Epekto kan mga Video na Nagpapatotoo
1 “An samong aking lalaki dinadalan na an video poon pa kan bago sia maglakaw. Paorootro nia iyan na dinadalan. Marahayon nanggad na magkaigwa nin mga kasangkapan na itinatadom sa samong mga aki an pagkamoot ki Jehova!” Arin na video an sinasabi kan Kristianong magurang na ini? An may temang Noah—He Walked With God. An sarong ina na bakong Saksi na an aking lalaki nadalan na an video na Noah sa harong nin iba nagpadara sa sangang opisina nin $90 na donasyon asin naghapot kun igwa kita nin iba pang mga video para sa mga aki. An mga video na prinodusir kan organisasyon ni Jehova nagkakaigwa nin makosog na epekto pareho sa mga hoben asin gurang.
2 Sa Pamilya: Pakatapos na magdalan an sarong pamilyang Saksi kan Jehovah’s Witnesses Stand Firm Against Nazi Assault, isinaysay kan ina: “Pinensar ko sa bilog na aldaw kun paano pinangyari ni Jehova na matagalan kan ordinaryong mga tawo an pambihirang mga bagay! An pag-isip-isip manongod kaiyan nagpagirumdom sa sako kun gurano kadaing halaga kan sako mismong mga problema. An pagdalan kan video na ini kaiba kan samong mga aki nakatabang sa sainda na maheling nin mas malinaw an pangangaipo na magsarig ki Jehova. Paagi sa pakipag-olay kaiyan sa sainda pagkatapos, natabangan mi an samong mga aking babae na magin mas andam na makayanan an ano man na mga pan-iimpluwensia asin paglamag na tibaad mapaatubang sa sainda.”
3 Sa Eskuelahan: Bilang kabtang kan sarong bareta, an sarong Saksing tinedyer ipinadalan sa saiyang klase an sarong kabtang kan video na Stand Firm. Kan nakaagi, an paratokdo nagsabi na habo nia sa mga Saksi. Pakadalan kan video, sia nagsabi: “Biyo kaining binago an sakong punto de vista sa Mga Saksi ni Jehova. Ipinangangako ko na sa masunod nindang pagduman sa sakong pinto, mahinanyog ako sa sainda asin mapoon na akong makipag-adal sa sainda sa Biblia!” Ano an nagpabago kan saiyang impresyon manongod sa sato? An sabi nia an satong “tunay na pagkamoot asin kaimbodan.”
4 Sa Ministeryo: An sarong tugang na babae nakanompong nin sarong babae na nagduwaduwang mag-ako nin babasahon, minsan ngani may mga hapot ini manongod sa sato asin sa satong mga tinutubod. Nagbalik an tugang na babae na dara an video na Jehovah’s Witnesses—The Organization Behind the Name asin ipinadalan iyan sa babae asin sa saiyang agom. An duwa natudok na marhay an isip asin nag-oyon na mag-adal sa Biblia. Bilang resulta kan marahay na patotoo sa sainda, nagpoon sindang ioyon an saindang buhay sa kabotan nin Dios.
5 Ginagamit daw nindo an satong mga video sa pinakalubos na potensial kaiyan?