikaduwang pinakanangungurog na tugon iyo an ‘mamutan mo an saimong kataid [o kapwa] siring sa saimo man sana.’ (Mat. 22:39) Si Santiago, na tugang ni Jesus sa ina, inapod man an pagkamuot na “sa hading ley,” o nangungurog na ley. (Sant. 2:8, NW) Si apostol Juan nagsurat: ‘Mga namumutan, dai ako nagsusurat sa saindo nin bagong tugon, kundi sarong daan na tugon na kinamtan nindo magpuon sa kapinunan.’ (1 Juan 2:7, 8) Sa ano nanunungod an sinabi ni Juan na ‘daan na tugon’? An sinasabi niya iyo an tugon na mamuot. Iyan “daan,” o luma, sa sentido na iyan itinao ni Jesus ‘magpuon sa kapinunan,’ o mga dekada na an nakaagi. Pero iyan ‘bago’ man huling naghahagad iyan nin mapagsakripisyong pagkamuot, na tibaad kaipuhan na ipahiling kan mga disipulo sa pag-atubang nin bagong mga kamugtakan. Bilang mga disipulo ni Cristo, bako daw na pinapahalagahan ta an mga patanid na nakakatabang sa sato na dai magkaigwa nin makasadiring espiritu na lakop na marhay sa kinaban, na puwedeng makapalipot kan satong pagkamuot sa kapwa?
(1 Juan 5:16, 17) Kun mahiling nin saro an saiyang tugang na may ginigibong kasalan na bako man maninigo sa kagadanan, dapat niya siyang ipamibi, asin tatawan siya nin Diyos nin buhay. Iyo, para ini sa mga tawong an kasalan bako man maninigo sa kagadanan. Igwa kaya nin kasalan na maninigo sa kagadanan. Dai ko sinasabi sa saro na ipamibi an tawong guminibo nin arog kaiyan na kasalan. 17 An gabos na gibong bakong matanos kasalan, alagad ta igwa nin kasalan na bako man maninigo sa kagadanan.
it-1 862 ¶5
Kapatawadan
Tama sanang ipamibi na patawadon nin Diyos an iba, dawa ngani an bilog na kongregasyon. Ginibo iyan ni Moises para sa nasyon nin Israel, paagi sa pagtuga kan pagkakasala kan nasyon asin paghagad nin kapatawadan, asin dinangog siya nin may pag-uyon ni Jehova. (Bi 14:19, 20) Siring man, kan idedikar an templo, namibi si Solomon na patawadon ni Jehova an banwaan pag nagkakasala sinda dangan pagkatapos tinatalikdan an sala nindang gibo. (1Ha 8:30, 33-40, 46-52) Si Ezra an nagin representante sa hayagan na pagtuga kan kasalan kan nakabalik na mga Judio. Bilang resulta kan saiyang gikan sa pusong pamibi asin sadol, naghiro an banwaan tanganing mag-ako kan kapatawadan ni Jehova. (Esd 9:13–10:4, 10-19, 44) Dinagka ni Santiago an mga may hilang sa espirituwal na makipag-ulay sa kamagurangan kan kongregasyon para ipamibi siya, asin “kun may nagibo siyang mga kasalan, papatawadon siya.” (San 5:14-16) Pero, igwa nin “kasalan na maninigo sa kagadanan,” an pagkakasala tumang sa banal na espiritu, na tuyong paggibo nin kasalan na diyan mayo nin kapatawadan. An sarong Kristiyano dai puwedeng mamibi para sa saro na nagkakasala nin arog kaiyan.—1Ju 5:16; Mat 12:31; Heb 10:26, 27; hilingon an KASALAN, I; ESPIRITU.
Pagbasa sa Bibliya
(1 Juan 1:1–2:6 ) Sinusuratan niyamo kamo manungod sa saro na nag-eeksister magpuon pa sa kapinunan, na samuyang nadangog, na nahiling kan samuyang mga mata, na napagmasdan mi asin nadutan kan samuyang mga kamot, an saro na may dara kan tataramon na nagtatao nin buhay. 2 (Iyo, an buhay na iyan nahayag, asin nahiling mi asin nagpapatotoo kami saka ibinabareta mi sa saindo an buhay na daing katapusan na naggikan sa Ama asin ihinayag sa samo.) 3 An samuyang nahiling asin nadangog ibinabareta mi man sa saindo, tanganing kamo man magin kasaro mi kun paanong kita gabos kasaro kan Ama asin kan saiyang Aking si Jesu-Cristo. 4 Asin isinusurat mi an mga bagay na ini tanganing an satuyang kaugmahan magin lubos. 5 Ini an mensaheng nadangog mi sa saiya asin ipinapaisi sa saindo: An Diyos liwanag, asin mayo lamang nin kadikluman sa saiya. 6 Kun sasabihon ta, “Kasaro niyato siya,” alagad ta padagos kitang naglalakaw sa kadikluman, nagpuputik kita asin dai niyato isinasabuhay an katotoohan. 7 Pero kun naglalakaw kita sa liwanag kun paanong siya mismo nasa liwanag, kita gabos kasaro kan lambang saro, asin an dugo ni Jesus na saiyang Aki linilinig kita sa gabos na kasalan. 8 Kun sasabihon ta, “Mayo kitang kasalan,” dinadaya niyato an satong sadiri asin an katotoohan mayo sa sato. 9 Kun itinutuga niyato an satong mga kasalan, siya maimbod asin matanos kaya andam siyang patawadon kita sa satong mga kasalan asin linigon kita sa gabos tang maraot na gibo. 10 Kun sasabihon ta, “Dai kita nagkakasala,” ginigibo niyato siyang putikon, asin an saiyang tataramon mayo sa satuya.
