ARTIKULONG PAG-AADALAN 21
Kun Paano ni Jehova Sinisimbag an Satong mga Pamibi
“Aram tang makakamtan niyato an mga bagay na hinahagad ta, huling sa saiya ta iyan hinagad.”—1 JUAN 5:15.
KANTA 41 Danguga Tabi an Sakong Pamibi
SUMARYO KAN PAG-AADALANa
1-2. Ano an tibaad maisip ta manungod sa satong mga pamibi?
NAISIP mo na daw kun baga sinisimbag ni Jehova an saimong mga pamibi? Kun iyo, dai ka nagsosolo. Dakul na tugang an nag-iisip man kaiyan, lalo na pag may inaagihan na mga problema. Pag may inaagihan kitang mga kadipisilan, tibaad magin masakit man sa sato na mahiling kun paano ni Jehova sinisimbag an satong mga pamibi.
2 Repasuhon ta kun taano ta makakapagtiwala kita na sinisimbag ni Jehova an mga pamibi kan saiyang mga parasamba. (1 Juan 5:15) Pag-uulayan ta man an mga hapot na ini: Taano ta kun minsan garo baga dai sinisimbag ni Jehova an satong mga pamibi? Sa ngunyan, sa anong mga paagi ni Jehova sinisimbag an mga pamibi?
AN SIMBAG NI JEHOVA PUWEDENG IBA SA INAASAHAN TA
3. Taano ta gusto ni Jehova na mamibi kita sa saiya?
3 Sinisigurado sa sato kan Kasuratan na namumutan kitang marhay ni Jehova asin na mahalaga kita sa saiya. (Hag. 2:7; 1 Juan 4:10) Kaya inaagda niya kita na hagadon sa pamibi an saiyang tabang. (1 Ped. 5:6, 7) Gusto niyang tabangan kita na magdanay na dayupot saiya asin makayanan an mga kasakitan na inaatubang ta.
Sinimbag ni Jehova an mga pamibi ni David paagi sa pagliligtas sa saiya sa mga kaiwal (Hilingon an parapo 4)
4. Taano ta masasabi ta na sinisimbag ni Jehova an mga pamibi kan saiyang mga parasamba? (Hilingon man an ritrato.)
4 Sa Bibliya, parati tang nababasa na sinimbag ni Jehova an mga pamibi kan saiyang mga parasamba. May naiisip ka daw na halimbawa? Naisip mo daw si Hading David? Napaatubang siya sa dakul na peligrosong mga kaiwal sa bilog niyang buhay, asin parati siyang naghahagad nin tabang ki Jehova sa pamibi. Sa sarong pagkakataon, nakimahirak siya: “O Jehova, danguga an pamibi ko; dangugon mo an pakiulay ko nin paghagad nin tabang. Sa saimong kaimbudan asin sa saimong katanusan, simbagon mo ako.” (Sal. 143:1) Sinimbag ni Jehova an mga pamibi ni David na iligtas siya. (1 Sam. 19:10, 18-20; 2 Sam. 5:17-25) May kumpiyansang sinabi ni David: “Harani si Jehova sa gabos na nag-aapod sa saiya.” Puwede man kitang magkaigwa nin arog kaiyan na kumpiyansa.—Sal. 145:18.
Sinimbag ni Jehova an mga pamibi ni Pablo paagi sa pagtao sa saiya nin kusog na kaipuhan niya para makatagal (Hilingon an parapo 5)
5. An mga pamibi daw kan mga parasamba ni Jehova kaidto pirming sinisimbag sa paaging inaasahan ninda? Magtao nin halimbawa. (Hilingon man an ritrato.)
