ISTORYA NIN BUHAY
An mga Bendisyon ni Jehova Labi Pa sa Gabos na Inaasahan Ko
‘DAPAT magpayunir ako.’ Pero naisip ko, ‘Exciting daw talaga an pagpayunir?’ Gustong-gusto ko an trabaho ko sa Germany; nagmamanehar ako kan pag-eksport nin mga kakanon sa dakul na lugar sa Aprika, arog nin Dar es Salaam, Elisabethville, asin Asmara. Dai ko nanggad hunaon na pag-abot nin panahon maglilingkod ako ki Jehova nin bilog na panahon sa mga lugar na iyan asin sa dakul pang mga lugar sa bilog na Aprika!
Kan napangganahan ko na an sakong mga pagduwa-duwa asin nagpuon na akong magpayunir, nabuksan sako an sarong buhay na labi pa sa gabos na inaasahan ko. (Efe. 3:20) Pero tibaad magngalas ka kun paano iyan nangyari? Iiistorya ko sa saindo puon sa kapinunan.
Namundag ako sa Berlin, Germany kan 1939, mga pirang bulan pa sana pagpuon kan Giyera Mundiyal II. Kan madali nang matapos an giyera kan 1945, pigparabomba nin mga eroplano an Berlin. Sa saro sa mga pambobombang iyan, tinamaan an kalye mi, asin kaming pamilya nagdulag pasiring sa air-raid shelter (sarong lugar na ligtas sa pambobomba). Para sa samong kaligtasan, nagdulag kami pa-Erfurt, an namundagan na lugar ni Nanay.
Kaiba kan sakong mga magurang asin tugang na babayi sa Germany, mga 1950
Maigot na hinanap ni Nanay an katotoohan. Nagbasa siya nin mga libro na isinurat nin mga pilosopo asin siniyasat an manlain-lain na relihiyon pero dai siya kontento. Kan mga 1948, may duwang Saksi ni Jehova na nagdalaw sa harong mi. Pinadagos sinda ni Nanay asin pigparahapot. Mayo pang sarong oras, sinabi niya samo kan nguhod kong tugang na babayi, “Nahanap ko na an katotoohan!” Dai nahaloy pagkatapos kaiyan, ako, si Nanay, saka an tugang kong babayi nag-atender na sa mga pagtiripon sa Erfurt.
Kan 1950, nagbalik kami sa Berlin asin nag-asosyar sa Berlin-Kreuzberg Congregation. Kan maglipat giraray kami nin harong sa Berlin, nag-atender kami sa Berlin-Tempelhof Congregation. Pag-abot nin panahon, nabawtismuhan si Nanay, pero nagduwa-duwa ako. Taano?
KUN PAANO KO NAPANGGANAHAN AN SAKONG PAGKAMASUSUPGON
Dai ako gayong nag-uuswag sa paglilingkod ki Jehova huling masusupgon akong marhay. Dawa nag-iiba ako sa paghuhulit, duwang taon akong dai lamang nakipag-ulay para magpatotoo. Nagbago iyan kan makaibanan ko an mga tugang na nagpahiling nin dakulang kusog nin buot asin debosyon ki Jehova. An iba sa sainda nagtagal sa mga kampo de-konsentrasyon kan Nazi o sa mga presuhan sa East Germany. May mga isinapeligro an saindang katalingkasan para pasekretong magdara nin mga literatura sa East Germany. Napahanga akong marhay sa saindang halimbawa. Inisip ko na kun isinapeligro ngani ninda an saindang buhay asin katalingkasan para ki Jehova saka sa mga tugang, dapat pagmaigutan ko man na bawasan lamang an pagigin masusupgon ko.
Nagpuon na mabawasan an pagkamasusupgon ko kan makikabtang ako sa sarong espesyal na kampanya nin paghuhulit kan 1955. Sa sarong surat na ipinublikar sa Informant,a ipinaisi ni Brother Nathan Knorr na saro iyan sa pinakadakulang kampanya na ginibo kan organisasyon. Sinabi niya na kun makikikabtang an gabos na parahayag, “iyan an magigin pinakamarahay na bulan nin pagpapatotoo kasuarin man.” Totoo nanggad iyan! Dai nahaloy pagkatapos, nagdusay ako ki Jehova, asin kan 1956, nabawtismuhan ako kasabay ni Tatay saka kan tugang kong babayi. Pero dai nahaloy, napaatubang ako sa saro pang importanteng desisyon.
