Hapot Hali sa mga Parabasa
Anong “kaisipan” an ilalaag ni Jehova sa puso kan mga nasyon sa madali nang panahon?
Kun manungod sa pagpuon kan dakulang kasakitan, sinasabi kan Kapahayagan 17:16, 17: “An sampulong sungay na nahiling mo saka an mabangis na hayop, mauungis an mga ini sa hostes asin sasamsaman ninda siya saka huhubaan, asin uubuson nindang kakanon an saiyang laman saka biyo siyang tututungon sa kalayo. Huli ta ilinaag nin Diyos sa saindang puso na isagibo an saiyang kaisipan, iyo, tanganing isagibo ninda an saindang nagkakasararong kaisipan paagi sa pagtao kan saindang kahadian sa mabangis na hayop.” Kaidto, sinasabi sa satong mga publikasyon na an “kaisipan” na ilalaag ni Jehova sa puso kan mga nasyon iyo an paglaglag sa palsong relihiyon.
Alagad, kaipuhan nin pagliliwat. An “kaisipan” na ilalaag ni Jehova sa puso kan mga nasyon iyo an pagtao ninda “kan saindang kahadian sa mabangis na hayop.” Para masabutan kun paano ini mauutob, pag-ulayan ta an minasunod na mga hapot.
Sairisay an panginot na karakter sa propesiya? “An hostes,” na inaapod man na “Dakulang Babilonya,” nagrerepresentar sa pambilog na kinaban na imperyo nin palsong relihiyon. An “mabangis na hayop na mapulahon an kulor” nagrerepresentar sa United Nations, na sarong organisasyon para sa katuninungan na nagpuon na magpunsiyonar kan 1919 asin inaapod kaidtong League of Nations. (Kap. 17:3-5) “An sampulong sungay” nagrerepresentar sa gabos na gobyerno na nagsusuportar sa mabangis na hayop.
Ano an relasyon kan hostes asin kan mabangis na hayop na mapulahon an kulor? An hostes “nakasakay” sa mabangis na hayop, an buot sabihon, sinusuportaran niya an mabangis na hayop saka hinihinguwang impluwensiyahan iyan, o dominaron pa ngani.
Ano an mangyayari sa hostes? An mabangis na hayop, kaiba kan sampulong sungay na nagsusuportar diyan, “mauungis . . . sa hostes.” Huli sa grabeng pagkaungis, sasamsamon ninda an saiyang kayamanan saka ibubuyagyag an saiyang karatan. Asin isasagibo ninda an paghukom ni Jehova sa saiya—an biyo siyang laglagon. (Kap. 17:1; 18:8) Iyan an magigin katapusan kan gabos na palsong relihiyon. Pero bago mangyari iyan, papangyarihon ni Jehova na gibuhon kan mga nasyon an sarong bagay na dai pa lamang nangyari sa kasaysayan kan pamamahala nin tawo.
Ano an papangyarihon ni Jehova na gibuhon kan mga nasyon? Ilalaag niya sa puso kan sampulong sungay “an saiyang kaisipan,” an buot sabihon, ‘itatao ninda an saindang kapangyarihan asin awtoridad sa mabangis na hayop [na mapulahon an kulor]’—an United Nations. (Kap. 17:13) Pag-isipan an kahulugan kaiyan. Basta na lang daw masadiring desisyon an mga gobyerno nin tawo na itao sa mabangis na hayop an saindang kapangyarihan asin awtoridad? Dai nanggad! Ipinapahiling kan propesiya na an Diyos mismo an maimpluwensiya sa sainda na gibuhon iyan. (Tal. 21:1; ikumparar an Isaias 44:28.) Magigin luway-luway daw an pagtaong ini nin kapangyarihan? Dai! Minalataw na magigin biglaan asin marikas an pagbabagong iyan. Dangan isasagibo kan mabangis na hayop na tinawan nin kapangyarihan an paghukom ni Jehova sa gabos na palsong relihiyon paagi sa biyong paghali sa mga ini.
Kun siring, ano an puwede tang asahan? Dai ta man kaipuhan na magparaabang nin mga bareta na an mga gobyerno luway-luway na mas nagsusuportar sa United Nations. Ini an puwede tang asahan: Sa biglaan na marhay na paagi, ilalaag ni Jehova sa puso kan mga nasyon na itao sa mabangis na hayop an saindang kapangyarihan. Pag nangyari na iyan, aram tang madali nang magpuon an dakulang kasakitan. Pero mantang dai pa iyan nangyayari, “magdanay kitang mata asin tultol an pag-iisip” huling may biglaan na mga pagbabago na madali nang mangyari!—1 Tes. 5:6.