2 Mga namumutan kong aki, sinusuratan ko kamo kan mga bagay na ini tanganing dai kamo makagibo nin kasalan. Alagad ta kun makagibo man nin kasalan an siisay man, igwa kita nin paratabang na kaibanan kan Ama, si Jesu-Cristo, na sarong matanos. 2 Asin siya sarong atang para sa satong mga kasalan tanganing makamtan niyato an pabor nin Diyos, pero bako lang para sa satong mga kasalan kundi para man sa mga kasalan kan bilog na kinaban. 3 Asin sa paaging ini napapatunayan niyato sa satong sadiri na midbid niyato siya, kun padagos tang inuutob an saiyang mga tugon. 4 An saro na nagsasabi, “Namimidbid ko siya,” pero dai man nag-uutob kan saiyang mga tugon sarong putikon, asin an katotoohan mayo sa tawong ini. 5 Alagad kun an saro nag-uutob kan saiyang tataramon, nahihiling sa tawong iyan an lubos na pagkamuot sa Diyos. Sa arog man kaiyan na paagi niyato maipapahiling na kita kasaro niya. 6 An siisay man na nagsasabi na siya nagdadanay na kasaro niya, siya mismo obligadong padagos na maglakaw siring kan paglakaw kan sarong idto.
NOBYEMBRE 11-17
KAYAMANAN NA YAON SA TATARAMON NIN DIYOS | 2 JUAN 1–JUDAS
“Dapat Kitang Makipaglaban Para Makapagdanay sa Katotoohan”
(Judas 3) Mga namumutan, hininguwa ko kutana na suratan kamo manungod sa kaligtasan na pinangangaptan niyato gabos, alagad ngunyan nahiling ko na kaipuhan ko kamong suratan tanganing dagkahon kamo na makipaglaban nin maigot para sa pagtubod na itinao sa mga banal nin saro sanang beses para sa gabos na panahon.
“Padagos Kamong Magkaigwa nin Kosog sa Kagurangnan”
8 Bako kitang ignorante sa mga pakana ni Satanas huli ta ihinahayag kan Kasuratan an saiyang pundamental na mga taktika. (2 Corinto 2:11) Tumang sa matanos na tawong si Job, an Diablo naggamit nin grabeng mga problema sa pagbuhay, pagkagadan nin mga namomotan, pagtumang nin kapamilya, pisikal na pagdusa, asin daing basehan na pagkritika nin falsong mga katood. Si Job nagmondo nin makuri asin nagsaboot na binayaan na sia nin Dios. (Job 10:1, 2) Minsan ngani tibaad dai man direktang gamiton ni Satanas an mga problemang ini ngonyan, an siring na mga kasakitan talagang nakakaapektar sa dakol na Kristiano, asin puede iyan na aprobetsaran kan Diablo.
9 An espirituwal na mga peligro marikas na duminakol sa panahon na ini kan katapusan. Nabubuhay kita sa sarong kinaban na dian an espirituwal na mga pasohan nasasalidahan kan materyal na mga pinag-aaabot. Daing ontok na ipinapaheling kan media an bawal na sekso bilang gikanan nin kaogmahan imbes na kamondoan. Asin an mayoriya nagin “mga mamomoton sa kasingawan imbes na mga mamomoton sa Dios.” (2 Timoteo 3:1-5) Puedeng isapeligro kan kaisipan na ini an satong espirituwal na pagkatimbang kun dai kita ‘makikipaglaban nin maigot para sa pagtubod.’—Judas 3.
Maghanap nin Espirituwal na Kayamanan
(Judas 4) An sakong dahilan iyo na may mga tawo na pasekretong nakalusot diyan sa saindo, na kaidto pa ipinahayag kan Kasuratan na nakatalaga sa paghukom na ini; sinda mga tawong bakong diyosnon na idinadahilan an daing kapantay na kabuutan kan satuyang Diyos para sa daing pakundangan na paggawi asin dai nagigin maimbod sa solamenteng kagsadiri sa sato asin Kagurangnan niyato, si Jesu-Cristo.
(Judas 12) An mga ini garo mga gapong nakatago sa irarom nin tubig mantang nagkakakan na kairiba nindo sa mga bangketeng ginigibo nindo bilang pagpahiling nin pagkamuot. Sinda mga pastor na daing supog na nagpapakabasog; mga panganuron na daing darang uran asin pigpapalid-palid kan duros; mga dai nagbubungang puon nin kahoy sa paghinanapos kan tigrakdag, na duwang beses na nagadan asin ginabot na;
it-2 279
Bangketeng Ginigibo Bilang Pagpahiling nin Pagkamuot
Dai ilinadawan kan Bibliya an mga bangketeng ini ni sinambit kun gurano kaparati iyan ginigibo. (Jud 12) Dai iyan ipinagbuot kan Kagurangnan na Jesu-Cristo o kan saiyang mga apostol, asin malinaw na bakong obligasyon an paggibo kaiyan o kaya permanente. Sinasabi nin nagkapira na mga okasyon ini kun sain an mga Kristiyanong may kaya naghahanda nin mga bangkete na diyan iniimbitaran ninda an saindang tios na mga kapagtubod. An mga ilo, mga babaying balo, an mga mayaman, saka an mga pobre, iribang nagkakarakan nin abunda bilang magturugang.