Haloy ko nang aram na an pagpayunir an pinakamarahay na karera, pero pigparapaliman-limanan ko iyan. Inot, nagdesisyon akong kumua nguna sa Berlin nin eksperyensiya sa pag-wholesale, pag-import, asin pag-export. Pagkatapos kaiyan, gusto kong magtrabaho nguna sa propesyon na iyan tanganing magkaigwa nin mas dakul na eksperyensiya. Kaya kan 1961, inako ko an sarong trabaho sa Hamburg, an pinakadakulang siyudad sa Germany na may duungan. Mantang mas nai-enjoy ko an trabaho, mas napapaliman-limanan ko man an pagpayunir. Ano an gigibuhon ko?
Nagpapasalamat ako ta ginamit ni Jehova an mamumuton na mga brother para tabangan akong magin priyoridad an paglilingkod saiya. Nagkapira sa mga amigo ko an nagpayunir na asin nagin marahay na halimbawa sa sako. Tapos, dinagka ako ni Brother Erich Mundt, saro sa mga napreso sa kampo de-konsentrasyon, na magtiwala ki Jehova. Sinabi niya na sa kampo de-konsentrasyon, an mga brother na nagtiwala sa sadiri nangluya pag-abot nin panahon. Pero an mga lubos na nagtiwala ki Jehova nagdanay na maimbod asin nakatabang sa kongregasyon.
Kan magpayunir ako, 1963
Si Brother Martin Poetzinger, na kan huri naglingkod bilang miyembro kan Namamahalang Grupo, pigparapakusog man an buot kan mga tugang na sinasabi, “An kusog nin buot an pinakamarahay na bagay na dapat igwa ka!” Pagkatapos hurop-hurupon an mga tataramon na iyan, nag-resign ako sa trabaho asin nagpuon na magpayunir kan Hunyo 1963. Iyan nanggad an pinakamarahay na desisyon na ginibo ko! Pakalihis nin duwang bulan, bago pa ako magpuon na maghanap nin bagong trabaho, inimbitaran akong maglingkod bilang espesyal payunir. Pakalihis nin pirang taon, itinao sa sako ni Jehova an labi pa sa gabos na inaasahan ko. Inimbitaran ako sa ika-44 klase nin Gilead School.
AN MAHALAGANG LEKSIYON NA NANUDAN KO SA GILEAD
“Dai tulos magsuko sa asignasyon mo.” Iyan an saro sa pinakamahalagang mga leksiyon na nanudan ko, lalo na ki Brother Nathan Knorr asin Lyman Swingle. Dinagka ninda kami na magdanay sa samong asignasyon dawa masakit. Sinabi ni Brother Knorr: “Sain kamo mapokus? Sa ati, sa mga insekto, sa pagtios? O hihilingon nindo an mga kahoy, mga burak, asin an maugmang mga lalawgon? Hinguwahon na mamutan an mga tawo!” Sarong aldaw, mantang ipinapaliwanag ni Brother Swingle kun taano ta may mga brother na nagsuko tulos, nagin emosyonal siya asin napaluha. Kinaipuhan niyang pumundo nguna sa pagpahayag para magkalma siya. Nataros na marhay kaiyan an sakong puso asin nagin determinado akong dai pamunduon si Cristo asin an saiyang maimbod na mga tugang.—Mat. 25:40.
Ako, si Claude, asin si Heinrich sa samong asignasyon bilang misyonero sa Lubumbashi, Congo, 1967
Kan maresibi mi an samong mga asignasyon, may mga Bethelite na nag-usisa sa nagkapira samo kun sain kami iaasignar. Positibo an mga komento ninda sa lambang lugar na aasignaran, pero kan sabihon ko nang, “Sa Congo (Kinshasa),” dai sinda nakagirong tulos dangan nagsabi sana: “Ah, sa Congo! Mapasaimo lugod si Jehova!” Kan mga panahon na idto, baretang-bareta an dapit sa giyera, mga paragadan, saka mga asasinasyon sa Congo. Pero isinaisip ko an mga nanudan kong leksiyon. Dai nahaloy pakagradwar mi kan Setyembre 1967, nagbiyahe kami na Heinrich Dehnbostel asin Claude Lindsay pasiring sa kabisera kan Congo, an Kinshasa.
