Nakanuod sa Satong Pinakanangungurog na Instruktor sa Bilog Ming Buhay

AN HALIMBAWA KAN MGA MAGURANG KO

Kan huring mga taon kan dekada nin 1950, nag-imigrar an mga magurang ko haling Italia pasiring sa Kindersley, sa Saskatchewan, Canada. Dai nahaloy pagkatapos kaiyan, nanudan ninda an katotoohan, asin iyan an nagin sentro kan samong buhay. Tanda ko na, kan aki pa ako, parati akong nasa ministeryo kaiba kan mga magurang ko, kaya kun minsan pasuba kong sinasabi na nagpuon akong “mag-auxiliary pioneer” kan otso anyos ako!

Tios an mga magurang ko, pero nagpahiling sinda nin marahayon na halimbawa sa pagsasakripisyo para ki Jehova. Halimbawa, kan 1963 ipinabakal ninda an dakul sa mga pagsadiri ninda tanganing makatipon nin kuwarta para makaatender sa internasyonal na kumbensiyon sa Pasadena, California, U.S.A. Kan 1972 nagbiyahe kami nin mga 1,000 kilometros para magbalyo sa Trail, British Columbia, Canada, para tumabang na mahulitan an mga tawong nagtataram nin Italian. Nagtrabaho bilang dyanitor si Tatay. Inalukan siya nin mga promosyon pero sinayumahan niya iyan para makapagpokus sa espirituwal na mga gibuhon.

Nagpapasalamat talaga ako sa halimbawang ipinahiling kan mga magurang ko sa sako saka sa tulo kong tugang. Nagin masarig na pundasyon iyan para sa sakong teokratikong pagsasanay, na diyan kaiba an sarong leksiyon na dai ko malilingawan sa bilog kong buhay: Kun hahanapon ko nguna an Kahadian, aatamanon ako ni Jehova.—Mat. 6:33.

NAGPUON NA MAGLINGKOD NIN BILOG NA PANAHON

Kan 1980, nagpakasal kami ni Debbie, sarong magayon na sister na nakapokus sa saiyang espirituwal na mga pasuhan. Gusto ming maglaog sa bilog na panahon na paglilingkod, kaya nagpuon na magpayunir si Debbie tulong bulan pakakasal sa samo. Pakalihis nin sarong taon bilang mag-agom, nagbalyo kami sa sarong sadit na kongregasyon kun sain may pangangaipo, asin nagpayunir na man ako.

Sa paglihis nin panahon, nawara an kaugmahan mi asin gusto mi nang maghali. Pero nakipag-ulay nguna kami sa paraataman nin sirkito. Mamumuton pero prangka niya samong sinabi: “Parte kamo kan problema. Nagpopokus kaya kamo sa negatibong mga aspekto kan sitwasyon nindo. Pero, kun hihilingon nindo su mga positibo, mahahanap nindo iyan.” Iyan mismo an konseho na kaipuhan mi. (Sal. 141:5) Iinaplikar mi tulos iyan, asin dai nahaloy narealisar niyamo na, an totoo, dakul man palan nin positibong bagay sa sitwasyon mi. An nagkapirang tugang sa kongregasyon gustong urog pang makapaglingkod ki Jehova, kaiba na an mga aki asin an iba pang mga tugang na an agom bakong kapagtubod. Mapuwersang leksiyon iyan para samo. Nanudan ming maghiling sa marahay asin maghalat ki Jehova na itanos an sitwasyon na garo baga dipisilon. (Mik. 7:7) Nagin maugma giraray kami, asin nagin okey an mga bagay-bagay.

An mga instruktor mi sa samong inot na paadalan para sa mga payunir naglingkod kaidto sa ibang mga nasyon. Mantang ipinapahiling ninda an mga slide asin iniistorya an mga kadipisilan asin an mga bendisyon na naeksperyensiyahan ninda, napalaad ninda an samong pagmawot na maglingkod bilang mga misyonero. Kaya nagdesisyon kami na magin pasuhan an arog kaiyan na paglilingkod.

Para maabot an pasuhan na iyan, kan 1984 nagbalyo kami sa teritoryong French sa Quebec, na labing 4,000 kilometros an rayo sa British Columbia. Nangangahulugan iyan na ma-adjust kami sa bagong kultura asin lengguwahe. An saro pang kadipisilan iyo na sa parati dikit lang an kuwarta mi. May panahon na nakaraos lang kami paagi sa pangungua nin mga tada-tadang patatas sa tanuman nin sarong parauma. Madiskarte talaga si Debbie; nagluluto siya nin manlain-lain na putahe gamit an patatas! Sa ibong kan mga kadipisilan na iyan, ginibo mi an pinakamakakaya mi tanganing makatagal nin may kaugmahan. Urog pa diyan, nahiling mi na inaataman kami ni Jehova.—Sal. 64:10.

