Tinabangan Kami ni Jehova na ‘Magtalubo Kun Sain Kami Itinanom’

Nagklase an mag-agom na Mats asin Ann-Catrin Kassholm sa Gilead School kan 1979 asin sa paglihis nin mga taon “itinanom,” o iinasignar, sinda para maglingkod sa Iran, Mauritius, Myanmar, Tanzania, Uganda, asin Zaire. Sa Gilead ninda nadangog an sarong instruktor, si Jack Redford, na nagtao kan sadol na nakatabang sa sainda mantang dakul na beses sindang “itinanom,” “ginabot,” asin “itinanom giraray.” Aramon ta sa sainda kun paano.

Mats, puwede tabing iistorya mo nguna samo kun paano mo nahanap an katotoohan?

Mats: Nakaistar si Tatay sa Poland kan panahon kan Giyera Mundiyal II, asin nakahiling siya nin grabeng pagsagin-sagin sa Iglesya Katolika. Dawa arog kaiyan, parati niyang sinasabi, “Sigurado akong igwa talaga nin katotoohan!” Pag-abot nin panahon, napatunayan kong tama siya. Nagbakal ako nin dakul na segundamanong libro. An saro diyan iyo an asul na librong inaapod na An Katotoohan na Minagiya Pasiring sa Buhay na Daing Sagkod. Nakua talaga kan titulo kaiyan an atensiyon ko kaya binasa ko an bilog na libro kan banggi man sanang nakua ko iyan. Tapos kinaagahan, sigurado akong nahanap ko na an katotoohan!

Puon kan Abril 1972, nagbasa ako nin dakul na iba pang publikasyon kan Mga Saksi ni Jehova asin nasimbag an mga hapot ko sa Bibliya. Pagmati ko arog ako kan negosyante sa ilustrasyon ni Jesus na, pagkatapos na makahiling nin sarong perlas na may dakulang halaga, ipinabakal an gabos niyang pagsadiri para bakalon iyan. “Ipinabakal” ko man, sabi ngani, an plano kong magklase sa sarong unibersidad para magin doktor—tangani sanang mabakal an nahanap kong “perlas” nin katotoohan. (Mat. 13:45, 46) Nabawtismuhan ako kan Disyembre 10, 1972.

Sa laog nin sarong taon, inako kan mga magurang ko saka kan nguhod kong tugang na lalaki an katotoohan dangan nagpabawtismo. Kan Hulyo 1973, nagpuon akong maglingkod nin bilog na panahon. Saro sa maiigot na payunir sa kongregasyon mi si Ann-Catrin, na sarong magayon na sister na iniinot si Jehova sa saiyang buhay. Nagkaminuutan kami dangan nagpakasal kan 1975, asin sa suminurunod na apat na taon nag-istar kami sa banwaan nin Strömsund, na sarong magayon asin mabungang teritoryo sa Sweden.

Ann-Catrin: Nanudan ni Tatay an katotoohan kan madali na siyang matapos sa pagklase sa unibersidad sa Stockholm. Tulong bulan pa sana an edad ko kaidto, pero iiniiba niya na ako sa mga pagtiripon saka sa pagluwas sa langtad. Dai iyan nagustuhan ni Nanay kaya pinurbaran niyang patunayan na sala an mga Saksi. Pero dai niya iyan mapatunayan, kaya pag-abot nin panahon nagpabawtismo na man siya. Nabawtismuhan ako sa edad na 13, dangan kan 16 anyos na ako, nagpuon akong magpayunir. Pagkatapos kong maglingkod sa Umeå bilang need-greater, nagin espesyal payunir ako.

Pagkatapos ming ikasal ni Mats, nagkapribilehiyo kaming matabangan an nagkapirang indibidwal na manudan an katotoohan. Saro sainda si Maivor, sarong tin-edyer na babayi na binayaan an saiyang karera sa sports asin nagin kapartner kan nguhod kong tugang na babayi sa pagpapayunir. Nagklase sinda sa Gilead kan 1984 asin naglilingkod bilang mga misyonera sa Ecuador.

Sa manlain-lain na asignasyon nindo bilang misyonero, paano nindo sinunod an sadol na “magtalubo kun sain kamo itinanom”?