MARAHAYON NA LUGAR PARA SANAYON AN MGA MISYONERO
Pag-abot mi sa Kinshasa, nag-adal kami nin French sa laog nin tulong bulan. Dangan nag-eroplano kami pa-Lubumbashi, na dating inaapod na Elisabethville, harani sa border nin Zambia sa purong timog kan Congo. Naglipat kami sa sarong missionary home na nasa sentro kan siyudad.
Dahil dai pa nahuhulitan an dakul na parte kan Lubumbashi, ugmahon kami na magin an pinakainot na makakapaghulit kan katotoohan sa dakul na residente duman. Dai nahaloy, dai mi na kayang konduktahan an gabos na gustong magpa-Bible study. Nagpatotoo man kami sa mga opisyal nin gobyerno o mga pulis. Dakul an nagpahiling nin dakulang paggalang sa Tataramon nin Diyos asin sa paghuhulit ta. Swahili an panginot na lengguwaheng tinataram kan mga tawo, kaya nag-adal man kami kaiyan ni Claude Lindsay. Dai nahaloy, iinasignar kami sa sarong kongregasyon na Swahili an lengguwahe.
Dawa dakulon kaming magayon na eksperyensiya, napaatubang man kami sa mga kadipisilan. Sa parati, may mga burat na suldados na may darang badil o agresibong mga pulis na inaakusaran kami nin mga bagay na dai mi man ginibo. Sarong beses, dinaguso nin sarong grupo nin armadong mga pulis an pagtiripon kan samong kongregasyon sa missionary home tapos dinara kami sa sentral na presinto nin pulis. Duman pinatukaw ninda kami sa daga sagkod mga alas diyes nin banggi bago ninda kami pinalibre.
Kan 1969, inasignaran ako bilang nagbibiyaheng paraataman. Sa asignasyon na iyan naeksperyensiyahan ko an haralawig na pagbaklay sa mga lugar na may haralangkaw na duot asin malaboy. Sa sarong baryo, sa irarom kan katre ko nagtuturog pag banggi an sarong guna kaiba an mga siwo kaini. Dai ko malilingawan an maribok niyang pagpukaw sa sako bago pa man magsirang an saldang. Nauugma ako pag nagigirumduman ko an pakikipag-ulay sa mga tugang dapit sa mga katotoohan sa Bibliya mantang nakatukaw kami sa palibot kan campfire pag banggi.
An saro sa pinakadakulang nagin problema iyo an mga nagsasagin na mga tugang, na mga suportador palan kan mobimiyentong Kitawala.b May nagkapira sa sainda na nagin miyembro kan kongregasyon asin nagin mga elder pa ngani. Pero dai nadaya kan “mga gapong [ini na] nakatago” an maimbod na mga tugang. (Jud. 12) Pag-abot nin panahon, lininig ni Jehova an mga kongregasyon dangan nagkaigwa nin pambihirang pag-uswag pagkatapos kaiyan.
Kan 1971, iinasignar ako sa sangang opisina sa Kinshasa, asin manlain-lain an nagin trabaho ko diyan, arog kan pag-asikaso sa mga surat, order nin mga literatura, asin iba pang mga trabaho sa Service Department. Sa Bethel, nanudan ko kun paano oorganisaron an gibuhon sa sarong dakulang nasyon na limitado an imprastraktura. Kun minsan, inaabot nin mga bulan bago makaabot sa mga kongregasyon an samong mga surat. Paghali sa eroplano, isasakay sa mga baroto an mga surat na kun minsan mga pirang semanang naguguot sa mahibog na mga water lily. Minsan siring, nagin mapanggana an gibuhon sa ibong kaiyan asin kan iba pang mga kadipisilan.
