Kun Paano Gagamiton an Saimong “Espirituwal na Regalo”

Gabos kita pinapahalagahan na marhay an pagpakinurusog-kusugan kaiba an satong Kristiyanong mga tugang. Pero bako lang basta pagigin magkairibanan an kalabot sa pagpakinurusog-kusugan na iyan. Inaapod kan Bibliya na “espirituwal na regalo” an kakayahan niyato na pakusugon an pagtubod kan lambang saro. (Roma 1:​11, 12) Paano ta magagamit nin lubos an regalong iyan?

Magtaram nin piniling marhay na mga tataramon. Halimbawa pag nasa pagtiripon, puwede kitang magtao nin mga komento na nakapokus, bako sa sadiri ta, kundi ki Jehova, sa saiyang Tataramon, asin sa saiyang mga lingkod. Asin pag nakikipag-ulay sa satong mga kapagtubod, pilion na pag-ulayan an nakakapakusog na mga bagay.

Pakusugon an iba paagi kan saimong mga ginigibo asin mga desisyon. Halimbawa, an iba nagdedesisyon na magdanay sa bilog na panahon na paglilingkod sa ibong nin personal na mga kadipisilan. An iba man regular na nag-aatender sa mga pagtiripon sa tahaw kan semana dawa masakit iyan huli sa iskedyul ninda sa trabaho o dahil sa saindang malalang hilang.

Pinapakusog mo daw an mga tugang paagi kan saimong mga sinasabi asin ginigibo? Mapagrisa ka daw pag tinatawan ka ninda kan espirituwal na mga regalong ini dangan inaako iyan?