5 Puwedeng dai simbagon ni Jehova an satong mga pamibi sa paaging inaasahan ta. Arog kaiyan an nangyari ki apostol Pablo. Nakiulay siya sa Diyos na halion an “sarong tunok sa laman.” Tulong beses na espesipikong ipinamibi ni Pablo an manungod sa masakit na problemang ini. Sinimbag daw ni Jehova an mga pamibing idto? Iyo, pero bako sa paaging inaasahan ni Pablo. Imbes na halion an problema, tinawan siya ni Jehova nin kusog na kaipuhan niya para padagos na makapaglingkod Saiya nin may kaimbudan.—2 Cor. 12:7-10.
6. Kun minsan, taano ta garo baga dai sinisimbag ni Jehova an satong mga pamibi?
6 Kun minsan, puwedeng simbagon man an satong mga pamibi sa paaging iba sa inaasahan ta. Makakasigurado kita na aram ni Jehova kun ano mismo an tabang na kaipuhan ta. Puwede niya pa nganing “gibuhon an mas lampas pang marhay kisa sa gabos na bagay na puwede tang hagadon o isipon.” (Efe. 3:20) Iyan an dahilan kaya puwede niyang simbagon an satong mga pamibi sa oras o paagi na iba sa inaasahan ta.
7. Taano ta tibaad kaipuhan tang baguhon an hinahagad ta sa pamibi? Magtao nin halimbawa.
7 Tibaad kaipuhan tang baguhan an hinahagad ta sa pamibi mantang mas malinaw tang nasasabutan an kabutan ni Jehova. Pag-isipan an halimbawa ni Martin Poetzinger. Dai nahaloy pagkatapos na ikasal, napreso si Brother Poetzinger sa sarong kampo de-konsentrasyon kan Nazi. Kan inot, hinagad niya ki Jehova na lugod na makaluwas na siya sa kampo de-konsentrasyon tanganing makaibanan niya an saiyang agom asin makapaghulit giraray. Alagad, pakalihis nin duwang semana, mayo siyang nahiling na indikasyon na magibo si Jehova nin paagi para makaluwas siya. Kaya nagpuon siyang mamibi: “Jehova, ipahiling mo tabi sako kun ano an gusto mong gibuhon ko.” Dangan pinunan niyang pag-isipan an manungod sa tinatagalan kan ibang mga tugang sa kampo. Dakul sa sainda an hadit na marhay sa saindang agom asin mga aki. Dangan namibi si Brother Poetzinger: “Jehova, salamat po sa bago kong asignasyon. Tabangan mo po ako na parigunon asin pakusugon an buot kan sakong mga tugang.” Iyan mismo an ginibo niya sa suminunod na siyam na taon niya sa kampo!
8. Ano an mahalagang tandaan ta pag namimibi?
8 Dapat tang tandaan na si Jehova igwa nin katuyuhan, asin uutubon niya iyan sa itinalaan niyang panahon. Kaiba sa katuyuhan na iyan an lubos asin permanenteng paghali kan gabos na problema na nagkakawsa nin grabeng pagsakit sa ngunyan, arog kan mga kalamidad, hilang, asin kagadanan. Uutubon ni Jehova an saiyang katuyuhan paagi kan saiyang Kahadian. (Dan. 2:44; Kap. 21:3, 4) Alagad, sagkod na dai pa iyan nangyayari, tinutugutan ni Jehova si Satanas na mamahala sa kinaban.b (Juan 12:31; Kap. 12:9) Kun sosolusyunan na ni Jehova an mga problema kan katawuhan ngunyan, puwedeng magluwas na garo nagigin mapanggana an pamamahala ni Satanas. Kaya dawa ngani kaipuhan tang maghalat ki Jehova na utubon an saiyang mga panuga, dai buot sabihon na pinapabayaan niya na lang kita na mayong tabang. Pag-ulayan ta an nagkapirang paagi na ginigibo ni Jehova para tabangan kita.