it-2 816
Gapo
An saro pang Griegong tataramon na spi·lasʹ, malinaw na nanunungod sa sarong gapo o bahura na nakatago sa irarom nin tubig. Ginamit ini ni Judas para iladawan an mga lalaking nakalusot sa Kristiyanong kongregasyon na igwa nin maraot na intensiyon. Kun paanong an nakatagong mga gapo peligro sa mga barko, an mga lalaking ini talagang peligro sa mga tugang sa kongregasyon. Sinabi niya manungod sa mga tawong ini: “An mga ini garo mga gapong nakatago sa irarom nin tubig mantang nagkakakan na kairiba nindo sa mga bangketeng ginigibo nindo bilang pagpahiling nin pagkamuot.”—Jud 12.
(Judas 14, 15) Iyo, si Enoc, na ikapito sa linya puon ki Adan, nagpropesiya man mapadapit sa sainda, kan siya magsabi: “Uya! Si Jehova nag-abot kaibanan an saiyang manampulong ribong banal na mga anghel 15 tanganing isagibo an paghukom sa gabos, asin tanganing patunayan an pagkakasala kan gabos na bakong diyosnon may koneksiyon sa gabos na maraot na bagay na saindang ginibo, asin may koneksiyon sa gabos na nakakapanggirabong bagay na itinaram tumang sa saiya kan mga parakasalang daing paggalang sa Diyos.”
‘Ikinaugma Siyang Marhay nin Diyos’
Ano an ihinula ni Enoc? Arog kaini an pagkasabi kaiyan: “Uya! Si Jehova nag-abot kaibanan an saiyang manampulong ribong banal na mga anghel tanganing isagibo an paghukom sa gabos, asin tanganing patunayan an pagkakasala kan gabos na bakong diyosnon may koneksiyon sa gabos na maraot na bagay na saindang ginibo, asin may koneksiyon sa gabos na nakakapanggirabong bagay na itinaram tumang sa saiya kan mga parakasalang daing paggalang sa Diyos.” (Judas 14, 15) Ngunyan, maririsa nindo digdi na nagtataram si Enoc sa paagi na tapos na an pangyayari, na garo baga inutob na nin Diyos an hula diyan. Inarog an paaging iyan nin pagsurat kan dakul na suminunod na mga hula. An ideya iyo ini: An propeta nagtataram sa paagi na sigurado siyang mangyayari iyan, kaya sinabi niya iyan sa paaging garo nangyari na!—Isaias 46:10.
‘Ikinaugma Siyang Marhay nin Diyos’
An pagtubod ni Enoc puwedeng magpahiro sato na siyasaton an satong sadiri kun baga an paghiling ta sa kinaban na kinabubuhayan ta kapareho kan paghiling diyan nin Diyos. An paghukom na kusog-buot na ipinahayag ni Enoc kan panahon niya aplikado pa sagkod ngunyan. Kauyon kan patanid ni Enoc, linaglag ni Jehova an maraot na kinaban kan panahon ni Noe paagi sa makasaysayan na Delubyo. An paglaglag na idto magigin kaagid kan mas grabeng paglaglag na mangyayari sa maabot na panahon. (Mateo 24:38, 39; 2 Pedro 2:4-6) Arog kaidto, handa na man ngunyan an Diyos kaiba an manampulong ribong banal na mga anghel para ipaabot an makatanusan na paghukom sa maraot na kinaban. Dapat na isapuso kan lambang saro sato an patanid ni Enoc asin ipaabot man iyan sa iba. Puwedeng dai magtubod diyan an satong mga kapamilya asin amigo. Tibaad may panahon na mamatian tang nagsosolo kita. Pero dai nuarin man pinabayaan ni Jehova si Enoc; dai man niya papabayaan an maimbod na mga lingkod niya ngunyan!
