An Satong Halangkaw na Saserdote na Nakakasabot sa Sato—Si Jesus

1-2. (a) Taano ta isinugo ni Jehova digdi sa daga an saiyang Aki? (b) Ano an pag-uulayan ta sa artikulong ini? (Hebreo 5:​7-9)

MGA 2,000 na taon na an nakaagi, isinugo kan Diyos na Jehova digdi sa daga an saiyang pinakanamumutan na Aki. Taano? An sarong dahilan iyo na tanganing tubuson an katawuhan sa sumpa nin kasalan saka kagadanan asin tanganing halion an danyos na kagigibuhan ni Satanas. (Juan 3:16; 1 Juan 3:8) Saka aram man ni Jehova na an mga magigin eksperyensiya ni Jesus bilang tawo urog pa siyang maiaandam na magin Halangkaw na Saserdote na may simpatiya, empatiya, asin pagmalasakit sa sato. Nagpuon na maglingkod si Jesus bilang Halangkaw na Saserdote pagkatapos siyang mabawtismuhan kan 29 C.E.a

² Sa artikulong ini, pag-uulayan ta kun paano nakatabang ki Jesus an mga nagin eksperyensiya niya digdi sa daga tanganing urog siyang magin andam na maglingkod bilang Halangkaw na Saserdote na nakakasabot sa sato. Mantang mas nagrararom an satong pakasabot sa kun paano si Jesus ‘ginibong sangkap’ para sa papel na ini, magigin mas madali man sa sato na magdulok ki Jehova, dawa kun pinangluluyahan kita nin buot huli sa satong mga kasalan o mga kaluyahan.​—Basahon an Hebreo 5:​7-9.

AN NAMUMUTAN NA AKI NIN DIYOS NAGDIGDI SA DAGA

3-4. Anong dakulang mga pagbabago an naeksperyensiyahan ni Jesus kan magdigdi siya sa daga?

³ Dakul sa sato an nakaeksperyensiya na nin pagbabago sa satong mga kamugtakan. Halimbawa, tibaad kinaipuhan tang maghali sa satong lugar na iniistaran asin bayaan an satong namumutan na mga kapamilya asin mga amigo. Puwedeng magin bakong madali an siring na mga pagbabago. Pero mayo nin siisay man na tawong nakaeksperyensiya nin mga pagbabago na arog kan ki Jesus. Sa langit, siya an pinakaprominente sa espiritung mga aki ni Jehova. Namumutan siyang marhay ni Jehova asin pirmi siyang maugma mantang naglilingkod “sa may tuo” nin Diyos. (Sal. 16:11; Tal. 8:30) Alagad, sinasabi sa Filipos 2:7 na gikan sa buot niyang “binayaan . . . an gabos na yaon sa saiya”—binutasan niya an saiyang halangkawon na posisyon sa langit tanganing mamuhay kaiba kan bakong perpektong mga tawo digdi sa daga.

⁴ Pag-isipan man an mga kamugtakan kan ipangaki si Jesus asin kan inot na mga taon kan buhay niya digdi sa daga. Namundag siya sa sarong pobreng pamilya. Naaraman ta iyan huli sa simpleng atang kan mga magurang niya pagkatapos na mamundag siya. (Lev. 12:8; Luc. 2:24) Kan maaraman kan maraot na hading si Herodes na namundag na siya, pinurbaran niyang gadanon si Jesus. Para makaligtas ki Herodes, nagdulag an pamilya niya pasiring sa Ehipto asin nag-istar diyan nin pirang panahon. (Mat. 2:​13, 15) Dakulaon nanggad na pagbabago iyan kumpara sa buhay niya kaidto bago siya nagin tawo!

5. Ano an mga nahiling ni Jesus kan yaon siya digdi sa daga, asin paano nakatabang an mga nagin eksperyensiya niya tanganing magin andam siya para sa papel niya bilang Halangkaw na Saserdote? (Hilingon man an ritrato.)

