Nahihiling Mo Daw an mga Simbag sa Saimong mga Pamibi?

Dakulon nin halimbawa sa Bibliya nin mga pamibi na sinimbag ni Jehova. Pag nahihiling kan mga lingkod nin Diyos kun paano ni Jehova dinangog an saindang personal na mga ikinakahadit asin tinabangan sinda, siguradong napapakusog an saindang pagtubod. Kaya, magayon na magin espesipiko sa satong personal na mga pamibi asin hinguwahon na mahiling kun paano iyan sinisimbag ni Jehova. Tandaan na an saiyang simbag puwedeng iba o labi pa sa hinahagad niyato. (2Co 12:7-9; Efe 3:20) Paano puwedeng simbagon ni Jehova an satong mga kahagadan?

• Pisikal, emosyonal, o espirituwal na kusog para makayanan an sarong problema.—Flp 4:13

• Kadunungan para makagibo nin marahay na desisyon.—San 1:5

• Pagmawot asin kakayahan na humiro.—Flp 2:13

• Katuninungan nin isip pag napupurisaw.—Flp 4:6, 7

• Pisikal o emosyonal na suporta hali sa iba.—1Ju 3:17, 18

• Tabang para sa mga ipinapamibi ta.—Gi 12:5, 11

HILINGON AN VIDEO NA SI JEHOVA AN “PARADANGOG NIN PAMIBI,” DANGAN SIMBAGON AN MINASUNOD NA MGA HAPOT:

• Paano kita napapakusog kan eksperyensiya ni Brother Shimizu kun nalilimitaran kita huli sa mga problema sa salud?

• Paano ta maaarog an halimbawa ni Brother Shimizu?