Pagbasa sa Bibliya
(2 Juan 1-13) Hali sa gurang na lalaki, para sa babaying pinili asin sa saiyang mga aki, na tunay kong namumutan, asin bako lang ako kundi pati man kan gabos na nakaaram kan katotoohan. 2 Namumutan mi kamo huli kan katotoohan na nagdadanay sa sato asin na mapapasato sagkod lamang. 3 Mag-aako kita nin daing kapantay na kabuutan, nin pagkahirak, saka nin katuninungan hali sa Diyos na Ama asin hali ki Jesu-Cristo na Aki kan Ama, asin kaiba kaiyan mag-aako kita nin katotoohan asin pagkamuot. 4 Nag-uugma akong marhay huling naisihan ko an manungod sa nagkapira mong aki na naglalakaw sa katotoohan, kauyon kan tugon na inako niyato hali sa Ama. 5 Kaya ngunyan nakikiulay ako sa saimo, ginagalangan na babayi, na kamutan niyato an lambang saro. (Sinusuratan taka, bako nin sarong bagong tugon, kundi nin sarong tugon na yaon na sa sato puon pa sa kapinunan.) 6 Asin iyo ini an kahulugan nin pagkamuot, na kita padagos na maglakaw kauyon kan saiyang mga tugon. Siring kan nadangog na nindo sa kapinunan, an saiyang tugon iyo na padagos kamong maglakaw sa pagkamuot. 7 Huli ta dakul na paradaya an nagralataw sa kinaban, idtong mga dai minimidbid na si Jesu-Cristo nagdatong bilang tawo. Iyo ini an paradaya asin an anticristo. 8 Mag-ingat kamo, na sa siring dai nindo maiwara an mga bagay na pinagmaigutan ming maisagibo, kundi na makamtan nindo nin lubos an saindong balos. 9 An siisay man na minalampas sa katukduan kan Cristo asin dai nagdadanay diyan mayo kan pag-uyon kan Diyos. An nagdadanay sa katukduan na ini iyo an saro na igwa kan pag-uyon kan Ama pati kan Aki. 10 Kun an siisay man magdiyan sa saindo asin dai niya dara an katukduan na ini, dai nindo siya pag-akuon sa saindong harong o pagkumustahon. 11 Huli ta an saro na nagsasabi nin pangungumusta sa saiya nagigin kadamay niya sa saiyang maraot na mga gibo. 12 Minsan ngani dakul na bagay pa akong gustong isurat sa saindo, habo kong ipaagi iyan sa papel asin tinta, kundi naglalaom akong makadiyan sa saindo asin makaulay kamo nin personal, tanganing an saindong kaugmahan magin lubos. 13 An mga aki kan tugang mong babayi, an saro na pinili, nagpapaabot sa saimo kan saindang pangungumusta.
NOBYEMBRE 18-24
KAYAMANAN NA YAON SA TATARAMON NIN DIYOS | KAPAHAYAGAN 1-3
“Aram Ko an Saimong mga Gibo”
(Kapahayagan 1:20) Kun manungod sa sagradong hilom kan pitong bituon na nahiling mo sa tuong kamot ko asin sa sagradong hilom kan pitong kandelerong bulawan: An pitong bituon nagrerepresentar sa mga anghel kan pitong kongregasyon, asin an pitong kandelero nagrerepresentar sa pitong kongregasyon.
Anong Klaseng Espiritu an Ipinapahiling Mo?
8 Tanganing malikayan an arog kaiyan na espiritu, puede tang girumdomon na sa Biblia si Jesus ilinaladawan na igwa “sa saiyang toong kamot nin pitong bitoon.” An mga “bitoon” nagrerepresentar sa linahidan na mga paraataman asin puede man na ipanongod sa gabos na paraataman sa mga kongregasyon. Kayang direhiran ni Jesus an mga “bitoon” na nasa kamot nia sa ano man na paagi na nahihiling niang tama. (Kap. 1:16, 20) Huli kaini, bilang Payo kan Kristianong kongregasyon, lubos na kontrolado ni Jesus an mga grupo nin kamagurangan. Kun an saro sa grupo nangangaipo nanggad nin pagtatanos, seseguradohon kan Saro na may ‘mga mata siring sa laad nin kalayo’ na magigibo iyan segun sa Saiya mismong itinalaan na panahon asin paagi. (Kap. 1:14) Para mientras, pinapagdanay niato an angay na paggalang sa mga ninombrahan kan banal na espiritu, huling si Pablo nagsurat: ‘Kuyoga nindo an mga namomoon saindo asin pumasakop kamo sainda, huli ta sinda nagpupuka dahil kan saindong mga kalag siring kan mga magtatao nin kahusayan; tanganing gibohon ninda iyan sa kaogmahan asin bakong sa kamondoan, huli ta sa siring dai kamong pakikinabangon.’—Heb. 13:17.
(Kapahayagan 2:1, 2) “Sa anghel kan kongregasyon sa Efeso isurat mo: Ini an mga bagay na sinabi kan saro na may kapot kan pitong bituon sa saiyang tuong kamot asin na naglalakaw sa tahaw kan pitong kandelerong bulawan: 2 ‘Aram ko an saimong mga gibo, asin an saimong pagpapagal saka pagtagal, asin aram ko na dai mo kayang kunsintihon an maraot na mga tawo, asin na binabalo mo idtong mga nagsasabi na sinda mga apostol pero bako man, asin napatunayan mong mga putikon sinda.
Iniingatan Kita ni Jehova Para sa Kaligtasan
11 Sa bisyon sa Kapahayagan kapitulo 2 asin 3, sinisiyasat kan pinamuraway na si Jesu-Cristo an pitong kongregasyon sa Asia Minor. An bisyon naghahayag na naheheling ni Cristo bako sana an pangkagabsan na situwasyon kundi pati an espesipikong mga situwasyon. Sa nagkapirang pangyayari, nagsambit pa ngani sia nin mga indibiduwal, asin sa kada kamugtakan, nagtao sia nin angay na komendasyon o konseho. Ano an ipinaparisa kaini? Sa kaotoban kan bisyon, an pitong kongregasyon nagrerepresentar sa linahidan na mga Kristiano pagkatapos kan 1914, asin an konseho sa pitong kongregasyon minaaplikar sa gabos na kongregasyon kan banwaan nin Dios ngonyan sa bilog na daga. Sa siring, angay na magkongklusyon na aktibong ginigiyahan ni Jehova an banwaan nia paagi sa saiyang Aki. Paano kita makikinabang sa paggiyang iyan?