⁵ Mantang yaon si Jesus digdi sa daga, nahiling niya an dakul na pagsakit na nangyayari sa palibot niya. Siguradong naeksperyensiyahan niyang magadanan nin mga mahal sa buhay, asin minalataw na kaiba diyan an saiyang ama-amaan na si Jose. Durante kan saiyang ministeryo, may nanuparan o nakaulay siyang mga may leproso, mga buta, mga paralisado, saka mga magurang na nagadanan nin aki, asin nakamati siya nin pagkahirak sa sainda. (Mat. 9:​2, 6; 15:30; 20:34; Mar. 1:​40, 41; Luc. 7:13) Totoo na nahihiling niya na man kaidto an pagsakit kan mga tawo kan siya nasa langit pa. Alagad kan magin tawo na siya digdi sa daga, namasdan niya sa bagong anggulo an kulog na namamatian kan mga tawo. (Isa. 53:4) An mga nagin eksperyensiya ni Jesus digdi sa daga nakatabang sa saiya na masabutan an mga namamatian kan mga tawo, an saindang mga pagkadisganar, asin mga kakulugan. Naeksperyensiyahan niya mismo an mga pagmati asin emosyon na komun sa mga tawo, kaiba na diyan an grabeng pagsakit, kapagalan, asin kamunduan.

NAGPAHILING SI JESUS NIN PAKIKIDAMAY SA MGA TAWO

6. Ano an itinutukdo sa sato kan mga paglaladawan ni Isaias manungod sa simpatiya asin pagmalasakit ni Jesus? (Isaias 42:3)

⁶ Sa bilog niyang ministeryo, nagpahiling si Jesus nin udok na empatiya sa mga maluya asin sa mga tinatratar nin bakong makatanusan. Sa paggibo kaiyan, inutob niya an sarong propesiya. Sa Hebreong Kasuratan, an mga tawong mayaman asin makusog iinaagid kun minsan sa sarong hardin na pirming nababaribian o sa darakula saka pusog na mga kahoy. (Sal. 92:12; Isa. 61:3; Jer. 31:12) Pero an mga pobre asin daing kalaban-laban ikinumparar sa runot na tambo asin sa mitsang madali nang mapalsok, na parehong haros mayo nang serbi sa kiisay man. (Basahon an Isaias 42:3; Mat. 12:20) Paagi sa pasabong nin Diyos, ginamit ni propeta Isaias an mga paglaladawan na ini para ihula an pagkamuot asin pagmalasakit na ipapahiling ni Jesus sa ordinaryong mga tawo na ibinibilang na daing halaga kan iba.

7-8. Paano inutob ni Jesus an propesiya ni Isaias?

⁷ Ipinahiling kan saro sa mga kagsurat kan Ebanghelyo na si Mateo na inutob ni Jesus an mga tataramon na ini ni Isaias: “An runot na tambo dai niya babarion, asin an mitsang madali nang mapalsok dai niya papalsukon.” An nagkapira sa mga milagro ni Jesus nakatabang sa mga inaapi na nakakamating garo sinda runot na tambo o sa mga nawaran na nin paglaom sa buhay na nakakamating garo sinda mitsang madali nang mapalsok. Saro na diyan an sarong lalaking pano nin leproso. Posibleng marhay na nawaran na siya nin paglaom na maumayan siya asin na makaiba-iba an saiyang pamilya asin mga amigo. (Luc. 5:​12, 13) Siring man an lalaking bungog na may diperensiya sa pagtaram. Isipa na sana kun ano an namamatian niya mantang nahihiling niya an maugmang pag-urulay kan mga tawo pero dai niya man sinda masabutan. (Mar. 7:​32, 33) Alagad bako lang iyan.

⁸ Kan panahon ni Jesus, dakul na Judio an naniniwala na an mga may kamatian pinapadusahan huli sa mga kasalan ninda o kan saindang mga magurang. (Juan 9:2) Bilang resulta kan salang paniniwalang ini, sa parati ipinapamati sa sainda kan iba na bako sindang mahalaga. Bilang kautuban kan propesiya ni Isaias, pinaumayan ni Jesus an mga nagsasakit asin tinabangan sindang kumusog giraray an paglaom ninda sa Diyos. Anong kumpiyansa an naitatao kaini sa sato?

9. Paano idinuduon kan Hebreo 4:​15, 16 na an satong Halangkaw na Saserdote na nasa langit talagang nakakasabot sa bakong perpektong mga tawo?

