An Video na Jehovah’s Witnesses—Organized to Share the Good News
An Mga Saksi ni Jehova inorganisar tanganing ipalakop an maogmang bareta sa laog nin labi nang 100 na taon. Sa pinakadakulang kampanyang ini nin paghuhulit kasuarin man sa kinaban, ihinahayag niato an mensaheng ini sa ginatos na lenguahe asin sa labing 230 kadagaan. (Mat. 24:14) Taano ta kaipuhan an gibohon na ini? Paano iyan ginigibo sa bilog na kinaban? An mga hapot na iyan sinisimbag kan video na Jehovah’s Witnesses—Organized to Share the Good News paagi sa pagtao nin orog na detalye dapit sa dakol na aspekto kan satong internasyonal na mga aktibidad. Pagkatapos dalanon o helingon an video, isip-isipon an minasunod na mga hapot.
Paano pinararom kan video na ini an saindong pag-apresyar sa (1) paghihingoa kan organisasyon ni Jehova na ipalakop an maogmang bareta? (2 Tim. 4:2) (2) mga pamilyang Bethel sa bilog na kinaban? (3) pagsasanay sa mga misyonero asin paraataman? (2 Tim. 2:2) (4) kahalagahan nin pagpopoon kan kada aldaw paagi sa pagtokar sa sarong teksto sa Biblia asin pag-andam kada semana para sa mga pagtiripon kan kongregasyon? (Gui. 17:11) (5) mga pakinabang nin pag-atender sa satong Kristianong mga pagtiripon? (Heb. 10:24, 25) (6) mga bendisyon na aakoon nindo kun magin Paraiso na an daga? (Isa. 11:9) (7) pribilehio nindo na makikabtang sa nagpapadagos na pag-ani?—Juan 4:35.
An video na ini marahayon na pantabang sa mga interesado na magin pamilyar sa pambilog na kinaban na gibohon kan Mga Saksi ni Jehova. (8) Noarin ini marahay na ipadalan sa satong mga tinotokdoan sa Biblia, paryente, asin iba pa? (9) Anong positibong reaksion an naheling nindo kan ipadalan nindo iyan sa sainda?
Mantang hinohorophorop niato an mga ginigibo ni Jehova, napapahiro kitang arogon an saboot kan salmista: ‘Pinapagdugang mo, oh Jehova, Dios ko, an saimong mga gibong ngangalasan; asin an saimong mga pag-isip manongod sa samuya, dai niamo iyan sa saimo ikakasaysay [“mayo nin ikakabaing sa saimo,” NW].’ (Sal. 40:5) Gamiton logod niato nin epektibo an video na ini tanganing tabangan an iba na magpatalubo nin pag-apresyar ki Jehova asin sa saiyang organisasyon!