Danay na Makidungan sa Organisasyon ni Jehova
20 An danay na pakikidungan sa progresibong organisasyon ni Jehova naghahagad na rekonoseron niato an iinasignar nin Dios na papel ni Jesu-Cristo bilang “payo kan kongregasyon.” (Efeso 5:22, 23) Mahalaga man na mangnohon an Isaias 55:4, na dian sinasabihan kita: “Uya! Bilang saksi sa mga nasyon sia itinao ko [Jehova], bilang namomoon asin komandante sa mga nasyon.” Sierto nanggad na aram ni Jesus kun paano mangenot. Midbid man nia an saiyang mga karnero asin an saindang mga gibo. Sa katunayan, kan siyasaton nia an pitong kongregasyon sa Asia Minor, limang beses na sinabi nia: “Aram ko an saimong mga gibo.” (Kapahayagan 2:2, 19; 3:1, 8, 15) Aram man ni Jesus an satong mga kaipuhan, siring kan saiyang Ama, si Jehova. Bago itinao an Modelong Pamibi, sinabi ni Jesus: “Aram na nin Dios na saindong Ama an mga kaipuhan nindo bago pa nindo iyan hagadon sa saiya.”—Mateo 6:8-13.
Maghanap nin Espirituwal na Kayamanan
(Kapahayagan 1:7) Uya! Siya madatong na nasa mga panganuron, asin an lambang mata makakahiling sa saiya, pati idtong mga nagtusok sa saiya; asin tuturubtubon kan gabos na tribo sa daga an saindang daghan sa kamunduan nin huli sa saiya. Iyo, mangyayari nanggad ini. Amen.
Hahalion kan Kahadian nin Diyos an mga Kaiwal Kaiyan
10 Kapahayagan nin paghukom. Sa panahon na iyan, mapipiritan an gabos na kaiwal kan Kahadian nin Diyos na mahiling an pangyayari na urog pang magpapasakit sa sainda. Sinabi ni Jesus: ‘Mahihiling ninda an Aki nin tawo na nagdadatong sa mga panganuron, na may kapangyarihan asin kamurawayan.’ (Mar. 13:26) An pagpahiling na ini nin kapangyarihan magigin tanda na nagdatong na si Jesus para ipahayag an paghukom. Sa saro pang kabtang kan hulang ini dapit sa huring mga aldaw, nagtao siya nin dugang pang mga detalye manungod sa paghukom na ipapahayag sa panahon na iyan. Yaon iyan sa parabula dapit sa mga karnero asin kanding. (Basahon an Mateo 25:31-33, 46.) An maimbod na mga nagsusuportar sa Kahadian nin Diyos ipapahayag na ‘mga karnero’ asin ‘ititingag ninda an saindang payo,’ sa pakaaram na ‘an pagtubos sa sainda harani na.’ (Luc. 21:28) Minsan siring, an mga nagkokontra sa Kahadian huhukuman bilang ‘mga kanding’ asin tutubtubon an sadiri huli sa ‘pagmundo,’ sa pakaaram na naghahalat sa sainda an pagpuho o ‘silot na daing katapusan.’—Mat. 24:30; Kap. 1:7.
(Kapahayagan 2:7) An may talinga magdangog sa sinasabi kan espiritu sa mga kongregasyon: Sa siisay man na makakadaog, tutugutan ko siya na kumakan sa kahoy nin buhay, na yaon sa paraiso nin Diyos.’
Tampok na mga Kabtang sa Libro nin Kapahayagan—I
2:7—Ano an “paraiso nin Dios”? Huling para sa linahidan na mga Kristiano an mga tataramon na ini, an paraiso na sinasabi digdi siertong nanonongod sa arog-paraisong langitnon na rona—an mismong presensia nin Dios. Babalosan an maimbod na mga linahidan paagi sa pagkakan sa “kahoy nin buhay.” Mag-aako sinda nin imortalidad.—1 Cor. 15:53.
Pagbasa sa Bibliya
(Kapahayagan 1:1-11) Sarong kapahayagan ni Jesu-Cristo, na itinao nin Diyos sa saiya, tanganing ipahiling sa mga uripon niya an mga bagay na madali nang mangyari. Asin isinugo niya an saiyang anghel tanganing ipresentar iyan paagi sa mga tanda sa saiyang uripon na si Juan, 2 na nagpatotoo mapadapit sa mensaheng itinao nin Diyos asin sa patotoong itinao ni Jesu-Cristo, iyo, mapadapit sa gabos na bagay na nahiling niya. 3 Maugma an nagbabasa nin makusog asin idtong mga nagdadangog sa mga tataramon kan propesiyang ini saka nag-uutob kan mga bagay na nakasurat digdi, huli ta an itinalaan na panahon harani na. 4 Hali ki Juan, para sa pitong kongregasyon na nasa probinsiya nin Asia: Mapasaindo an daing kapantay na kabuutan asin katuninungan hali sa “Saro na iyo ngunyan asin iyo kaidto asin iyo an madatong,” asin hali sa pitong espiritu na nasa atubangan kan saiyang trono, 5 saka hali ki Jesu-Cristo, “an Maimbod na Saksi,” “an panganay hali sa mga gadan,” asin “an Tagapamahala kan mga hadi sa daga.” Sa saiya na namumuot sa sato asin nagpatalingkas sa sato sa mga kasalan niyato paagi kan saiyang sadiring dugo—6 asin ginibo niya kita na magin sarong kahadian, mga saserdote kan saiyang Diyos asin Ama—iyo, mapasaiya an kamurawayan asin an kakusugan sagkod lamang. Amen. 7 Uya! Siya madatong na nasa mga panganuron, asin an lambang mata makakahiling sa saiya, pati idtong mga nagtusok sa saiya; asin tuturubtubon kan gabos na tribo sa daga an saindang daghan sa kamunduan nin huli sa saiya. Iyo, mangyayari nanggad ini. Amen. 8 “Ako an Alpha asin an Omega,” an sabi kan Diyos na Jehova, “an Saro na iyo ngunyan asin iyo kaidto asin iyo an madatong, an Makakamhan sa Gabos.” 9 Ako, si Juan, na saindong tugang asin kapareho nindong nagsasakit asin nagtatagal saka makakaibanan nindo sa kahadian bilang kasaro ni Jesus, dinara sa isla na inaapod Patmos dahil sa pagpahayag ko manungod sa Diyos asin pagpatotoo mapadapit ki Jesus. 10 Paagi sa pagpasabong, dinara ako sa aldaw kan Kagurangnan, asin may nadangog ako sa likudan ko na sarong makusog na boses na siring sa tanog nin trumpeta, 11 na nagsasabi: “An saimong nahihiling, isurat mo sa sarong rolyo nin kasuratan asin ipadara mo sa pitong kongregasyon: sa Efeso, sa Esmirna, sa Pergamo, sa Tiatira, sa Sardis, sa Filadelfia, asin sa Laodicea.”