⁹ Basahon an Hebreo 4:​15, 16. Makakasigurado kita na pirming magigin mapagsabot sa sato si Jesus. Ano an buot sabihon kaiyan? An sarong tawong mapagsabot, o may simpatiya, napapahiro kan pagsakit saka kan mga namamatian kan iba. An Griegong tataramon na itrinadusir na “nakakasabot” nangangahulugan na namamatian man nin saro an namamatian na kulog asin pagsakit kan saiyang kapwa. (Hilingon man an Hebreo 10:​34, na diyan ginamit ni Pablo an iyo man sanang Griegong pandiwang iyan.) Ihinahayag kan mga salaysay manungod sa mga milagrong ginibo ni Jesus kun gurano kanaapektaran si Jesus kan pagsakit kan iba. Pinaumayan niya an mga tawo bako huling obligasyon niya iyan kundi huling talagang nagmalasakit siya sa sainda asin gusto niyang tabangan sinda. Halimbawa, kan pinaumayan niya an lalaking may leproso, puwede kutanang ginibo niya an milagro nin huruharayo sa lalaki, alagad napahiro siyang dutan ini—posibleng sa pagkakataon lang na ini may nagduta giraray sa lalaki pakalihis nin dakul na taon! Makonsiderasyon na irinayo ni Jesus sa ribok kan mga tawo an lalaking bungog asin pinaumayan ini sa sarong lugar na sinda sana an yaon. Asin kan menuson nin sarong Fariseo an nagsusulsol na babayi na naghanaw kan mga bitis ni Jesus gamit an saiyang mga luha dangan pinunasan iyan gamit an saiyang buhok, marigon siyang dinepensahan ni Jesus. (Mat. 8:3; Mar. 7:33; Luc. 7:44) Dai ni Jesus rinayuan an mga nasasakitan huli sa saindang mga kamatian o an mga nakagibo nin magabat na kasalan. Sa kabaliktaran, dinagka niya sindang magdulok sa saiya asin may pagmalasakit niya sindang inasigurar. Makakapagtiwala kita na papahilingan niya man kita nin arog mismo kaiyan na simpatiya.

PAG-AROG NGUNYAN SA SATONG HALANGKAW NA SASERDOTE

10. Anong espirituwal na mga probisyon an magagamit ta ngunyan para tabangan an mga bungog asin mga buta? (Hilingon man an mga ritrato.)

¹⁰ Bilang maimbod na mga parasunod ni Jesus, hinihinguwa tang arugon siya sa pagpahiling nin pagkamuot, pakikidamay, asin pagmalasakit sa iba. (1 Ped. 2:21; 3:8) Dawa ngani dai ta man kayang paumayan an mga bungog o buta, kayang-kaya ta sindang tabangan sa espirituwal. Halimbawa, an mga publikasyon na basado sa Bibliya makukua na sa labing 100 na lengguwaheng pasenyas. Asin para makinabang an mga may diperensiya sa paghiling, an mga publikasyon na nasa braille makukua sa labing 60 lengguwahe asin an mga audio description para sa satong mga video pinoprodusir sa labing 100 na lengguwahe. Nakakatabang an mga probisyon na ini sa mga bungog asin mga buta na rumani ki Jehova asin sa saiyang Aki.

11. Paano ipinapabanaag kan organisasyon ni Jehova an pagmalasakit ni Jesus para sa gabos na klase nin tawo? (Gibo 2:​5-7, 33) (Hilingon man an mga ritrato.)

¹¹ Hinihinguwa kan organisasyon ni Jehova na tabangan an gabos na klase nin tawo. Girumdumon na pagkatapos na buhayon liwat si Jesus, ibinubo niya an banal na espiritu tanganing an maugmang bareta madangog kan gabos na nagkakatiripon para sa kapiyestahan nin Pentecostes, an lambang saro sa “sadiri niyang lengguwahe.” (Basahon an Gibo 2:​5-7, 33.) Bilang pagsunod sa saiyang paggiya, nagpoprodusir an organisasyon nin mga publikasyon na basado sa Bibliya sa labing 1,000 lengguwahe, na an nagkapira diyan itinataram nin saradit na grupo nin mga tawo. Halimbawa, may mga lengguwaheng Amerindian na itinataram nin dikit na tawong nakaistar sa Norte asin Timog Amerika. Alagad, nagprodusir kita nin mga publikasyon sa labing 160 sa mga lengguwaheng iyan tanganing masiguradong mapaabutan kan maugmang bareta an pinakadakul na tawong posible. Makukua man an satong mga publikasyon sa labing 20 lengguwaheng Romany. Rinibong nagtataram kan siring na mga lengguwahe an nag-ako kan katotoohan.

12. Anong iba pang praktikal na tabang an itinatao paagi sa organisasyon ni Jehova?

¹² Apuwera sa pagdirehir sa mga paghihinguwang iyan tanganing ipalakop an maugmang bareta, an organisasyon ni Jehova nagtatao man nin ayuda sa mga biktima nin mga kalamidad. Para magibo iyan, rinibong boluntaryo an andam na nagtatabang sa saindang mga tugang na nangangaipo. Nagtatabang man an organisasyon para magkaigwa nin simpleng mga lugar nin pagsamba na diyan makakapagtiripon an mga tawo para makanuod nin urog pa manungod sa pagkamuot nin Diyos sa sainda.