Mats: Parati kaming itinatanom giraray, sabi ngani, sa bagong mga asignasyon. Pero hinihinguwa ming danay na ‘nakagamot’ ki Jesus paagi sa paggibo kan pinakamakakaya mi na arugon siya, lalo na an saiyang kapakumbabaan. (Col. 2:6, 7) Halimbawa, imbes na asahan na an mga Saksi sa lugar na pinaglilingkudan mi an mag-adjust sa samo, hinihinguwa ming maaraman kun taano ta ginigibo ninda an mga bagay-bagay sa sarong partikular na paagi. Gusto ming masabutan an kaisipan asin kultura ninda. Mantang urog ming inaarog si Jesus, urog mi man na namamatian na “itinanom [kami] sa gilid kan mga sulugan nin tubig” tanganing magtalubo sain man kami nakaasignar.—Sal. 1:2, 3.

Ann-Catrin: Tanganing magtalubo an sarong kahoy na itinanom giraray, kaipuhan man kaiyan an init kan saldang o aldaw. Pirming pinapatunayan ni Jehova na siya siring sa “aldaw” sa samo. (Sal. 84:11) Tinawan niya kami nin mainamigo saka mamumuton na mga tugang sa espirituwal. Halimbawa, sa sadit na kongregasyon mi sa Tehran, Iran, naeksperyensiyahan mi an kaagid na pagkamapag-istimar na komun kan mga panahon kan Bibliya. Gustuhon mi pa kutang magdanay sa Iran, pero kan Hulyo 1980, opisyal na ipinagbawal diyan an Mga Saksi ni Jehova asin tinawan kami nin notisya na maghali sa nasyon sa laog nin 48 oras. Dangan iinasignar kami sa Zaire (Congo na ngunyan) sa Aprika.

Kan inot kong maaraman na sa Aprika na kami iaasignar, napahibi ako. Natakot ako dahil sa mga nadadangog ko manungod sa mga halas saka sa mga hilang sa Aprika. Pero sinabi samo kan duwa ming dayupot na amigo na haloy na naglingkod duman: “Dai pa man kaya kamo nakakaduman! Purbaran nindo para maaraman nindo. Magugustuhan nindo an Aprika.” Asin iyo man nanggad! Mainamigo saka mamumuton an mga tugang duman. Sa katunayan ngani, kan kaipuhan mi nang maghali sa Zaire pakalihis nin anom na taon huli sa sarong pagbabawal, napangirit ako sa sadiri ko ta an ipinapamibi ko na palan, “Jehova, gusto mi pa pong magdanay sa Aprika.”

Anong nakakaugmang mga eksperyensiya sa naglihis na mga taon an buot nindong iistorya sa samo?

Mats: An saro iyo an mga nagin dayupot ming amigong mga misyonero na hali sa manlain-lain na nasyon. Sa nagkapirang asignasyon, nakamati man kami nin labi-labing kaugmahan huli sa pagkondukta nin dakul na pag-adal sa Bibliya—na kun minsan tig-20 kami ni agom! Dai mi man malilingawan an pagkamuot asin pagkamapag-istimar kan mga tugang sa Aprika. Sa mga pagdalaw mi sa mga kongregasyon sa Tanzania, dakul na amigo mi an nagpahiling samo nin pagkamapag-istimar na “labi pa ngani sa makakaya ninda” pag ipinaparada mi an samong “kuwartong turugan”—na sarong awtong Volkswagen Kombi—kataid kan saindang mga harong. (2 Cor. 8:3) An sarong espesyal na marhay samo ni agom iyo an inaapod ming story time. Ginigibo mi iyan sa katapusan kan kada aldaw. Nagtutukaw kami asin pinag-uulayan an mga nangyari samo sa bilog na aldaw asin pinapasalamatan mi si Jehova huling yaon siya pirmi para samo.

Ann-Catrin: Nakakaugma talaga na makabisto an dakul na tugang sa manlain-lain na parte kan kinaban. Nakanuod kami nin bagong mga lengguwahe arog kan Farsi, French, Luganda, asin Swahili—saka nakaeksperyensiya nin manlain-lain asin interesanteng mga kultura. May mga natabangan kaming magin bagong mga disipulo, nagkaigwa nin bago asin tunay na mga amigo, saka naglingkod ki Jehova kaibanan ninda.—Sof. 3:9.

