Trinilyon an Ginagastos sa Giyera—Iyan Lang Daw Talaga an Nagigin Danyos?

Dakulaon an ginagastos sa giyera.

• “An nagastos sa puwersa militar sa bilog na kinaban uminabot sa pinakahalangkaw na kantidad na $2.2 trilyones huli sa mga giyera.”—The Washington Post, Pebrero 13, 2024.

Labi pang marhay sa kuwarta an nagigin danyos. Isipa an saro sanang halimbawa: An giyera sa Ukraine.

• Mga suldados. Sigun sa nagkapirang pagkarkulo, haros 500,000 nang suldados an nagadan o nairido sa giyera na nagpuon duwang taon na an nakalihis.

• Mga sibilyan. Labing 28,000 an nagadan o nairido, uyon sa United Nations. Pero sinabi nin sarong halangkaw na opisyal kan UN: “An nagdadanay na epekto kan mapandestrosong giyerang ini sa mga sibilyan dai nanggad lubos na masusukol o maaaraman.”a

Nagkawsa nin labi-labing pagsakit sa mga tawo an mga giyera asin mga ralaban sa manlain-lain na parte kan kinaban.

• 114 milyones. An bilang nin mga tawo sa bilog na kinaban, pag-abot kan Setyembre 2023, na napiritan na maghali sa sadiri nindang lugar huli sa giyera saka kadahasan.

• 783 milyones. An bilang nin mga tawong padagos na nakakaeksperyensiya nin kakulangan nin kakanon. “An mga ralaban iyo pa man giraray an panginot na dahilan nin kakulangan nin kakanon, mga 70 porsiyento kan mga tawong nakakaeksperyensiya kaiyan sa kinaban nakaistar sa mga lugar na apektado nin giyera asin kadahasan.”—World Food Programme.

Matatapos pa daw an mga giyera? May paglaom daw na makamtan ta an katuninungan? Maabot daw an panahon na an abundang yaman kan satong planeta gagamiton tanganing dai na magkaigwa nin kakulangan nin kakanon asin mahali na an pagtios? Ano an sinasabi kan Bibliya?

Sarong panahon nin giyera

Ihinula kan Bibliya an nangyayaring mga giyera sa manlain-lain na parte kan kinaban, na ilinaladawan iyan na sarong simbolikong parakabayo.

• “Saro pang kabayo an luminuwas, sarong kabayo na kulor kalayo, asin tinugutan an nakasakay diyan na halion an katuninungan sa daga tanganing maggaradanan an mga tawo, asin sarong dakulang espada an itinao sa saiya.”—Kapahayagan 6:4.

An simbolikong parakabayong iyan sinusundan nin duwa pang parakabayo na nagrerepresentar sa lakop na tiggutom asin kagadanan huli sa epidemya asin sa iba pang kadahilanan. (Kapahayagan 6:5-8) Para sa dagdag na impormasyon manungod sa propesiyang ini sa Bibliya asin kun taano ta makakasigurado kitang nauutob na iyan sa panahon ta, basahon an artikulong “An Apat na Parakabayo—Siisay Sinda?”

Sarong matuninong na puturo

Dai na mahahaloy, an mga yaman kan satong planeta dai na gagamiton para sa giyera. Pero bako iyan dahil sa paghihinguwa nin tawo. Sinasabi kan Bibliya:

• “[Papapunduhon nin Diyos] an mga giyera sa bilog na daga.”—Salmo 46:9.

• Hahalion nin Diyos an marauton asin nakakamundong mga epekto nin giyera. “Papahidon niya an lambang luha sa saindang mga mata, asin an kagadanan mawawara na. Dai na man magkakaigwa nin pagmundo, o nin pagtangis, o nin kulog. An mga dating bagay nakalihis na.”—Kapahayagan 21:4.

• Sisiguraduhon nin Diyos na makakamtan kan gabos an nagdadanay na katuninungan. “Maistar an sakong banwaan sa sarong matuninong na permanenteng lugar, sa ligtas na mga istaran asin sa trangkilong mga irukan.”—Isaias 32:18.

Uyon sa mga propesiya sa Bibliya, an nahihiling ta ngunyan na mga giyera asin iba pang mga pangyayari nagpaparisa na an panahon na iyan nin katuninungan madali nang umabot.

Paano ipapaabot nin Diyos an matuninong na puturong iyan? Gigibuhon niya iyan paagi sa saiyang langitnon na gobyerno, o Kahadian. (Mateo 6:10) Para maaraman kun ano an Kahadian na iyan asin kun ano an puwedeng maitao kaiyan saimo, hilingon an halipot na video na Ano an Kahadian nin Diyos?