KUN PAANO NI JEHOVA SINISIMBAG AN MGA PAMIBI NGUNYAN
9. Paano kita puwedeng tabangan ni Jehova pag kaipuhan tang gumibo nin mga desisyon? Magtao nin halimbawa.
9 Tinatawan niya kita nin kadunungan. Nanunuga si Jehova na tatawan niya kita nin kadunungan na kaipuhan ta para makagibo nin marahay na mga desisyon. Lalo nang kaipuhan niyato an diyosnon na kadunungan pag naggigibo nin mga desisyon na makakaapekto sa bilog niyatong buhay, arog kan kun baga magdadanay na daing agom o maagom. (Sant. 1:5) Pag-isipan an eksperyensiya kan sarong daraga na an pangaran Maria.c Maugma siyang naglilingkod bilang sarong regular payunir kan mabisto niya an sarong brother. Sinabi niya: “Kan nagigin close kami bilang mag-amigo, lalo man na nagugustuhan mi an kada saro. Aram ko na kaipuhan kong gumibo nin desisyon. Pigparapamibi ko an bagay na iyan. Kaipuhan ko an paggiya ni Jehova, pero aram ko man na dai si Jehova magibo nin desisyon para sako.” Namati niya na sinimbag ni Jehova an mga pamibi niya na tawan siya nin kadunungan. Paano? Mantang nagre-research siya sa satong mga publikasyon, nakahanap siya nin espesipikong mga artikulo na nakatabang sa saiya na masimbag an mga hapot niya. Isinapuso man niya an madunong na sadol kan saiyang maimbod na ina. An sadol na iyan nakatabang ki Maria na mapag-isipan an namamatian niya. Kan huri, nakagibo siya nin madunong na desisyon.
Paano kita tinatawan ni Jehova nin kusog para makatagal? (Hilingon an parapo 10)
10. Uyon sa Filipos 4:13, ano an gigibuhon ni Jehova para tabangan an saiyang mga parasamba? Magtao nin halimbawa. (Hilingon man an ritrato.)
10 Tinatawan niya kita nin kusog para makatagal. Arog kan ginibo ni Jehova para ki apostol Pablo, tatawan niya man kita nin kusog na kaipuhan ta para matagalan an satong mga kasakitan. (Basahon an Filipos 4:13.) Pag-isipan kun paano ni Jehova tinabangan an brother na si Benjamin para matagalan an masakit na mga kamugtakan. Haros bilog na pagigin hoben ni Benjamin, siya saka an saiyang pamilya nag-istar sa mga refugee camp sa Africa. Sinabi ni Benjamin: “Ipinamibi ko pirmi ki Jehova na tawan ako nin kusog na gibuhon kun ano an makakapaugma sa saiya. Sinimbag ni Jehova an mga pamibi ko paagi sa pagtao sako nin matuninong na isip, kusog nin buot para padagos na maghulit, asin mga publikasyon para magdanay na makusog sa espirituwal.” Sinabi pa niya: “An pagbasa kan mga eksperyensiya kan mga tugang asin an pakanuod kun paano sinda tinabangan ni Jehova na magtagal nagpakusog kan determinasyon ko na magdanay na maimbod.”
Naeksperyensiyahan mo na man daw an tabang ni Jehova paagi sa saimong mga kapagtubod? (Hilingon an parapo 11-12)d
11-12. Paano ni Jehova puwedeng gamiton an satong espirituwal na pamilya para simbagon an satong mga pamibi? (Hilingon man an ritrato.)
11 Ginagamit niya an satong espirituwal na pamilya. Kan banggi bago iatang ni Jesus an saiyang buhay, udok siyang namibi. Nakimahirak siya ki Jehova na palibrehon siya sa katuyawan na ibilang kan mga tawo na sarong paralanghad. Imbes na gibuhon iyan, tinabangan ni Jehova si Jesus paagi sa pagsugo kan saro sa saiyang tugang na anghel para pakusugon siya. (Luc. 22:42, 43) Puwede man kitang tabangan ni Jehova paagi sa sarong nakakapakusog na pag-apod o pagdalaw nin sarong tugang. Gabos kita puwedeng maghanap nin mga oportunidad para magtao nin sarong “marahay na tataramon” sa mga kapagtubod.—Tal. 12:25.
