Giyera sa Middle East—Ano an Sinasabi kan Bibliya?

An mga tawo sa bilog na kinaban nahahadit sa nangyayaring giyera kan Estados Unidos, Israel, asin Iran. Malala pa daw an sitwasyon asin dakul na nasyon pa an maaapektaran kaiyan? Kaya daw kan mga gobyerno na pugulan an mga giyera asin gibuhon na matuninong an kinaban?

An mga tawong may aram sa mga propesiya sa Bibliya tibaad mag-isip na an nangyayaring giyera sa Middle East iyo na an kapinunan kan ralaban nin Armagedon na sinambit sa libro kan Kapahayagan.

Ano an sinasabi kan Bibliya?

Kaya daw tapuson kan mga gobyerno an giyera sa Middle East?

Sinasabi kan Bibliya: “Dai kamo magtiwala sa mga pamayo ni sa aki nin tawo, na dai makakapagligtas.”—Salmo 146:3.

Dai ta sigurado kun kaya kan mga gobyerno na gibuhon na mas marahay an sitwasyon sa Middle East. Pero, malinaw na sinasabi kan Bibliya na mayong pulitiko, gobyerno, o grupo nin mga tawo an kayang tapuson an giyera saka magdara nin nagdadanay na katuninungan. An Diyos sana an ‘makakapapundo kan mga giyera sa bilog na daga.’—Salmo 46:9.

• Para sa dagdag na impormasyon, basahon an magasin na Torrengbantayan na may titulong “Mawawara Na an Giyera—Paano?”

Nauutob daw kan giyera sa Middle East an propesiya?

Sinasabi kan Bibliya: “Makakadangog kamo nin ribok nin mga giyera asin mga bareta manungod sa mga giyera. . . . An nasyon makikilaban sa nasyon asin an kahadian makikilaban sa kahadian.”—Mateo 24:6, 7.

An giyera ngunyan sa Middle East saro sana sa mga pangyayari na tanda kan “pagtatapos kan sistema nin mga bagay” asin saro pang ebidensiya na nabubuhay na kita sa “huring mga aldaw.” (Mateo 24:3; 2 Timoteo 3:1) An mga giyera na nahihiling ta ngunyan tanda na madali nang tapuson nin Diyos an giyera asin an iba pang mga problema na nagpapasakit sa mga tawo.

• Para sa dagdag na impormasyon, basahon an artikulong “Ano an Tanda kan “Huring mga Aldaw,” o ‘Katapusan kan Panahon’?”

Mapuon daw an Armagedon sa Middle East?

Sinasabi kan Bibliya: “Tiniripon sinda kan mga iyan sa lugar na sa Hebreo inaapod na Armagedon.”—Kapahayagan 16:16.

An giyera nin Armagedon bakong giyera nin mga gobyerno nin tawo na mapuon sa Middle East. Saro ining pambilog na kinaban na giyera kan gabos na gobyerno nin tawo asin kan Diyos.

• Para sa dagdag na impormasyon, basahon an artikulong “Ano an Ralaban nin Armagedon?”

Paano kita magigin kalmado sa ibong kan nakaka-stress na mga nangyayari?

Sinasabi kan Bibliya: “Dai kamo mahadit sa ano man na bagay, kundi sa gabos na bagay paagi sa pamibi asin pagngayo-ngayo na may kaibang pasasalamat, ipaaram nindo sa Diyos an saindong mga kahagadan.”—Filipos 4:6.

An Diyos na Jehovaa inaagda kita na mamibi sa saiya. Huling nagmamakulog an Diyos sa sato, dadangugon niya an satong pamibi asin tatabangan niya kita na makayanan an mga ikinakahadit ta. (1 Pedro 5:7) Sarong paagi na ginigibo niya iyan iyo na tinatabangan niya kitang masabutan bako sana kun taano ta may nangyayaring mga giyera, kundi tinatabangan niya man kitang masabutan kun paano niya tatapuson an mga iyan asin kun ano an gigibuhon niya para halion an satong mga pagsakit.—Kapahayagan 21:3, 4.

• Para mas maaraman pa kun paano kita tinatabangan nin Diyos, basahon an artikulong “Makakatulong Ba Talaga sa Akin ang Sinasabi ng Bibliya?”