NOBYEMBRE 25–DISYEMBRE 1
KAYAMANAN NA YAON SA TATARAMON NIN DIYOS | KAPAHAYAGAN 4-6
“An Pangangabayo kan Apat na Parakabayo”
(Kapahayagan 6:2) Asin uya! nahiling ko an sarong puting kabayo, asin an nakasakay diyan igwa nin pana; asin sarong korona an itinao sa saiya, asin luminuwas siya tanganing mandaog saka tanganing lubuson an saiyang pandadaog.
An Apat na Parakabayo—Siisay Sinda?
Siisay an nakasakay sa puting kabayo? Maaaraman an simbag sa iyo man sanang libro kan Bibliya, an Kapahayagan, na kan huri inapod an nakasakay na ini na hali sa langit bilang “An Tataramon nin Diyos.” (Kapahayagan 19:11-13) An titulong “An Tataramon” nanunungod ki Jesu-Cristo, huling siya an tagapagtaram nin Diyos. (Juan 1:1, 14) Inapod man siyang “Hadi nin mga hadi asin Kagurangnan nin mga kagurangnan” saka “Maimbod asin Totoo.” (Kapahayagan 19:16) Malinaw nanggad, may awtoridad siyang humiro bilang parapakilaban na hadi, asin dai niya ginagamit an saiyang kapangyarihan sa maraot o maringis na paagi. Pero, may mga hapot na dapat masimbag.
wp17.3 4 ¶5
An Apat na Parakabayo—Siisay Sinda?
Kasuarin sinda nagpuon na mangabayo? Mangnuhon na an inot na parakabayo, si Jesus, nagpuon na mangabayo kan koronahan siya bilang Hadi sa langit. (Kapahayagan 6:2) Kasuarin iyan nangyari? Bako iyan kan panahon na nagbalik siya giraray sa langit pagkagadan niya. Ipinapahiling kan Bibliya na nagkaigwa nguna nin panahon nin paghalat bago siya koronahan. (Hebreo 10:12, 13) Sinabi ni Jesus sa saiyang mga parasunod an magigin tanda kan katapusan kan panahon nin paghalat asin kan kapinunan kan pamamahala niya sa langit. Sinabi niya na sa kapinunan kan saiyang pamamahala, magigin mas maraot an kamugtakan kan kinaban. Magkakaigwa nin giyera, grabeng gutom, asin epidemya. (Mateo 24:3, 7; Lucas 21:10, 11) Dai nahaloy pagpuon kan Giyera Mundiyal I kan 1914, nagin risang-risa na an katawuhan yaon na sa panahon na iyan, an maribok na panahon sa daga na inaapod kan Bibliya na “huring mga aldaw.”—2 Timoteo 3:1-5.
(Kapahayagan 6:4-6) Saro pang kabayo an luminuwas, asin pula an kulor kaini, asin an nakasakay diyan tinawan nin awtoridad na halion an katuninungan sa daga na sa siring maggaradanan sinda, asin sarong dakulang espada an itinao sa saiya. 5 Kan buksan niya an ikatulong selyo, nadangog ko an ikatulong buhay na linalang na nagsabi: “Madya!” Asin uya! nahiling ko an sarong itom na kabayo, asin an nakasakay diyan igwa nin timbangan sa saiyang kamot. 6 Nadangog ko an garo sarong boses sa tahaw kan apat na buhay na linalang na nagsabi: “Sarong takad nin trigo sa kantidad na sarong denario asin tulong takad nin sebada sa kantidad na sarong denario; asin dai mo pagsayangon an lanang oliba saka an arak.”
An Apat na Parakabayo—Siisay Sinda?
An parakabayong ini nagrerepresentar sa giyera. Mangnuhon na hinali kaini an katuninungan bako lang sa nagkapirang nasyon kundi sa bilog na kinaban. Kan 1914, sa kainot-inuting pangyayari sa kasaysayan, puminutok an giyera na nakaapektar sa bilog na kinaban. Sinundan iyan kan mas mapanglaglag na ikaduwang giyera mundiyal. Kinakarkulo na puon kan 1914, mga labing 100 na milyon an nagkagaradan huli sa mga giyera asin mga engkuwentro! Apuwera diyan, nairidong marhay an dakul na iba pang indibidwal.
wp17.3 5 ¶4-5
An Apat na Parakabayo—Siisay Sinda?