Nakahiling kami nin manlain-lain asin magagayon na mga linalang. Sa kada nag-aako kami nin bagong asignasyon sa paglilingkod ki Jehova, pagmati mi garo baga nagbibiyahe kami tapos si Jehova an Guide mi. Huli sa saiya, naeksperyensiyahan mi an mga bagay na kun sa sadiri mi sana dai mi lamang maeeksperyensiyahan.

Anong mga kadipisilan an napaatubang sa saindo, asin paano nindo iyan nakayanan?

Mats: Nagkaigwa kami nin nagkapirang hilang, arog nin malaria, na nakukua sa tropikal na mga lugar. May mga pagkakataon man na kinaipuhan ni agom na maoperaran tulos. Tapos nahadit man kami manungod sa naggugurang mi nang mga magurang, kaya pasalamat talaga kami sa mga tugang mi na iyo an panginot na nag-ataman sa sainda. Ginibo talaga ninda an pinakamakakaya ninda na atamanon an mga magurang mi nin may pagpapasensiya, kaugmahan, asin pagkamuot. (1 Tim. 5:4) Pero, may mga pagkakataon pa man giraray na namumundo kami dahil iniisip ming kun yaon lang kuta kami kaibanan kan mga magurang mi mas makakatabang pa kami sa sainda.

Ann-Catrin: Kan 1983, mantang naglilingkod kami sa Zaire, nagkaigwa ako nin malalang kolera. Sinabi kan doktor ki Mats, “Ibiyahe na tulos nindo siya paluwas sa nasyon ngunyan na aldaw!” Kinaagahan, nakasakay na kami sa sarong eroplanong pangkargamento—an iyo sanang available na biyahe kaidto pa-Sweden.

Mats: Paghuna mi diyan na matatapos an paglilingkod mi bilang misyonero, kaya nagparahibi talaga kami. Pero kabaliktaran kan sinabi kan doktor, naumayan si agom. Kaya pakalihis nin sarong taon, nakabalik kami sa Zaire, asin sa pagkakataon na ini sa sarong sadit na kongregasyon na Swahili sa Lubumbashi.

Ann-Catrin: Kan nasa Lubumbashi kami, nakuanan ako. Dawa ngani mayo man sa plano ming magkaaki, grabe an kamunduan mi sa pagkagadan kan samong aki. Pero kan panahon na iyan, nakaeksperyensiya kami nin sarong dai inaasahan na regalo hali ki Jehova. Nakapuon kami nin mas dakul na tinutukduan sa Bibliya kisa kasuarin man. Mayo pang sarong taon, an 35 parahayag sa kongregasyon nagin nang 70, saka an 40 bilang nin nag-aatender sa mga pagtiripon nagin nang 220. Nagin sibot-sibot kami sa ministeryo, asin nakaranga sakong marhay an mga bendisyon ni Jehova. Pero, parati mi pa man giraray na iniisip saka napag-uulayan ni agom an aki mi. Hinahalat-halat mi nang marhay na mahiling kun paano ni Jehova lubos na papaumayan an samong nalugadan na puso.

Mats: Nagpuon si agom na makamati nin grabeng pangluluya nin hawak. Tapos na-diagnose man akong may stage four na kanser sa bituka asin nangaipo nin mayor na operasyon. Pero okey na man ako ngunyan; si agom man, ginigibo niya an saiyang pinakamakakaya sa paglilingkod ki Jehova.

Napag-isip-isip ming bako lang kami an napapaatubang sa mga pagbalo. Pagkatapos kan genocide sa Rwanda kan 1994, dinalaw mi an dakul na tugang sa mga refugee camp. Nahiling mi mismo an saindang pagtubod, pakatagal, saka an saindang pagigin mapag-istimar. Nanudan mi diyan na kaya ni Jehova na susteniran an mga lingkod niya sa ano man na pagbalo.—Sal. 55:22.

Ann-Catrin: Nakaeksperyensiya kami nin saro pang pagbalo pagkatapos ming mag-atender sa pagdedikar kan sangang opisina sa Uganda kan 2007. Pagkatapos kan programa, nagbiyahe na kami kaiba kan sarong grupo nin mga 25 misyonero asin mga Bethelite pasiring sa Nairobi, Kenya. Kan madali na kami sa linderos kan Kenya, sarong trak na kasabatan mi an bigla na sanang suminiko pasiring sa linya mi asin binangga kami. Nagadan tulos an drayber saka an lima sa mga amigo mi; an sarong sister nagadan kan nasa ospital na. Hinahalat-halat mi nang marhay na mahiling giraray an mga amigo mi!—Job 14:13-15.

