Sisimbagon Daw ni Jehova an mga Pamibi Ko?

1-2. Taano ta tibaad mamati ta na dai sinisimbag ni Jehova an satong mga pamibi?

“MAGKAIGWA ka nin labi-labing kaugmahan ki Jehova, asin itatao niya an mga minamawot kan saimong puso.” (Sal. 37:4) Magayunon nanggad na panuga! Pero dapat daw na asahan ta na itatao ni Jehova tulos-tulos an ano man na hinahagad ta? Taano ta mahalagang ihapot ta iyan? Pag-isipan an minasunod na mga senaryo. Sarong daing agom na sister an namimibi na lugod makapag-adal siya sa School for Kingdom Evangelizers. Pero mga pirang taon pa an naglihis, dai pa man giraray siya naiimbitaran. Sarong hoben na brother an namimibi ki Jehova na paumayan siya sa malala niyang hilang tanganing mas lubos siyang makapaglingkod sa kongregasyon. Pero dai siya nagrarahay. Ipinapamibi kan Kristiyanong mga magurang na magdanay sa katotoohan an saindang aki. Pero nagdesisyon an aki ninda na magpundo sa paglilingkod ki Jehova.

² Tibaad igwa ka man nin pighahagad ki Jehova pero dai iyan itinatao sa saimo. Kaya tibaad maisip mo na an mga pamibi lugod kan iba pigsisimbag ni Jehova pero an pamibi mo dai. O tibaad maisip mo na may sala kang nagibo. Arog kaiyan an namatian kan sister na si Janice.b Ipinapamibi nindang mag-agom an saindang pagmawot na makapaglingkod sa Bethel. Sinabi niya: “Inisip ko talaga na dai mahahaloy makakalaog kami sa Bethel.” Pero naglihis an mga bulan asin mga taon pa ngani, dai pa man giraray naiimbitaran an mag-agom. Sinabi ni Janice: “Namundo ako saka nahadit. Inisip ko kun ano an ginibo ko na nakapamundo ki Jehova. Ipinamibi ko talagang marhay na makapaglingkod kami sa Bethel. Taano ta dai niya sinisimbag an pamibi ko?”

3. Ano an pag-uulayan ta sa artikulong ini?

³ Kun minsan, tibaad maisip ta kun baga dinadangog ni Jehova an satong mga pamibi. Naihapot man iyan dawa kan maimbod na lalaki kaidto. (Job 30:20; Sal. 22:2; Hab. 1:2) Paano ka makakasigurado na dai binabaliwala ni Jehova an saimong mga pamibi? (Sal. 65:2) Para matabangan kitang masimbag iyan, kaipuhan ta ngunang simbagon an minasunod: (1) Ano an puwede tang asahan na gigibuhon ni Jehova? (2) Ano an inaasahan ni Jehova na gigibuhon ta? (3) Taano ta tibaad kaipuhan tang baguhon an pira sa satong mga ipinapamibi?

ANO AN PUWEDE TANG ASAHAN NA GIGIBUHON NI JEHOVA?

4. Sigun sa Jeremias 29:​12, ano an ipinanuga ni Jehova na gigibuhon niya?

⁴ Nanunuga si Jehova na dadangugon niya an satong mga pamibi. (Basahon an Jeremias 29:12.) Namumutan kan Diyos ta an saiyang maimbod na mga parasamba, kaya dai niya nuarin man binabaliwala an saindang mga pamibi. (Sal. 10:17; 37:28) Minsan siring, dai iyan nangangahulugan na itatao niya an gabos na hagadon ta. Tibaad kaipuhan tang maghalat sagkod sa bagong kinaban para makamtan an pira sa satong mga hinahagad.

5. Ano an kinokonsiderar ni Jehova pag dinadangog niya an satong mga pamibi? Ipaliwanag.

⁵ Kinokonsiderar ni Jehova kun baga an satuyang ipinapamibi kauyon kan saiyang katuyuhan. (Isa. 55:​8, 9) Parte kan katuyuhan na iyan an mapano an daga nin mga tawo na maugmang nagkakasararo asin nagpapasakop sa saiyang pamamahala. Pero hinihingako ni Satanas na mas mapaparahay an mga tawo kun sinda an mamamahala sa saindang sadiri. (Gen. 3:​1-5) Para patunayan na saro iyan na kaputikan, pinabayaan ni Jehova an mga tawo na pamahalaan an saindang sadiri. Alagad, an pamamahala kan tawo nagdara nin dakul na problema na naeeksperyensiyahan ta ngunyan. (Ecl. 8:9) Aram ta na dai pa hahalion ni Jehova ngunyan an gabos na problemang iyan. Kun gigibuhon niya iyan, tibaad isipon kan iba na nagigin mapanggana an pamamahala kan tawo, na kaya kaiyan na solusyunan an mga problema kan katawuhan.

