Ano an Buot Sabihon kan Pagigin Kristiyano?—Ano an Sinasabi kan Bibliya?

Dakul na tawo ngunyan sa bilog na kinaban an proud na ibilang an sadiri ninda na sarong Kristiyano; pero, minagawi sinda sa paaging nakakakulog sa ibang tawo. An nagkapira makasadiri, madaya, o bakong mabuot. An iba tibaad bakong maimbod sa saindang agom. Dahil sa mga paggawi ninda, napapaisip an mga tawo: ‘Ano daw talaga an buot sabihon kan pagigin sarong Kristiyano?’

Kun ano talaga an buot sabihon kan pagigin sarong Kristiyano

Madali sana para sa saro na sabihon na Kristiyano siya. Pero urog pa diyan an kaipuhan. Uyon sa Bibliya, inaapod na Kristiyano an sarong disipulo ni Jesu-Cristo. (Gibo 11:26) Sinabi mismo ni Jesus: “Kun magdadanay kamo sa sakuyang tataramon, kamo talaga an sakuyang mga disipulo.” (Juan 8:31) Siyempre, mayong tawo an perpektong makakasunod sa mga tataramon ni Jesus. Pero hinihinguwa nin sarong Kristiyano na sunudon asin isabuhay sa aroaldaw an mga itinukdo ni Jesus. Pag-isipan an pirang halimbawa.

An mga Kristiyano nagpapahiling nin bakong makasadiring pagkamuot

An sabi ni Jesus: “Tinatawan ko kamo nin sarong bagong tugon, na kamutan nindo an lambang saro; kamutan nindo an lambang saro arog kan pagkamuot ko sa saindo. Paagi kaini, maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.”—Juan 13:34, 35.

An ginibo ni Jesus: Nagpahiling si Jesus nin pagkamuot sa gabos na tawo, ano man an saindang estado sa buhay o pinaghalian. Pinaumayan niya an mga may hilang, pinakakan an mga nagugutom, asin itinao pa ngani an saiyang buhay para sa iba.—Mateo 14:14-21; 20:28.

An ginigibo kan mga Kristiyano: Nagpapahiling an mga Kristiyano nin bakong makasadiring pagkamuot paagi sa pagigin bukas-palad, daing pinapalain, saka mapagpatawad. Tinatabangan ninda an mga nangangaipo, asin andam sinda na gumibo nin mga pagsasakripisyo para sa iba.—1 Juan 3:16.

An mga Kristiyano onesto

An sabi ni Jesus: “Ako an . . . katotoohan.”—Juan 14:6.

An ginibo ni Jesus: Onesto si Jesus sa gabos na sinabi asin ginibo niya. Dai siya nuarin man nagtaram nin bakong totoo o nin mapandayang mga tataramon. Midbid siya sa pagigin onesto, dawa ngani puwede iyan magin dahilan para kontrahon siya.—Mateo 22:16; 26:63-67.

An ginigibo kan mga Kristiyano: An mga Kristiyano nagsasabi nin totoo. Nagbabayad sindang buhis, dai naghahabon, saka mahigos sindang nagtatrabaho kauyon kan isinusuweldo sa sainda. (Roma 13:5-7; Efeso 4:28) Dai ninda dinadaya an iba para sa sadiri nindang kapakinabangan, ni nandadaya man sa mga exam o naglalaag nin salang impormasyon sa saindang résumé o kaagid na mga dokumento.—Hebreo 13:18.

An mga Kristiyano nagpapahiling nin kabuutan

An sabi ni Jesus: “Madya kamo sa sako, kamo gabos na nagpapagal saka nagagabatan, asin papaginhawahon ko kamo. Pasanon nindo an sakuyang sakal asin makanuod kamo sa sako, huli ta ako may mahuyong buot saka may mapakumbabang puso, asin magiginhawahan kamo. Huli ta an sakuyang sakal komportable, asin an sakuyang pasan magian.”—Mateo 11:28-30.

An ginibo ni Jesus: Si Jesus mabuot saka madaling dulukon. Harani sa saiya an mga aki, asin rinanga niya an mga nagmumundo saka trinatar an iba nin may dignidad.—Marcos 10:13-15; Lucas 9:11.

An ginigibo kan mga Kristiyano: An mga Kristiyano nagtataram nin may kabuutan sa iba; magalang sinda saka dai nang-iinsulto. (Efeso 4:29, 31, 32) Nagpapahiling sinda nin interes sa iba asin naghahanap nin mga oportunidad na makatabang.—Galacia 6:10.

An mga Kristiyano maimbod sa saindang agom

An sabi ni Jesus: “An pinagsaro nin Diyos dai pagsuwayon nin siisay man na tawo.”—Marcos 10:9.

An ginibo ni Jesus: Dawa ngani dai nag-agom si Jesus, dinagka niya an mga mag-agom na magin maimbod sa kada saro. (Mateo 19:9) Nagpatanid siya manungod sa mga bagay na puwedeng makaraot sa relasyon nin mag-agom.—Mateo 5:28.

An ginigibo kan mga Kristiyano: Linilikayan kan mga Kristiyano an mga paggawi na dai nagtataong onra sa saindang agom. (Hebreo 13:4) Dapat na tinatratar kan mag-agom an lambang saro nin may pagkamuot asin paggalang.—Efeso 5:28, 33.