Sarong aldaw, nakaresibi kami nin sarong dai inaasahan na apod sa telepono. Imbitasyon iyan na maglingkod sa Bethel sa Canada. Bago kaiyan nag-aplay kami para sa Gilead School, kaya dawa ngani maugma kami na inapudan kami, medyo mamundo man kami. Pero inako mi an imbitasyon. Pag-abot mi, hinapot mi si Brother Kenneth Little, na miyembro kan Komite kan Sangay, “Paano na daw po su aplikasyon mi sa Gilead?” Nagsimbag siya, “Saka ta na lang ’yan isipon pag yaon na iyan.”

Pakalihis nin sarong semana, nag-abot na iyan—inimbitaran kami ni Debbie na mag-adal sa Gilead. Kaya may kaipuhan kaming gibuhon na desisyon. Sinabi samo ni Brother Little: “Ano man an pilion nindo, may mga aldaw na tibaad isipon nindong dapat palan kuta su saro su pinili nindo. An sarong desisyon dai masasabing mas marahay kisa kan sa saro, huling puwedeng bendisyunan ni Jehova an arin man diyan.” Inako mi an imbitasyon na mag-adal sa Gilead, asin sa paglihis nin mga taon, napatunayan mi na totoo an sadol samo ni Brother Little. An sinabi niya samo parati ming sinasabi sa iba na kaipuhan man na magdesisyon kun arin na asignasyon an pipilion ninda.

BUHAY BILANG MGA MISYONERO

Ugmahon kami na mapabilang sa 24 estudyante na nag-enrol sa ika-83 na klase nin Gilead na ginibo sa Brooklyn, New York, kan Abril 1987. Si Brother Ulysses Glass asin Jack Redford an panginot ming mga instruktor. Marikason lang na naglihis an limang bulan, asin kan Setyembre 6, 1987 naggradwar kami. Iinasignar kami sa Haiti kaiba ni John asin Marie Goode.

Dai na kaidto nagpapadara sa Haiti nin mga misyonerong hali sa Gilead puon pa kan 1962 kan puwersahan na pinahali diyan an mga natatada sa sainda. Tulong semana pagkagradwar mi, nagpuon kaming maglingkod sa Haiti, sa kabukidan, sa sarong sadit na kongregasyon na igwang 35 parahayag. Hoben pa kami saka daing eksperyensiya, asin kami sana an yaon sa missionary home. Tios na marhay an mga tawo, asin an kadaklan dai tataong magbasa. Mantang nakaistar kami diyan, nakaeksperyensiya kami nin grabeng kariribukan, mga kudeta, mga pagsulo nin barikada, asin mga bagyo.

Dakul an nanudan mi sa marigon asin maugmang mga tugang sa Haiti. An dakul sainda may masakit na buhay, pero namumutan ninda si Jehova asin an ministeryo. Igwa nin may edad nang sister na dai tataong magbasa, pero mga 150 teksto an tuom niya. An masakit na mga kamugtakan na nahihiling mi aroaldaw nakapakusog sa kumbiksiyon mi na padagos na ihulit an mensahe kan Kahadian bilang an solamenteng solusyon para sa mga problema kan katawuhan. Nakakaugmang mahiling na an nagkapira sa mga inot ming nagin Bible study nagin mga regular payunir, espesyal payunir, asin mga elder.

Mantang nasa Haiti, nabisto ko si Trevor na sarong hoben na misyonerong Mormon, asin nagkaoportunidad kami na mapag-ulayan an Bibliya sa nagkapirang pagkakataon. Pakalihis nin mga taon, nakaresibi ako nin sarong dai inaasahan na surat hali sa saiya. Sinabi niya: “Babawtismuhan na po ako sa sunod na asembleya! Buot ko pong magbalik sa Haiti asin mag-espesyal payunir sa lugar kun sain ako kaidto naglingkod bilang misyonerong Mormon.” Iyan mismo an ginibo niya sa laog nin dakul na taon, kaiba an saiyang agom.