6. Taano ta dapat na magin kumbinsido kita na an gigibuhon ni Jehova pirming mamumuton asin makatanusan?

⁶ Puwedeng simbagon ni Jehova an parehong pamibi sa magkaibang paagi. Halimbawa, kan si Hading Hezekias magkahilang nin grabe, nakimahirak siya ki Jehova na tabangan siyang maumayan. Bilang simbag, pinaumayan siya ni Jehova. (2 Ha. 20:​1-6) Sa ibong na kampi, kan si apostol Pablo makimahirak ki Jehova na halion an saiyang “tunok sa laman,” na posibleng sarong klase nin hilang, dai iyan hinali ni Jehova. (2 Cor. 12:​7-9) Pag-isipan man an halimbawa kan mga apostol na si Santiago asin Pedro. Pareho sindang gustong ipagadan ni Hading Herodes. Ipinamibi kan kongregasyon si Pedro asin posibleng iyo man si Santiago. Minsan siring, naipagadan si Santiago pero si Pedro milagrosong nakaligtas. (Gibo 12:​1-11) Tibaad maisip ta, ‘Taano ta ilinigtas ni Jehova si Pedro pero si Santiago dai?’ Mayong sinasabi an Bibliya.c An masisigurado ta iyo na si Jehova “dai lamang naggigibo nin inhustisya.” (Deu. 32:4) Asin aram ta na si Pedro asin Santiago parehong igwa kan pag-uyon ni Jehova. (Kap. 21:14) Kun minsan, tibaad an paagi kan pagsimbag ni Jehova sa mga pamibi ta iba sa inaasahan ta. Pero huling nagtitiwala kita na an simbag ni Jehova sa satong mga pamibi pirming mamumuton asin makatanusan, dai ta kinukuwestiyon an paagi niya nin pagsimbag sa satong mga pamibi.​—Job 33:13.

7. Ano an linilikayan tang gibuhon, asin taano?

⁷ Linilikayan tang ikumparar an satong sitwasyon sa sitwasyon kan iba. Halimbawa, tibaad hinahagad ta ki Jehova na tabangan kita sa sarong partikular na paagi, pero dai niya iyan itinao. Tapos, naaraman ta na ipinamibi man palan iyan kan iba, asin garo baga sinimbag iyan ni Jehova. Naeksperyensiyahan iyan kan sister na si Anna. Ipinamibi niya na maumayan na sa kanser an agom niyang si Matthew. Dangan, may duwang may edad nang sister na nakikipaglaban man sa kanser. Nagparapamibi si Anna para ki Matthew saka sa duwang sister. Narahay an duwang sister pero si Matthew nagadan. Kan primero, inisip ni Anna na kaya nagrahay su duwang sister huling tinabangan sinda ni Jehova. Ta kun tinabangan sinda ni Jehova, taano ta dai sinimbag an mga pamibi niya na magrahay an saiyang agom? Siyempre, dai ta aram kun paano narahay an duwang sister. An aram ta iyo na si Jehova igwa nin permanenteng solusyon sa gabos tang pagsakit asin gustong-gusto na niyang buhayon liwat an saiyang mga amigo na nagkagaradan na.​—Job 14:15.

8. (a) Uyon sa Isaias 43:​2, paano kita tinatabangan ni Jehova? (b) Paano makakatabang sa sato an pamibi pag nag-aagi kita nin masakit na mga problema? (Hilingon an video na An Pamibi Nakakatabang sa Sato na Makayanan an mga Problema.)

⁸ Si Jehova pirming matabang sa sato. Bilang an satong mamumuton na Ama, habo ni Jehova na mahiling kitang nagsasakit. (Isa. 63:9) Dawa arog kaiyan, dai niya kita ilinilikay sa gabos na problema, na puwedeng iagid sa mga salog o kalayo. (Basahon an Isaias 43:2.) Minsan siring, nangangako siya na tatabangan niya kita na malampasan an mga iyan. Asin dai niya tutugutan na biyo kitang madanyaran kan satong mga problema. Tinatawan man kita ni Jehova kan saiyang makapangyarihan na banal na espiritu para tabangan kita na makatagal. (Luc. 11:13; Fil. 4:13) Kaya, makakapagtiwala kita na pirmi niyang itatao sa sato an talagang kaipuhan ta para makatagal asin magdanay na maimbod sa saiya.d

ANO AN INAASAHAN NI JEHOVA NA GIGIBUHON TA?