Napahanga ako kun paano inorganisar kan mga brother an darakulang kumbensiyon gamit an limitado sanang pondo. Ginibo nindang mga entablado an mga punso, ginamit nindang lanob an haralangkaw na duot, asin linulon ninda an haralangkaw na duot para magin kurukutson na tutukawan. Kawayan an karang kan mga edipisyo asin mga banig na tambo an ginigibo nindang atop saka lamesa. Imbes na pako, naggamit sinda nin mga ubak nin kahoy na panggakod. Talagang napahanga ako sa pagigin madaling makibagay asin pagigin mapamaagi kan mga tugang. Napamahal sindang marhay sa sako. Talagang napungaw ako sa sainda kan magbalyo na ako sa bagong asignasyon!
PAGLILINGKOD SA KENYA
Kan 1974, ibinalyo ako sa sangang opisina sa Nairobi, Kenya. Dakulon kaming gibuhon, huling an sangang opisina sa Kenya an nag-aasikaso sa gibuhon na paghuhulit sa sampulong kaharaning nasyon, na an nagkapira diyan ipinagbawal kaidto an satong gibuhon. Parati akong ipinapadara tanganing magbisita sa mga nasyon na iyan, lalo na sa Ethiopia, na diyan an satong mga tugang pinersegir asin napaatubang sa grabeng mga pagbalo. Dakul sa sainda an brutal na minaltrato o iprineso; may mga ginadan pa ngani. Pero maimbod sindang nagtagal huling dayupot sinda ki Jehova asin sa lambang saro.
Kan 1980, may magayunon na nangyari sa buhay ko—nagpakasal kami ni Gail Matheson, na taga Canada. Magkaklase kami ni Gail sa Gilead. Nagsusuratan kami. Misyonera kaidto si Gail sa Bolivia. Pagkalihis nin 12 taon, nagkahilingan giraray kami sa New York. Dai nahaloy pagkatapos kaiyan, nagpakasal kami sa Kenya. Nagpapasalamat akong marhay ki Gail huli sa saiyang espirituwal na pananaw asin pagigin kontento. Padagos siyang nagin mahalagang marhay na suporta sa sako saka mamumuton na kaiba-iba.
Kan 1986, iinasignar kami ni Gail bilang nagbibiyaheng paraataman mantang kasabay kaiyan naglilingkod ako bilang miyembro kan Komite kan Sangay. Kaiba sa asignasyon ko bilang nagbibiyaheng paraataman an paglilingkod sa dakul na nasyon na nasa pangangataman kan sangang opisina sa Kenya.
Nagpapahayag sa sarong kumbensiyon sa Asmara, 1992
Maugma kong nagigirumduman an panahon na nag-aandam kami para sa sarong kumbensiyon sa Asmara (sa Eritrea) kan 1992 kan mayo nin pagbabawal sa satong gibuhon sa lugar na iyan. Nakakamundo huling an nakua mi sana sarong kamalig na makanos na ngani sa luwas, mas makanos pa sa laog. Sa aldaw kan kumbensiyon, napahanga ako kun paano ginibo kan mga tugang na magin angay na lugar nin pagsamba ki Jehova an laog kaiyan. Dakul na pamilya an nagdara nin pandekorasyon na tela asin ekspertong tinahuban an ano man na bagay na bakong magayon paghilingon. Nagin nakakaugma an samong kumbensiyon na inatenderan nin 1,279 katawo.
Dakulang pagbabago sa samo an pagigin nagbibiyaheng paraataman huling nagkakalain-lain na marhay an mga dinadagusan mi. May beses na nagdagos kami sa sarong dakula asin magarbong harong sa may baybayon nin dagat; sarong beses na man, nasa sarong sadit na payag-payag kami na gibo sa yero sa dagusan nin mga trabahador na an kasilyasan labing 100 metros an rayo. Pero sain man kami naglilingkod, an pinakadai mi malilingawan iyo an mga aldaw na sibot kami sa paglilingkod kaiba kan mahigos na mga payunir asin parahayag. Kan maresibi mi an sunod ming asignasyon, kinaipuhan ming bayaan an dakul na mga amigong napamahal na sa samo asin mami-miss ming marhay.