“Uya! nahiling ko an sarong itom na kabayo, asin an nakasakay diyan igwa nin timbangan sa saiyang kamot. Nadangog ko an garo sarong boses sa tahaw kan apat na buhay na linalang na nagsabi: ‘Sarong takad nin trigo sa kantidad na sarong denario asin tulong takad nin sebada sa kantidad na sarong denario; asin dai mo pagsayangon an lanang oliba saka an arak.’”—Kapahayagan 6:5, 6.
An parakabayong ini nagrerepresentar sa tiggutom. Ilinaladawan digdi an grabeng kakulangan nin suplay nin kakanon na an sarong takad nin trigo nagkakantidad nin sarong denario, an sarong aldaw na tangdan kaidtong inot na siglo! (Mateo 20:2) Sa kantidad man na iyan makakabakal nin tulong takad na sebada, na mas hababang klase kisa sa trigo. Sa sarong dakulang pamilya, sagkod sa pirang aldaw sana daw iyan? Kaya, pinatanidan an mga tawo na magtipid maski idtong simpleng kakanon sa aroaldaw, arog kan lanang oliba asin arak na komun na kakanon kaidto kan mga Israelita.
(Kapahayagan 6:8) Asin uya! nahiling ko an sarong malungsing kabayo, asin an nakasakay diyan igwa nin pangaran na Kagadanan. Asin an Lulubngan nagsusunod sa likudan niya. Asin tinawan sinda nin awtoridad sa ikaapat na kabtang kan daga, tanganing gumadan paagi sa halabang espada asin paagi sa grabeng gutom asin paagi sa nakakagadan na epidemya saka paagi sa mababangis na hayop sa daga.
wp17.3 5 ¶8-10
An Apat na Parakabayo—Siisay Sinda?
An ikaapat na parakabayo nagrerepresentar sa kagadanan huli sa epidemya asin iba pang dahilan. Dai nahaloy pakalihis kan 1914, manampulong milyon an nagadan sa trangkaso Española. Posibleng mga 500 na milyon an nagkahilang, mga saro sa kada tulong tawo kaidto!
Pero, may suminunod pa sa trangkaso Española. Kinakarkulo kan mga eksperto na ginatos na milyon an nagadan sa smallpox kan ika-20 siglo. Sagkod ngunyan, minilyon an nagagadan sa AIDS, tuberkulosis, asin malaria sa ibong kan grabeng paghihinguwa kan mga medical researcher.
Saro sana an resulta—kagadanan. Baga man iyan huli sa giyera, tiggutom, o epidemya. Daing pundo an Lulubngan sa pangungulekta nin mga biktima, na mayong itinataong paglaom sa sainda.
Maghanap nin Espirituwal na Kayamanan
(Kapahayagan 4:4) Sa palibot kan trono igwa nin 24 trono, asin sa mga tronong ini nahiling kong nakatukaw an 24 magurang na lalaki na nakasulot nin puting mga bado, asin sa saindang mga payo igwa nin mga koronang bulawan.
(Kapahayagan 4:6) Sa atubangan kan trono igwa nin garo salming na dagat, siring sa kristal. Sa tahaw kun sain yaon an trono, asin sa palibot kan trono, igwa nin apat na buhay na linalang na pano nin mga mata sa atubangan asin likudan.
An Pagigin Kahangahanga kan Langitnon na Trono ni Jehova
8 Aram ni Juan na may mga saserdoteng ninombrahan na maglingkod sa suanoy na tabernakulo. Kaya tibaad napangalas sia kan maheling nia an sunod niang ilinaladawan: “Asin sa palibot kan trono igwa nin beinte kuatrong trono, asin sa mga tronong ini naheling kong nakatukaw an beinte kuatrong kamagurangan na may sulot na puting pan-ibabaw na mga gubing, asin sa saindang payo may mga koronang bulawan.” (Kapahayagan 4:4) Iyo, imbes na mga saserdote, yaon an 24 kamagurangan, na nakatukaw sa trono asin may korona siring sa mga hade. Sairisay an kamagurangan na ini? Daing iba kundi an mga linahidan sa Kristianong kongregasyon, na binuhay liwat asin nasa kamugtakan sa langit na ipinanuga sa sainda ni Jehova. Paano niato iyan naaaraman?
An Pagigin Kahangahanga kan Langitnon na Trono ni Jehova
19 Ano an ilinaladawan kan mga linalang na ini? An sarong bisyon na ibinabareta nin saro pang propeta, si Ezequiel, nakakatabang sato na manompongan an simbag. Si Jehova naheling ni Ezequiel na nakatukaw sa trono sa sarong langitnon na karuwahe, na may kaibang buhay na mga linalang na may mga karakteristiko na kaagid kan mga ilinadawan ni Juan. (Ezequiel 1:5-11, 22-28) Paghaloyhaloy, naheling giraray ni Ezequiel an tronong iyan na nasa karuwahe na may kaibang buhay na mga linalang. Minsan siring, inapod nia ngonyan na mga kerubin an buhay na mga linalang. (Ezequiel 10:9-15) An apat na buhay na linalang na naheling ni Juan seguradong nagrerepresentar sa dakol na kerubin nin Dios—mga linalang na halangkaw an katongdan sa Saiyang espiritung organisasyon. Dai iisipon ni Juan na pambihira an pakaheling nin mga kerubin na haranihon ki Jehova, ta sa tabernakulo kan suanoy, may duwang kerubin na bulawan sa ibabaw kan takop kan kaban nin tipan, na nagrerepresentar sa trono ni Jehova. Hale sa pag-oltanan kan mga kerubin na ini, an tingog ni Jehova nagtao nin mga pagboot sa nasyon.—Exodo 25:22; Salmo 80:1.
