Mga May Edad Na—Kapaki-pakinabang Kamo sa Kongregasyon

Posibleng bako na man arog kadakul kan dati an kaya mong gibuhon dahil sa mga epekto nin paggurang. Dawa dakul na taon ka nang maimbod na naglilingkod ki Jehova, tibaad magin negatibo an paghiling mo sa saimong sadiri huli sa mga limitasyon mo ngunyan. Halimbawa, tibaad magkaigwa ka kan tendensiyang ikumparar an mga nagigibo mo ngunyan sa mga nagigibo mo kaidto. Kun iyo, paano mo malalabanan an arog kaiyan na kaisipan?

KUN ANO AN INAASAHAN SA SAIMO NI JEHOVA

Haputon an sadiri, ‘Ano an inaasahan sa sako ni Jehova?’ Mararanga ka kan mga tataramon na nasa Deuteronomio 6:​5, na an sabi: “Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong kusog.”

Uyon sa bersikulong iyan, inaasahan ni Jehova na paglilingkudan mo siya sa bilog mong puso, kalag, asin kusog. An katotoohan na iyan makakatabang sa saimo na malikayan na ikumparar an sadiri mo sa iba—o na ikumparar an mga kaya mong gibuhon ngunyan sa kun ano an mga kaya mong gibuhon kaidto.

Pag-isipan ini: Kan mas hoben ka pa, ano an itinatao mo kaidto ki Jehova? Arog kan kadaklan na lingkod ni Jehova, posibleng sasabihon mo na an itinatao mo ki Jehova iyo an pinakamakakaya mo kauyon kan saimong mga kamugtakan kaidto. Ano an mga kaya mong itao ki Jehova sa ngunyan? Posibleng marhay na an itinatao mo sa saiya iyo an pinakamakakaya mo kauyon kan saimong mga kamugtakan sa ngunyan—an kaya mong gibuhon sa presente. Kun arog kaiyan an magigin pagmansay mo sa mga bagay-bagay, marerealisar mong an itinatao mo ki Jehova sa ngunyan pareho man sana kan itinatao mo sa saiya kaidto. Iyo, an pinakamakakaya mo an itinatao mo sa saiya kaidto asin an pinakamakakaya mo man an itinatao mo sa saiya ngunyan.

PUWEDE KANG MAGIN DAKULANG TABANG SA IBA

Ini an saro pang puwedeng isip-isipon: Imbes na ibilang na limitasyon an saimong edad, hinguwahon na ibilang iyan na oportunidad. Sa katunayan, ngunyan na saro ka nang may edad na Kristiyano, may mga bagay na kaya mong gibuhon ngunyan na dai mo magigibo kaidtong mas hoben ka pa. Halimbawa:

Ihiras sa iba an saimong mga eksperyensiya. Pag-isipan an minasunod na mga kapahayagan na nakasurat sa Bibliya:

Hading David: “Hoben pa ako kaidto asin gurang na ngunyan, pero dai pa akong nahiling na siisay man na matanos na pinabayaan, ni nahiling na mga aki niya na nakikilimos nin makakakan.”​—Sal. 37:25.

Josue: “Ngunyan hilinga! madali na akong magadan, asin aram na aram nindo sa bilog nindong puso asin sa bilog nindong kalag na mayo ni sarong tataramon sa gabos na marahay na panuga na ipinanuga sa saindo ni Jehova na saindong Diyos an dai nautob. Nangyari an gabos na iyan para sa saindo. Mayo ni sarong tataramon sa mga iyan an dai nautob.”​—Jos. 23:14.

Si David asin Josue mga dekada nang naglingkod ki Jehova asin dakul nang nagin eksperyensiya sa buhay. Pareho sindang nagtaram basado sa saindang personal na mga eksperyensiya. Kan mas hoben ka pa, tibaad nakapagsabi ka na man nin kaagid kan sinabi ninda. Alagad ngunyan na may edad ka na, arog ni David asin Josue, mas makahulugan na an mga sinasabi mo huling nakabasar iyan sa dakul na taon na mga nagin eksperyensiya mo sa buhay.

Kun haloy ka nang naglilingkod ki Jehova, puwede mo man iistorya sa iba an personal mong mga eksperyensiya manungod sa mga balos na nakamtan mo sa paglilingkod sa saiya. Igwa ka daw nin dai malilingawan na eksperyensiya na diyan nahiling mo kun paano binendisyunan ni Jehova sa kahanga-hangang paagi an saiyang mga lingkod? Kun igwa, iistorya iyan sa iba! Puwede iyan na magin nakakapakusog na marhay, arog kan tibaad namatian mo kaidtong mag-istorya ka sa iba nin sarong nakakapakusog na eksperyensiya. Asin pag nadadangog kan iba an saimong mga eksperyensiya sa paglilingkod ki Jehova, puwede kang magin mahalagang marhay na gikanan nin pampakusog sa sainda.​—Roma 1:​11, 12.