Naumayan man pag-abot nin panahon an mga lugad ko. Pero arog kan nagkapirang iba pang mga pasahero, nagkaigwa kami ni Mats nin post-traumatic stress disorder. Sa kaso ko, nangyayari pag banggi an anxiety attack ko. Napapagmata ako kaiyan na nakakamating garo inaatake sa puso. Makatakot talaga. Pero naranga kami kan udok na pagpamibi ki Jehova saka kan pagbasa kan nagkapira sa paborito ming teksto. Nakatabang iyan samo na makayanan an inaagihan ming kadipisilan. Nagpadoktor man kami, na nakatabang na marhay samo. Mas nakokontrol mi na ngunyan an mga sintomas, asin hinahagad mi ki Jehova na tabangan kaming rangahon an iba na nasa kaagid na sitwasyon.

Kan iniistorya nindo kun paano nindo nakayanan an dipisil na mga sitwasyon, sinabi nindo na garo kamo dinara ni Jehova “siring sa mga sugok.” Ano an buot nindong sabihon?

Mats: Hali an ekspresyon na iyan sa kasabihan sa Swahili na “Tumebebwa kama mayai mabichi,” na an buot sabihon, “Dinara kami siring sa mga sugok.” Kun paanong maingat na marhay na dinadara nin sarong tawo an hilaw na mga sugok tanganing dai iyan magkaparasa, mamumuton man kaming iningatan asin sinuportaran ni Jehova sa lambang asignasyon mi. Pirmi kaming igwa kan mga pangangaipo mi, labi pa ngani. An empatiyang ipinahiling samo kan Namamahalang Grupo saro man sa mga paagi na namatian mi an pagkamuot asin tabang ni Jehova.

Ann-Catrin: Gusto ko man iistorya an sarong halimbawa kan mamumuton na pagtabang samo ni Jehova. Sarong aldaw may nag-apod sako sa telepono asin ibinaretang si Tatay, na nasa Sweden, naospital asin malala an hilang. Kakarahay pa lang kaidto ni Mats sa malaria. Mayo kaming kuwartang pambakal nin tiket sa eroplano para makapuli, kaya nagdesisyon kaming ipabakal an awto mi. Dangan nakaresibi kami nin duwa pang apod sa telepono; an saro hali sa sarong mag-agom na nakabareta sa sitwasyon mi asin buot kaming ibakal nin sarong tiket. An ikaduwang nag-apod sarong may edad nang sister na nagtipon nin kuwarta sa sarong kahon na linagan niya nin label na “Para sa nangangaipo.” Iyo, mga minuto lang, tinabangan na kami ni Jehova!—Heb. 13:6.

Sa labing 50 taon nindo sa bilog na panahon na paglilingkod, ano an mga nanudan nindo?

Ann-Catrin: Nanudan ko na an samong kusog “yaon sa pagdanay na kalmado asin pagpahiling nin tiwala.” Pag nagtitiwala kita ki Jehova, garo man sana si Jehova na an nakikipaglaban sa laban na napapaatubang sa sato. (Isa. 30:15; 2 Cron. 20:15, 17) Paagi sa paggibo kan samong pinakamakakaya para ki Jehova sa lambang asignasyon mi, nagkamit kami nin dakul nanggad na bendisyon na dai mi makakamtan sa iba pang paagi.

Mats: An pinakamahalagang leksiyon na nanudan ko iyo na magsarig ki Jehova sa lambang sitwasyon asin hilingon kun paano siya mahiro alang-alang sa sako. (Sal. 37:5) Dai lamang nangyari na dai niya inutob an panugang iyan. Padagos ming napapatunayan iyan sa asignasyon mi ngunyan sa Bethel sa Myanmar.

Lugod na maeksperyensiyahan man kan dakul na hoben na gustong magpahiwas kan saindang ministeryo an maimbod na pagkamuot na ipinahiling samo ni Jehova. Tiwala kami na maeeksperyensiyahan ninda iyan kun tutugutan ninda si Jehova na tabangan sindang lubos na magtalubo sain man sinda itanom.