EUROPA—DANGAN APRIKA

Iinasignar kami na maglingkod sa sarong lugar sa Europa kun sain luway-luway nang nagigin mas buwelo an gibuhon na pang-Kahadian. Kan 1992 nag-abot kami sa Ljubljana, Slovenia, harani sa lugar kun sain nagdakula an mga magurang ko bago sinda naglipat sa Italia. Igwa pa kaidto nin giyera sa mga lugar kan dating Yugoslavia. An nangangataman kaidto kan gibuhon sa rehiyon na iyan iyo an mga brother sa sangay sa Vienna, Austria; Zagreb, Croatia; asin Belgrade, Serbia. Ngunyan, an independiyenteng mga republikang iyan igwa na nin kanya-kanyang pasilidad nin Bethel.

Nangangahulugan iyan na kaipuhan mi giraray na mag-adjust sa bagong lengguwahe asin kultura. Sinasabi kan mga taga duman, “Jezik je težek,” na an buot sabihon “Dipisil an lengguwahe.” Totoo man nanggad! Hanga kami sa kaimbudan kan mga tugang na andam na inaako an mga pagliliwat na itinatao kan organisasyon, asin nahiling mi kun paano sinda binendisyunan ni Jehova. Sa giraray, nahiling mi kun paano pirming mamumuton na itinatanos ni Jehova an mga bagay-bagay sa tamang panahon. Mantang yaon kami sa Slovenia, nakatabang na marhay samo an dakul sa mga leksiyon na nanudan mi kaidto asin nakanuod kami nin mga bago.

Pero may mga pagbabago pang mangyayari sa buhay mi. Kan taon 2000 iinasignar kami sa Côte d’Ivoire, sa Sulnupan na Aprika. Dangan kan Nobyembre 2002, dahil sa giyera sibil, pig-ebakwar kami pasiring sa Sierra Leone. Katatapos pa lang kan 11 taon na giyera sibil diyan. Dipisil para samo na bigla na sanang bayaan an Côte d’Ivoire. Pero, nakatabang samo an mga nanudan ming leksiyon na mapagdanay an samong kaugmahan.

Nagpokus kami sa mabungang teritoryo asin sa mamumuton na mga tugang, na nagtagal nin giyera sa laog nin dakul na taon. Tios sinda, pero buot nindang ihiras kun ano an igwa sinda. May sarong sister na nag-alok ki Debbie nin pirang bado. Kan nag-aalangan si Debbie na akuon iyan, ininsistir kaini na sinasabi, “Kaidtong giyera, tinatabangan kami kan mga tugang sa ibang mga nasyon. Ngunyan kami na man an matabang.” Ginibo ming pasuhan na arugon an halimbawa ninda.

Pag-abot nin panahon nagbalik kami sa Côte d’Ivoire, pero dahil sa nag-uurog na tensiyon nagkaigwa giraray diyan nin grabeng kariribukan. Kaya kan Nobyembre 2004, pig-ebakwar kami paagi sa helikopter, asin may dara lang kaming tigsarong bag na 10 kilos an gabat. Kan banggi na, nagturog kami sa salog kan sarong base militar nin sarong hukbong French, asin kinaagahan isinakay kami sa eroplano pasiring sa Switzerland. Pag-abot mi sa sangang opisina kan mga matanga na, an Komite kan Sangay asin an mga instruktor kan Ministerial Training School kaiba an saindang mga agom mamumuton kaming pig-welcome. Kinugos ninda kami, tinawan nin mainit na kakanon, asin nin dakul na Swiss chocolate. Namatian mi talagang namumutan kami.

Temporaryo kaming iinasignar sa Ghana dangan balik sa Côte d’Ivoire pagkatapos na magkalma an grabeng kariribukan. Nakatabang samo an kabuutan kan mga tugang na matagalan an dipisilon na mga pag-ebakwar asin an temporaryong mga asignasyon. Para sa samo ni Debbie, dawa ngani normal na sana sa organisasyon ni Jehova an siring na pagkamuot na sa-magturugang, nungka ming tutugutan na mawara an samong apresasyon diyan. Sa katunayan, nagin mahalagang marhay na kabtang pa ngani kan samong pagsasanay an dipisilon na mga panahon na iyan.