PAG-ANI NIN MGA BENDISYON SA ETHIOPIA
Durante kan 1987 sagkod 1992, legal na naestablisar an satong gibuhon sa nagkapirang nasyon na nasa pangangataman kan sangang opisina sa Kenya. Bilang resulta, nagkaigwa nin suway na mga branch asin country office. Kan 1993, iinasignar kaming maglingkod sa country office sa Addis Ababa, Ethiopia, na diyan pasekreto an satong gibuhon sa laog nin dakul na dekada, pero ngunyan legal nang minimidbid an satong gibuhon.
Naglilingkod bilang nagbibiyaheng paraataman sa mga probinsiya sa Ethiopia, 1996
Binendisyunan ni Jehova an gibuhon sa Ethiopia. Dakul na tugang an nagpayunir. Labing 20 porsiyento kan gabos na parahayag an nagreregular payunir kada taon puon kan 2012. Dugang pa, nagtao nin kinakaipuhan na pagsasanay an teokratikong mga paadalan, asin labing 120 Kingdom Hall an naitugdok. Kan 2004, nagbalyo an pamilyang Bethel sa bagong pasilidad, asin bendisyon man an sarong Assembly Hall na itinugdok sa lugar man sanang iyan.
Sa paglihis nin mga taon, nagin dayupot ming mga amigo ni Gail an dakul sa satong mga tugang sa Ethiopia. Napamahal sindang marhay sa samo huli sa saindang pagigin mainamigo asin kabuutan. Dai pa sana nahahaloy, nagkaigwa kami nin mga kamatian kaya kinaipuhan ming iasignar sa sangang opisina sa Central Europe. Mamumuton kaming inaataman digdi, pero nami-miss mi man na marhay an samong mga amigo sa Ethiopia.
SI JEHOVA AN NAGPATALUBO KAIYAN
Naeksperyensiyahan mi kun paano pinatalubo ni Jehova an saiyang gibuhon. (1 Cor. 3:6, 9) Halimbawa, kan primerong beses kong maghulit sa mga minerong taga Rwanda sa Congo’s Copperbelt, mayo pa nin parahayag sa Rwanda. Ngunyan igwa na nin labing 30,000 na tugang sa nasyon na iyan. Kan 1967, mga 6,000 an parahayag sa Congo (Kinshasa). Ngunyan igwa na nin mga 230,000, asin labing sarong milyon an nag-atender sa Memoryal kan 2018. Sa gabos na nasyon na dating nasa pangangataman kan sangang opisina sa Kenya, an total na bilang kan mga parahayag nagin nang labing 100,000.
Labing 50 taon na an nakaagi, ginamit ni Jehova an manlain-lain na brother tanganing tabangan akong maglaog sa bilog na panahon na pagmiministeryo. Dawa masusupgon pa man giraray ako, nanudan kong lubos na magtiwala ki Jehova. An mga eksperyensiya ko sa Aprika nakatabang sa sako na magin mapasensiya asin magin kontento. Hinahangaan mi ni Gail an namumutan tang mga tugang na nagpapahiling nin pambihirang pagkamapag-istimar, pakikibagay, asin pagtitiwala ki Jehova. Udok kong pinapasalamatan an saiyang daing kapantay na kabuutan. An mga bendisyon ni Jehova labi nanggad sa ano man na inaasahan ko.—Sal. 37:4.
a Pag-abot nin panahon, inapod na An Satong Ministeryo sa Kahadian asin rinibayan na ngunyan kan An Satong Kristiyanong Pamumuhay Asin Ministeryo—Workbook Para sa Pagtiripon.
b An “Kitawala” hali sa terminong Swahili na nangangahulugan na “magdominar, magdirehir, o mamahala.” Manungod sa pulitika an mobimiyentong ini na an obheto iyo na magin independiyente sa Belgium. An mga grupong Kitawala nagkua nin mga publikasyon kan mga Saksi ni Jehova, pinag-adalan iyan, asin pinalakop saka biniribid an mga katukduan sa Bibliya tanganing magluwas na sinusuportaran kaiyan an saindang mga pagmansay sa pulitika, superstisyosong mga kaugalian, asin imoral na pamumuhay.