12 Pag-isipan an eksperyensiya nin sarong sister na an pangaran Miriam. Mga pirang semana pagkatapos na magadan an saiyang agom, solo na lang si Miriam sa harong, pinangluluyahan nin buot asin mamundo. Sige niyang hibi asin kaipuhan niya nin makakaulay. Sinabi niya: “Mayo na ako nin kusog na mag-apod para makaulay an siisay man, kaya namibi ako ki Jehova. Mantang naghihibi ako asin namimibi, nagtanog an telepono ko. Nag-apod an sarong elder na dayupot kong amigo.” Nag-ako si Miriam nin pagranga hali sa elder na iyan asin sa agom kaini. Kumbinsido siya na ginamit ni Jehova an tugang na ini para mag-apod.
Paano ni Jehova puwedeng pahiruon an iba para tabangan kita? (Hilingon an parapo 13-14)
13. Magtao nin halimbawa kun paano puwedeng gamiton ni Jehova an mga dai nagsasamba sa saiya para simbagon an satong mga pamibi.
13 Puwede niyang gamiton an mga tawong dai nagsasamba saiya. (Tal. 21:1) Kun minsan, sinisimbag ni Jehova an mga pamibi kan mga lingkod niya paagi sa pagpahiro sa mga bakong kapagtubod para magtao nin tabang. Halimbawa, pinahiro niya si Hading Artajerjes na tugutan si Nehemias na bumalik sa Jerusalem para makatabang siya sa pagtugdok liwat kan siyudad. (Neh. 2:3-6) Sa ngunyan, puwede man na pahiruon ni Jehova an mga dai nagsasamba sa saiya para magtao nin tabang na kaipuhan ta.
14. Ano an naapresyar mo sa eksperyensiya ni Soo Hing? (Hilingon man an ritrato.)
14 Namati kan sister na si Soo Hing na tinabangan siya ni Jehova paagi sa saiyang doktor. Nagkaigwa an aki niyang lalaki nin nagkapirang problema sa kamugtakan nin isip. Dangan kan maaksidente an saindang aki, siya saka an saiyang agom nag-resign sa trabaho para asikasuhon an aki ninda. Huli kaiyan, nagkaproblema sinda sa pinansiyal. Sinabi ni Soo Hing na pagmati niya dai niya na kaya na garo siya lastiko na sagad na sa pagkakaignit. Sinabi niya ki Jehova an gabos na nasa puso niya, asin hinagad an saiyang tabang. An saindang doktor naggibo nin paagi para tabangan siya saka an saiyang pamilya. Huli kaiyan, nakaresibi sinda nin asistensiya hali sa gobyerno asin nakakua nin baratong maiistaran. Pagkatapos kaiyan, sinabi ni Soo Hing: “Nahiling mi an pagtabang samo ni Jehova. Siya nanggad an ‘Paradangog nin pamibi.’”—Sal. 65:2.
KAIPUHAN NIN PAGTUBOD PARA MAHILING ASIN AKUON AN SIMBAG NI JEHOVA
15. Ano an nakatabang sa sarong sister para marealisar na sinisimbag an saiyang mga pamibi?
15 Sa parati, an satong mga pamibi dai sinisimbag sa makangangalas na paagi. Pero an mga simbag na naaako ta iyo mismo an kaipuhan ta para magdanay na maimbod sa satong Ama sa langit. Kaya magin alerto sa kun paano ni Jehova sinisimbag an saimong mga pamibi. Pagmati kan sister na si Yoko dai sinisimbag ni Jehova an saiyang mga pamibi, dangan nagpuon siyang maggibo nin lista kan mga hinahagad niya ki Jehova. Mga pirang panahon an naglihis, binalikan niya an mga isinurat niya sa saiyang notebook asin narealisar niya na sinimbag palan ni Jehova an kadaklan sa saiyang mga pamibi, pati ngani idtong mga nalingawan na niya. Sa pana-panahon, kaipuhan tang magpundo nguna asin pag-isipan kun paano ni Jehova sinisimbag an satong mga pamibi.—Sal. 66:19, 20.