SA MIDDLE EAST

Kan 2006, paagi sa sarong surat hali sa world headquarters, sinabi samo na may bago kaming asignasyon—sa Middle East. Sa giraray, nangangahulugan iyan nin bagong mga eksperyensiya, mga kadipisilan, mga lengguwahe, asin mga kultura. Kadakul nin puwedeng manudan sa lugar na ini na an mga tawo may pinangangaptan na marhay na relihiyosong mga paniniwala asin mga opinyon manungod sa pulitika. Magayunon paghilingon na dawa ngani manlain-lain an lengguwahe sa mga kongregasyon, nagkakasararo sinda dahil nagsusunod sinda sa teokratikong paggiya. Hanga kami sa mga tugang huling an kadaklan sa sainda kusog-buot na tinatagalan an mga pagkontra hali sa mga kapamilya, mga kaeskuwela, mga katrabaho, asin mga pagtaraid.

Nag-atender kami sa 2012 na espesyal na kumbensiyon sa Tel Aviv, Israel. An kumbensiyon na iyan an inot na beses na nagkatiripon an mga lingkod ni Jehova sa rehiyon na iyan sa arog kaiyan kadakulang bilang puon kan Pentecostes 33 C.E. Dai nanggad malilingawan an okasyon na iyan!

Kan mga taon na iyan, iinasignar kaming magdalaw sa sarong nasyon na may restriksiyon an satong gibuhon. Nagdara kami nin nagkapira sa mga literatura ta, nakikabtang sa ministeryo sa langtad, asin nag-atender sa saradit na asembleya. Maski sain igwa nin armadong marhay na mga suldados asin mga checkpoint, pero namati ming ligtas kami mantang maingat kaming nagpapasiring sa manlain-lain na lugar kaiba an pirang parahayag.

BALIK SA APRIKA

Kan 2013, nakaresibi kami nin ibang marhay na asignasyon—an maglingkod sa sangang opisina sa Kinshasa, Congo, sarong magayunon asin mahiwason na nasyon pero grabe an kapagtiusan asin parating igwa nin giyera. Kan inot sinabi mi, “Pamilyar na kami sa Aprika, kaya andam na kami.” Pero kadakul mi palan na kaipuhan na manudan, lalo na pag-abot sa pagbiyahe huling limitado sana an imprastraktura diyan. Nakahiling kami nin dakul na positibong bagay na diyan puwede kaming magpokus, kaiba na diyan an pakatagal asin kaugmahan kan mga tugang sa ibong kan kapagtiusan ninda, an pagpapahalaga ninda sa ministeryo, asin an paghihinguwa ninda na makaatender sa mga pagtiripon asin mga asembleya. Nahiling mi mismo kun paano nag-uswag an gibuhon na pang-Kahadian huli sana sa tabang asin bendisyon ni Jehova. Nakanuod kami nin dakul na mahalagang marhay na leksiyon sa mga taon na naglingkod kami nin bilog na panahon sa Congo saka nagkaigwa kami nin mga amigo na nagin garo pamilya mi na.

Sa pagtatapos kan 2017, nagkaigwa giraray kami nin bagong asignasyon—sa Timog Aprika. Ini an pinakadakulang sangang opisina na pinaglingkudan mi, asin maski an mga asignasyon mi diyan bago samo. Sa giraray, kadakul ming kaipuhan na manudan pero nakatabang samo an mga leksiyon na nanudan mi kaidto. Namumutan mi an dakul na tugang na mga dekada nang nagtatagal. Asin makangangalas na mahiling na nagkakasararong nagtatrabaho an pamilyang Bethel dawa ngani manlain-lain an saindang rasa asin kultura. Hiling-hiling na binebendisyunan ni Jehova nin katuninungan an saiyang mga lingkod, mantang isinusulot ninda an bagong personalidad asin inaaplikar an mga prinsipyo sa Bibliya.

Sa paglihis nin mga taon, nakaresibi kami ni Debbie nin nakakaugmang mga asignasyon, nag-adjust sa manlain-lain na kultura, asin nakanuod nin bagong mga lengguwahe. Bako iyan pirming madali, pero pirmi ming namamatian an maimbod na pagkamuot ni Jehova paagi kan saiyang organisasyon asin kan mga tugang. (Sal. 144:2) Nagtitiwala kami na huli sa pagsasanay samo ni Jehova paagi sa bilog na panahon na paglilingkod, nagin kaming mas marahay na mga lingkod niya.

Pinapahalagahan kong marhay an paagi nin pagpadakula sako kan mga magurang ko, an suporta kan namumutan kong agom na si Debbie, asin an marahayon na halimbawa kan mga tugang sa bilog na kinaban. Mantang iniisip-isip mi ni agom kun ano an sunod na mga mangyayari, determinado kami na padagos na makanuod nin mga leksiyon na itinutukdo kan satong Pinakanangungurog na Instruktor.