An saro pang paagi na mapapakusog mo an iba iyo an pag-atender nin in person sa mga pagtiripon kan kongregasyon, sagkod sa itinutugot kan saimong kamugtakan. Diyan mapapakusog mo an mga tugang asin an sadiri mo. Si Connie, na sinambit kasubago, nagsabi: “An pag-atender sa mga pagtiripon nakakatabang sa sako na pangluyahan nin buot. Paano pa man ako makakamati nin pangluluya nin buot kun labi-labing pagkamuot an ipinapamati sako kan mga tugang sa Kingdom Hall? Hinihinguwa kong ipahiling an pasasalamat ko sa iba paagi sa pagtao sa sainda nin simpleng mga regalo. Saka sinisigurado kong padagos akong nakikikabtang sa espirituwal na mga aktibidad, kaiba kan mga tugang.”

PINAPAHALAGAHAN NI JEHOVA AN SAIMONG MAIMBOD NA PAGLILINGKOD

Dakulon sa Kasuratan nin mga halimbawa nin mga tawong limitado na an nagigibo dahil sa saindang kamugtakan alagad namumutan ni Jehova. Pag-isipan si Simeon, sarong may edad nang Israelita na buhay pa kaidto kan mamundag si Jesus. Durante kan mga pagbisita ni Simeon sa templo, posibleng marhay na napagmasdan niya an mas hoben na mga lalaki na nag-aasikaso sa mahalagang mga trabaho diyan. Pero ano an paghiling ni Simeon sa sadiri niya? Tibaad inisip niyang dahil gurang na siya bako na siya gayong mahalaga sa paghiling ni Jehova. Alagad iba an paghiling ni Jehova sa mga bagay-bagay. Para ki Jehova, “matanos saka maki-Diyos” si Simeon saka tinawan Niya siya kan pribilehiyong mahiling an umboy na si Jesus. Ginamit pa ngani ni Jehova si Simeon tanganing itao an sarong propesiya manungod ki Jesus, na iyo an magigin Mesiyas! (Luc. 2:​25-35) Malinaw na an pighiling ni Jehova bako an pagigin gurang na ni Simeon, kundi an saiyang makusog na pagtubod, “asin yaon sa saiya an banal na espiritu.”

Makakasigurado ka man na pinapahalagahan ni Jehova an maimbod mong paglilingkod sa saiya sa ibong kan ano man na limitasyon na tibaad igwa ka. Sa paghiling niya, an sarong atang “mas lalo nang kawili-wili [pag iyan itinatao] sigun sa kun ano an igwa an sarong tawo, bakong sigun sa kun ano an mayo an sarong tawo.”​—2 Cor. 8:12.

Kaya, magpokus sa kun ano an mga kaya mong gibuhon. Halimbawa, anong mga porma nin ministeryo an diyan kaya mo pang magpartisipar—dawa kun sa haralipot sanang oras? Kaya mo pa daw na magtabang sa iba paagi sa halipot na pag-apod sa sainda sa telepono o paagi sa pagtao sa sainda nin kard? An simpleng mga kapahayagan nin pagkamuot puwedeng magkaigwa nin dakulang epekto sa saimong mga kapagtubod, lalo na pag an naggigibo kaiyan sarong haloy nang lingkod ni Jehova.

An iba man igwa nin pisikal na mga limitasyon. Mangnuhon an eksperyensiya hali sa Sirangan na Aprika sa kahon na “Nailigtas Kaiyan an Buhay Niya” na yaon sa artikulong ini.

Dai paglingawan na an dakul na taon na maimbod na paglilingkod mo ki Jehova puwedeng makapakusog sa iba. Saro kang buhay na halimbawa nin pakatagal, asin makakasigurado ka na “an Diyos bakong biko para lingawan niya an [saimong] ginibo asin an pagkamuot na ipinahiling [mo] para sa saiyang pangaran paagi sa paglilingkod asin padagos pang paglilingkod sa mga banal.”​—Heb. 6:10.

MAGDANAY NA AKTIBO SAGKOD SA MAKAKAYA MO

Ipinaparisa kan mga pagsiyasat na dakul na may edad nang lalaki asin babayi na aktibo sa pagtabang sa iba an mas marahay an salud, mas klarong mag-isip, saka mas halawig an buhay.

Siyempre, an paggibo nin marahay sa iba dai man makakahali kan gabos na epekto nin paggurang. Solamenteng an Kahadian nin Diyos an makakagibo kaiyan paagi sa paghali sa pinakakawsa nin paggurang asin kagadanan—an satong makasalan na kamugtakan.​—Roma 5:12.

Alagad dawa ngunyan, an paglilingkod na itinatao mo ki Jehova—kaiba na diyan an pagtabang sa iba na mamidbid siya—nakakatabang na magdanay na makusog an saimong paglaom asin puwede pa nganing magkaigwa nin marahay na epekto sa saimong salud. Namumutan na mga may edad na, dai tabi paglingawan na pinapahalagahan nanggad ni Jehova an mga ginigibo nindong paglilingkod sa saiya asin na pinapahalagahan man na marhay kan kongregasyon an saindong halimbawa nin pagtubod.