An Maugmang Bareta Sigun ki Jesus—Sa Likod kan Kamera

An saro sa pinakainabangan kan mga Saksi ni Jehova sa taon na ini iyo an pag-release kan Episode 1 kan An Maugmang Bareta Sigun ki Jesus. Minilyon an nakahiling na kaiyan. Asin iyan pa lang an inot sa 18 episode! Anong mga pangyayari sa likod kan kamera an nagpapagin posible na magibo an seryeng ini nin mga video, asin paano ka nakakasuportar sa mga paghihinguwang iyan?

Pag-asikaso sa mga Cast Asin Crew

Sa sangang opisina sa Australasia, kun sain ginigibo an kadaklan sa mga eksena kan seryeng An Maugmang Bareta, mga 50 sagkod 80 katawo an nasa set mantang ginigibo an kada eksena.a Pigseserbihan nin pangudtuhan, pamanggihan, asin mirindalan an gabos na cast asin crew. Haloy pa, nakaplano na an mga kakanon. “Nagbabakal kami sa manlain-lain na suplayer tanganing makakua nin marahay na klaseng mga sangkap sa pinakasulit na presyo,” an sabi ni Esther, na nagtatrabaho sa Food Service Department. “Asin parati ming ina-adjust an samong mga resipe para masiguradong mabawasan an mga nasasayang.” Kada aldaw, mga apat na dolyar (U.S.) sa kada tawo an gastos sa kakanon.

Bako lang kakanon an kaipuhan kan samong mga cast asin crew kundi pati man an proteksiyon. Sa ano? Sa parati, magayon asin mainit an panahon sa Australia, pero halangkaw man an lebel nin nakakaraot na radyasyon. Para mabawasan an peligro nin pagkabantad diyan asin malikayan an kapagalan huli sa init, naglalaag an mga production assistant nin mga tent asin nin mga lugar na diyan puwede sindang magpapresko, asin sinisigurado ninda na pirming igwa nin sunscreen, payong, asin tubig. Si Kevin, na nagtatrabaho sa Audio/Video Services, nagsabi: “An kadaklan sa mga production assistant na ini mga commuter Bethelite. Ginigibo ninda an trabahong ini asin an iba pa nin may kapakumbabaan asin kaugmahan. Dai mi magigibo an proyektong ini kun mayo sinda.”

Pag-shooting Harayo sa Sangang Opisina

May mga eksena na dai magigin magayon kun sa sangang opisina gigibuhon, iyan man sa set sa luwas o sa istudyo. Pag arog kaiyan, ginigibo an eksena sa ibang mga lokasyon. Para magibo an mga eksenang tampok an suanoy na mga pangyayari sa Bibliya na diyan mayo dapat nin mga linya nin kuryente, sementadong tinampo, asin modernong mga edipisyo, sa parati kaipuhan kan mga cast asin crew na magbiyahe sa hararayong lugar. An saindang mga costume, props, asin mga gamit kaipuhan na impakehon, ibiyahe, dangan maingat na isaray sa lokasyon kun sain gigibuhon an eksena. Bago magpuon an pag-shooting, sinisigurado kan mga assistant production coordinator na igwa nin mga generator, malinig na inumon na tubig, asin mga banyo. An mga cast asin crew nagdadagos sa mga harong kan mapag-istimar na mga Saksing taga duman, sa mga trailer, o sa mga hotel o cabin.

An pag-shooting sa ibang mga lokasyon puwedeng magin magastos, makipanahon, asin nakakapagal para sa gabos. Kaya kan 2023, inaprubaran kan Namamahalang Grupo an pagbakal kan 2.5 milyones na dolyar (U.S.) na video wall. An teknolohiyang ini naggagamit nin high-resolution na mga video screen asin nin lighting na nag-a-adjust sa kun ano an ipinapahiling sa screen tanganing an eksena magin garo baga kinua sa mga lokasyon sa luwas. Bilang resulta, sa parati nalilikayan ta an magastos na pag-shooting sa ibang mga lokasyon. Si Darren, na sarong miyembro kan Komite kan Sangay nin Australasia, nagsabi: “Dahil sa video wall, dai napapagal na marhay an mga cast saka nagigin posible para sa mga crew na utruhon na gibuhon an partikular na mga eksena. Halimbawa, kun sa sarong lokasyon sa luwas mi gigibuhon an sarong eksena nin pagsulnop nin saldang, igwa lang kami nin pirang minuto para gibuhon iyan. Pero gamit an video wall, puwede ming uruutruhon na gibuhon an arog kaiyan na eksena sagkod na igwa na kami kan tamang kua.”

“Dai Ko . . . Namati na Pagsasakripisyo an Ginibo Ko”

Ginatos na cast asin mas dakul pa diyan na crew an kaipuhan sa kada episode kan seryeng An Maugmang Bareta. Ano an namamatian ninda sa gabos na paghihinguwa kan mga tugang para maasikaso sinda?

Si Amber, na nagbiyahe nin labing 700 kilometros hali sa saiyang harong sa Melbourne para magpartisipar sa proyekto, nagsurat: “Pag-abot ko pa lang sa airport, inasikaso na akong marhay kan mga tugang sa Bethel. Dakul na Bethelite an nag-imbitar sako na magkakan kaiba ninda o mag-inom nin tsa. Pag nasa set, pamugtak an buot ko sa gabos saka ipinamati nindang namumutan ako. Dakulon akong inakong bendisyon. Dai ko lamang namati na pagsasakripisyo an ginibo ko!”

Si Derek na nagtatrabaho sa production team nagsabi: “Dakulon na departamento an nagtatabang samo puon pa sa kapinunan. Nagpapasalamat talaga akong makatrabaho an mga brother saka mga sister na nagsakripisyo kan saindang panahon, materyal na mga bagay, asin kusog para sa proyektong ini. Mapagsuportar sinda, andam na tumabang, saka mabuot. Hiling-hiling na benindisyunan sinda ni Jehova pati man kami. Kumbinsido ako na mahalaga saiya bako lang an resulta kan samong trabaho kundi pati man kun paano mi ginigibo an trabaho mi.”

Salamat sa pagsuportar nindo sa seryeng ini nin mga video paagi sa saindong mga donasyon, kaiba na an mga itinao nindo paagi sa donate.jw.org.