16. Paano ta maipapahiling an satong pagtubod kun manungod sa pamibi? (Hebreo 11:6)
16 Ipinapahiling ta an satong pagtubod bako lang paagi sa pagpamibi ki Jehova kundi paagi man sa pag-ako kan saiyang simbag sa satong mga pamibi sa ano man na paagi na sinimbag iyan. (Basahon an Hebreo 11:6.) Pag-isipan an halimbawa ni Mike saka kan saiyang agom na si Chrissy. Pasuhan ninda na maglingkod sa Bethel. “Pirang beses kami ni agom na nag-aplay asin pauruutro ming ipinamibi ki Jehova an manungod sa pasuhan na iyan,” an sabi ni Mike, “pero dai kami naimbitaran.” Padagos na nagtiwala si Mike asin si Chrissy na aram ni Jehova kun paano sinda pinakamarahay na magagamit sa paglilingkod sa saiya. Padagos nindang ginibo an saindang pinakamakakaya, na naglilingkod bilang mga regular payunir kun sain mas dakula an pangangaipo asin nagtatabang sa teokratikong mga proyekto sa pagtugdok. Ngunyan naglilingkod sinda sa pansirkitong gibuhon. “Dai pirming sinisimbag ni Jehova an satong mga pamibi sa paaging inaasahan ta,” an sabi ni Mike, “pero sinisimbag niya iyan asin kun minsan sa mga paagi na mas marahay pa kisa sa inaasahan ta.”
17-18. Uyon sa Salmo 86:6, 7, sa ano kita makakapagtiwala?
17 Basahon an Salmo 86:6, 7. Sigurado an salmistang si David na dinangog asin sinimbag ni Jehova an saiyang mga pamibi. Puwede ka man na magkaigwa nin arog kaiyan na pagtitiwala. Sinisigurado sa sato kan mga halimbawa na pinag-ulayan sa artikulong ini na puwede kitang tawan ni Jehova nin kadunungan asin nin kusog na kaipuhan ta para makatagal. Puwede niyang gamiton an satong espirituwal na pamilya o dawa ngani an mga dai nagsasamba sa saiya sa presente para tabangan kita sa nagkapirang paagi.
18 Dawa ngani puwedeng bako pirming sa paaging inaasahan ta an simbag ni Jehova sa satong mga pamibi, aram ta na sisimbagon niya iyan. Itatao niya kun ano mismo an kaipuhan ta asin kun nuarin ta mismo iyan kaipuhan. Kaya padagos na mamibi na may pagtubod, na nagtitiwala na aatamanon ka ni Jehova ngunyan asin na ‘papaniguan niya an mawot kan lambang bagay na may buhay’ sa maabot na bagong kinaban.—Sal. 145:16.
KANTA 46 Salamat, Jehova
a Sinisigurado sa sato ni Jehova na sisimbagon niya an satong mga pamibi kun kauyon an mga iyan kan saiyang kabutan. Pag nag-aagi kita nin mga problema, makakapagtiwala kita na itatao niya sa sato an tabang na kaipuhan ta para magdanay na maimbod sa saiya. Pag-ulayan ta kun paano ni Jehova sinisimbag an satong mga pamibi.
b Para sa paliwanag kun taano ta tinutugutan ni Jehova si Satanas na mamahala sa kinaban, hilingon an artikulong “Ipokus an Saindong Mata sa Pinakamahalagang Isyu,” na ipinublikar sa An Torrengbantayan na Hunyo 2017.
c Sinalidahan an nagkapirang pangaran.
d DESKRIPSIYON KAN RITRATO: Sarong ina kaiba an saiyang aking babayi na nag-abot sa sarong bagong lugar bilang mga refugee. Maugma sindang inako kan saindang mga kapagtubod asin tinawan sinda nin praktikal na tabang.