9. Kauyon kan Santiago 1:​6, 7, taano ta kaipuhan ta na magtiwala na tatabangan kita ni Jehova?

⁹ Inaasahan ni Jehova na magtitiwala kita sa saiya. (Heb. 11:6) Kun minsan, tibaad garo baga dai ta na kaya an satong mga problema. Tibaad ngani magduda na kita kun baga tatabangan kita ni Jehova. Pero inaasigurar kita kan Bibliya na paagi sa kapangyarihan nin Diyos “an sarong pader kaya [tang] sakaton.” (Sal. 18:29) Kaya imbes na magpadara sa satong mga pagduda, mamibi kita na may bilog na pagtubod, asin nagtitiwala na sisimbagon ni Jehova an satong mga pamibi.​—Basahon an Santiago 1:​6, 7.

10. Magtao nin halimbawa kun paano kita mahiro kauyon kan satong mga pamibi.

¹⁰ Inaasahan ni Jehova na mahiro kita kauyon kan satong mga pamibi. Halimbawa, tibaad namimibi an sarong brother na tabangan siyang maka-leave sa saiyang trabaho para makaatender sa pangrehiyon na kumbensiyon. Paano iyan puwedeng simbagon ni Jehova? Puwede niyang tawan an brother nin kinakaipuhan na kusog nin buot para makapaaram sa saiyang amo. Pero kaipuhan pa man giraray kan brother na magdulok sa saiyang amo tanganing magpaaram. Tibaad kaipuhan niyang pauruutrong makiulay. Tibaad makiribay pa ngani siya nin iskedyul nin trabaho sa katrabaho niya. Asin, kun kinakaipuhan, tibaad makiulay siyang tugutan na mag-leave dawa mayong suweldo.

11. Taano ta dapat na pauruutro tang ipamibi an mga bagay na mahalaga sa sato?

¹¹ Inaasahan ni Jehova na pauruutro tang ipapamibi an mga bagay na mahalaga sa sato. (1 Tes. 5:17) Ipinarisa ni Jesus na may mga hinahagad kita na dai tulos itatao sa sato. (Luc. 11:9) Kaya dai magsuko! Mamibi nin udok asin pauruutro. (Luc. 18:​1-7) Pag padagos tang ipinapamibi an sarong bagay, ipinapahiling ta ki Jehova na talagang mahalaga sa sato an hinahagad ta. Ipinapahiling ta man na nagtutubod kita na kaya niyang tabangan kita.

TAANO TA TIBAAD KAIPUHAN TANG BAGUHON AN PIRA SA SATONG MGA IPINAPAMIBI?

12. (a) Ano an dapat tang ihapot sa satong sadiri manungod sa satong mga ipinapamibi, asin taano? (b) Paano ta masisigurado na an satong mga pamibi nagpapahiling nin paggalang ki Jehova? (Hilingon an kahon na “An mga Hinahagad Ko Daw ki Jehova Nagpapahiling nin Paggalang sa Saiya?”)

¹² Kun dai itinatao sa sato an hinahagad ta sa pamibi, puwede tang ihapot sa satong sadiri an tulong hapot. An inot, ‘Tama daw an ipinapamibi ko?’ Sa parati, iniisip niyato na aram ta kun ano an pinakamarahay para sa sato. Pero an mga ipinapamibi ta tibaad bako man talaga an pinakamarahay. Kun ipinapamibi ta an manungod sa sarong problema, tibaad igwa pa nin mas marahay na solusyon sa problemang iyan kisa sa solusyon na hinahagad ta. Asin an iba sa hinahagad ta tibaad bakong kauyon kan kabutan ni Jehova. (1 Juan 5:14) Halimbawa, pag-isipan an manungod sa mga magurang na sinambit kasubago. Ipinamibi ninda ki Jehova na magdanay sa katotoohan an aki ninda. Garo baga angay man na hagadon iyan. Alagad, dai pipiriton ni Jehova an siisay man sa sato na paglingkudan siya. Gusto niya na gabos kita, pati na an satong mga aki, pilion na sambahon siya. (Deu. 10:​12, 13; 30:​19, 20) Kaya tibaad mas marahay na hagadon kan mga magurang ki Jehova na tabangan sindang maabot an puso kan aki ninda tanganing mapahiro ining kamutan si Jehova asin magin amigo Niya.​—Tal. 22:6; Efe. 6:4.