KAYA KANG TABANGAN KAN SATONG HALANGKAW NA SASERDOTE

13. Ano an pirang paagi na tinatabangan kita ni Jesus?

¹³ Bilang satong marahay na pastor, tinatawan ni Jesus nin atensiyon an espirituwal na mga pangangaipo kan lambang saro sa sato. (Juan 10:14; Efe. 4:7) Kun minsan, an mga kamugtakan ta sa buhay puwedeng makapamati sa sato na garo kita mitsang madali nang mapalsok o garo nabaring tambo. Tibaad pangluyahan kitang marhay nin buot huli sa malalang hilang, sa salang nagibo ta, o sa naraot na relasyon niyato sa sarong kapwa parasamba. Tibaad nagpopokus na sana kita sa kulog na namamatian ta sa ngunyan asin nasasakitan kitang magpokus sa satong paglaom sa maabot. Pero girumdumon na nahihiling ni Jesus an inaagihan mo asin nasasabutan niya an kauruirarumi mong mga iniisip. Pinapahiro si Jesus kan pagmakulog niya na tabangan ka. Halimbawa, puwede niyang gamiton an banal na espiritu para pakusugon ka pag nangluluya ka. (Juan 16:7; Tito 3:6) Dugang pa, puwedeng gamiton ni Jesus an “mga balaog na tawo” asin an iba pang kapwa parasamba tanganing pakusugon, suportaran, asin tabangan ka.​—Efe. 4:8.

14. Ano an puwede tang gibuhon pag nadidisganar kita?

¹⁴ Kun an saimong laad nagluya o kun an saimong espiritu garo baga narunot na, hurop-hurupon an papel ni Jesus bilang satong Halangkaw na Saserdote. Girumdumon na isinugo siya ni Jehova digdi sa daga bako lang para itao an buhay niya bilang pantubos kundi para matabangan man siyang mas masabutan an mga problemang napapaatubang sa bakong perpektong mga tawo. Pag nadidisganar kita huli sa satong mga kasalan o mga kaluyahan, andam si Jesus asin gusto niyang tabangan kita “sa tamang panahon.”​—Heb. 4:​15, 16.

15. Magsaysay nin eksperyensiya na nagpapahiling kun paano puwedeng matabangan na bumalik sa kongregasyon an saro na naparayo sa aripumpon ni Jehova.

¹⁵ Ginigiyahan man ni Jesus an saiyang mga lingkod sa saindang mga paghihinguwang hanapon asin tabangan an mga naparayo sa aripumpon ni Jehova. (Mat. 18:​12, 13) Mangnuhon an eksperyensiya ni Stefano.b Doseng taon pakalihis na halion siya sa kongregasyon, nagdesisyon siyang mag-atender sa sarong pagtiripon. “Makaalangan idto, pero gusto ko na talagang magin parte giraray kan mamumuton na pamilya ni Jehova,” an sabi niya. “Ipinamati sako kan mga elder na nagkaulay sa sako na welcome ako. May mga pagkakataon na namamatian kong mayo akong halaga, saka gusto ko nang sumuko sa paghihinguwang bumalik. Pero ipinagirumdom sa sako kan mga elder na gusto ni Jehova saka ni Jesus na dai ako sumuko. Kan makabalik na ako, mamumuton akong inako kan kongregasyon pati an pamilya ko. Pag-abot nin panahon, nagpa-Bible study si agom, tapos ngunyan naglilingkod na kami ki Jehova bilang pamilya.” Siguradong maugma nanggad an satong Halangkaw na Saserdote na mahiling na natatawan an mga nagsusulsol kan tabang na kaipuhan ninda para bumalik sa kongregasyon!

16. Taano ta nagpapasalamat ka na igwa kita nin mapagmakulog na Halangkaw na Saserdote?

¹⁶ Durante kan buhay ni Jesus digdi sa daga, tinawan niya nin tabang sa tamang panahon an dakulon na tawo. Ngunyan, lubos kitang makakapagtiwala na tatabangan niya kita nuarin man kita mangaipo nin tabang. Asin sa bagong kinaban na madali nang umabot, tatabangan niya an masinunod na mga tawo na magin biyo nang talingkas sa gabos na epekto nin kasalan asin pagkabakong perpekto. Nagpapasalamat nanggad kita sa Diyos niyatong si Jehova na napahiro kan saiyang dakulang pagkamuot asin pagkahirak tanganing nombrahan an saiyang Aki na magin Halangkaw na Saserdote na nakakasabot sa sato!