(Kapahayagan 5:5) Alagad an saro sa mga magurang na lalaki nagsabi sa sako: “Magpundo ka na sa paghibi. Uya! An Leon kan tribo ni Juda, an gamot ni David, nakadaog kaya angay siyang magbukas kan nakarolyong kasuratan asin kan pitong selyo kaiyan.”
“Uya! An Leon na Gikan sa Tribo ni Juda”
5 An leon parateng ikinokonektar sa kosog nin boot. Napaatubang na daw kamo sa sarong husto na sa edad na lalaking leon? Kun iyo, posibleng marhay na ligtas kamong nakasuway sa hayop na iyan, tibaad paagi sa mga rehas kan saiyang laoman sa sarong zoo. Pero, makangingirhat an siring na eksperyensia. Mantang nakaturuhok kamo sa lalauogon kan dakulaon asin makosog na linalang na ini asin minaturuhok man ini sa saindo, dai nanggad nindo maiisip na madulag man lamang an leon huli sa takot sa ano man na bagay. An Biblia nagtataram manongod sa “leon, na iyo an pinakamakosog sa mga hayop asin dai minatalikod sa atubangan nin siisay man.” (Talinhaga 30:30) Siring kaiyan an kosog nin boot ni Cristo.
6 Pag-olayan niato kun paano si Jesus nagpaheling nin arog sa leon na kosog nin boot sa tolong paagi: sa paninindogan para sa katotoohan, sa pagsuportar sa hustisya, asin sa pag-atubang sa pagtumang. Maheheling man niato na kita gabos—baga man natural na pusoan o bako—puedeng umarog ki Jesus sa pagpaheling nin kosog nin boot.
Pagbasa sa Bibliya
(Kapahayagan 4:1-11) Pagkatapos kaini, uya! nahiling ko an sarong bukas na pinto sa langit, asin an inot na boses na nadangog kong nakipag-ulay sa sako garo tanog nin trumpeta, na nagsasabi: “Magsakat ka digdi, asin ipapahiling ko sa saimo an mga bagay na kaipuhan mangyari.” 2 Dangan tulos akong napasairarom sa kapangyarihan kan espiritu, asin uya! sarong trono an nakapuwesto sa langit, asin igwa nin sarong nakatukaw sa trono. 3 Asin an Saro na nakatukaw igwa nin itsurang nakakaagid sa gapong jaspe asin gapong sardio, asin nakapalibot sa trono an sarong bulalangaw na siring sa esmeralda an itsura. 4 Sa palibot kan trono igwa nin 24 trono, asin sa mga tronong ini nahiling kong nakatukaw an 24 magurang na lalaki na nakasulot nin puting mga bado, asin sa saindang mga payo igwa nin mga koronang bulawan. 5 Igwa akong nahihiling na mga kikilat hali duman sa trono asin nadadangog na mga boses saka mga daguldol hali duman; asin may pitong lampara na naglalaad sa atubangan kan trono, asin an mga ini nagrerepresentar sa pitong espiritu nin Diyos. 6 Sa atubangan kan trono igwa nin garo salming na dagat, siring sa kristal. Sa tahaw kun sain yaon an trono, asin sa palibot kan trono, igwa nin apat na buhay na linalang na pano nin mga mata sa atubangan asin likudan. 7 An inot na buhay na linalang nakakaagid sa leon, asin an ikaduwang buhay na linalang nakakaagid sa torilyong baka, asin an ikatulong buhay na linalang igwa nin lalawgon na nakakaagid sa tawo, asin an ikaapat na buhay na linalang nakakaagid sa naglalayog na agila. 8 Kun manungod sa apat na buhay na linalang, an lambang saro sa sainda igwa nin anom na pakpak; pano nin mga mata an saindang mga pakpak. Asin daing pundo sindang nagpapahayag aldaw asin banggi: “Banal, banal, banal an Diyos na Jehova, an Makakamhan sa Gabos, na iyo kaidto asin iyo ngunyan asin iyo an madatong.” 9 Sa kada beses na an mga buhay na linalang minatao nin kamurawayan asin onra saka pasasalamat sa Saro na nakatukaw sa trono, na iyo an Saro na nabubuhay sagkod nuarin pa man, 10 minasubsob an 24 magurang na lalaki sa atubangan kan Saro na nakatukaw sa trono saka minasamba sinda sa Saro na nabubuhay sagkod nuarin pa man, asin inaapon ninda an saindang mga korona sa atubangan kan trono, na nagsasabi: 11 “Angay ka, Jehova na samuyang Diyos, na mag-ako kan kamurawayan asin kan onra asin kan kapangyarihan, huli ta linalang mo an gabos na bagay, asin huli sa saimong kabutan, sinda nag-eksister asin nalalang.”