13. Uyon sa Hebreo 4:​16, nuarin nagtatabang si Jehova? Ipaliwanag.

¹³ An ikaduwang hapot, ‘Para ki Jehova, panahon na daw para simbagon an pamibi ko?’ Tibaad iniisip ta na kaipuhan ta tulos an simbag sa satong mga pamibi. Pero, si Jehova an talagang nakakaaram kun nuarin an pinakamarahay na panahon na magtabang. (Basahon an Hebreo 4:16.) Pag dai tulos itinatao sa sato an hinahagad ta, tibaad isipon tang an simbag ni Jehova ‘Dai.’ Pero puwedeng an simbag niya palan ‘Dai nguna.’ Halimbawa, pag-isipan su hoben na brother na namimibing maumayan sa saiyang hilang. Kun milagroso ining papaumayan ni Jehova, puwedeng magrason si Satanas na kaya sana nagpadagos sa paglilingkod ki Jehova an brother ta pinaumayan ini. (Job 1:​9-11; 2:4) Saro pa, igwa nang itinalaan na panahon si Jehova para paumayan an gabos na klase nin hilang. (Isa. 33:24; Kap. 21:​3, 4) Asin sagkod na dai pa iyan nangyayari, dai kita nag-aasa nin milagrosong mga pagpaumay. Kaya puwedeng hagadon kan brother ki Jehova na tawan siya nin kusog asin katuninungan nin isip para matagalan an hilang niya saka padagos na maimbod na makapaglingkod sa Diyos.​—Sal. 29:11.

14. Ano an nanudan mo sa eksperyensiya ni Janice?

¹⁴ Pag-isipan an eksperyensiya ni Janice na namibi na makapaglingkod sa Bethel. Limang taon an naglihis bago niya nasabutan kun paano sinimbag ni Jehova an pamibi niya. Sinabi niya: “Ginamit ni Jehova an panahon na iyan para tukduan ako asin tabangan na magin mas marahay na Kristiyano. Kinaipuhan kong pakusugon an pagtitiwala sa saiya. Kinaipuhan kong pauswagon an personal study ko. Asin kinaipuhan kong magkaigwa nin panglaog na kaugmahan na dai nakadepende sa sakong kamugtakan.” Pag-abot nin panahon, naimbitaran si Janice asin an saiyang agom na maglingkod sa pansirkitong gibuhon. Nagigirumduman ni Janice: “Sinimbag ni Jehova an mga pamibi ko minsan ngani iba iyan sa paaging inaasahan ko. Dai ko tulos nahiling an marahayon na simbag niya, pero nagpapasalamat ako ta namatian ko an pagkamuot asin kabuutan niya.”

15. Taano ta kun minsan tibaad kaipuhan na daing gayo kita magin espesipiko sa satong mga pamibi? (Hilingon man an mga ritrato.)

¹⁵ An ikatulong hapot, ‘Dapat daw na ipamibi ko an iba pang bagay?’ Dawa ngani marahay na magin espesipiko sa pamibi, puwede tang maaraman kun ano an kabutan ni Jehova para sa sato kun daing gayo kita magigin espesipiko kun minsan sa satong pamibi. Pag-isipan an halimbawa kan sarong daing agom na sister na namimibi na makapag-adal sa School for Kingdom Evangelizers. Gusto niyang mag-SKE para makapaglingkod siya kun sain mas dakula an pangangaipo. Kaya mantang padagos na namimibi na maimbitaran sa paadalan, puwede niya pang hagadon ki Jehova na tabangan siyang makahanap nin iba pang mga oportunidad para mapahiwas an saiyang ministeryo. (Gibo 16:​9, 10) Dangan mahiro siya kauyon kan ipinamibi niya paagi sa paghapot sa saindang paraataman nin sirkito kun may haraning kongregasyon na nangangaipo nin dagdag pang mga payunir. O puwede siyang magsurat sa sarong sangang opisina para maghapot kun sain kaipuhan nin dagdag pang mga parahayag kan Kahadian.e

16. Sa ano kita makakapagtiwala?

¹⁶ Arog kan nanudan ta, makakapagtiwala kita na sisimbagon ni Jehova an satong mga pamibi sa mamumuton asin makatanusan na paagi. (Sal. 4:3; Isa. 30:18) Kun minsan tibaad dai sa sato itao an simbag na inaasahan ta. Pero dai nuarin man babaliwalaon ni Jehova an satong mga pamibi. Namumutan niya kitang marhay. Asin dai niya kita nuarin man babayaan. (Sal. 9:10) Kaya padagos na “magtiwala . . . sa saiya sa gabos na panahon,” na sinasabi sa saiya sa pamibi an laog kan puso mo.​—Sal. 62:8.