Gamiton an Bisual na mga Pantabang na Nakakapagtokdo
1. Paano ginamit kaidto ni Jehova an bisual na mga pantabang sa pagtokdo sa saiyang suanoy na mga lingkod, asin may anong epekto?
1 Kun beses, ginagamit kaidto ni Jehova an mga bisyon asin pangatorogan tangani na ipaabot an importanteng impormasyon sa saiyang suanoy na mga lingkod. Isip-isipa an bisyon ni Ezequiel kan langitnon na karuwahe ni Jehova. (Ezeq. 1:1-28) Imahinara kun ano an namatean ni Daniel pagkatapos na akoon an makahulang pangatorogan na naglaladawan kan pag-abante kan mga kapangyarihan pankinaban. (Dan. 7:1-15, 28) Asin kumusta man an manongod sa nakakapukaw sa boot na kapahayagan na itinao ki apostol Juan paagi “sa mga tanda” mapadapit sa mga bagay na mangyayari durante kan “aldaw kan Kagurangnan”? (Kap. 1:1, 10) Tinokdoan sinda ni Jehova na ginagamit an buhay na marhay na kolor asin dinamikong aksion, asin iyan nagkaigwa nin nagdadanay na epekto sa saindang isip.
2. Anong bisual na mga pantabang an magagamit niato sa pagtokdo sa iba kan mga katotoohan sa Biblia?
2 Kun boot niatong ipaliwanag sa iba an mga katotoohan sa Biblia na may epekto na dai tolos malilingawan, puede man niatong gamiton sa pagtokdo an satong mga video. An satong mga video igwa nin kadakol na topiko asin iyan nagpapatalubo sa kompiansa sa Biblia, sa organisasyon ni Jehova, asin sa mga prinsipyo na nagpapakarhay kan Kristianong pamumuhay. Estudyare an nagkapirang paagi na magagamit niato an satong mga video sa pagtokdo. An minasunod mga sampol kan mga video na puedeng gamiton.
3. Ano an magagamit nindo tangani na giyahan pasiring sa organisasyon an sarong inaadalan sa Biblia?
3 Sa Ministeryo: Sinasabi na daw nindo sa sarong inaadalan sa Biblia an manongod sa satong panglobong Kristianong kasararoan nin magturugang? Ipadalan iyan sa saiya paagi sa video na Our Whole Association of Brothers. Magsalang ipasubli iyan sa saiya tangani na madalan bago an masunod nindong pag-adal o dalanon iyan nin magkaibanan durante kan maabot na pag-adal nindo. Dangan pag-olayan an mga hapot sa repaso na yaon sa An Satong Ministeryo sa Kahadean na Hunyo 2002.
4. Anong mga kasangkapan sa pagtokdo an puedeng gamiton sa eskuelahan nin sarong hoben na Saksi?
4 Mga hoben, puede nindong kaolayon an saindong maestra manongod sa posibilidad na ipadalan sa saindong klase an dapit sa aktuwal na mga pangyayari sa video na Jehovah’s Witnesses Stand Firm Against Nazi Assault o Faithful Under Trials—Jehovah’s Witnesses in the Soviet Union. Sabihon na maandam kamo nin listahan nin mga hapot, na ibinabagay para sa pag-orolay kan klase an mga hapot sa An Satong Ministeryo sa Kahadean na Hunyo 2001 o Pebrero 2003.
5. Ano an magagamit nin mga magurang sa pampamilyang mga pag-adal?
5 Kaiba an Pamilya Asin mga Katood: Mga magurang, kasuarin huring nadalan kan mga aki nindo an video na Young People Ask—How Can I Make Real Friends? Taano ta dai iyan dalanon giraray sa saindong masunod na pampamilyang pag-adal? Itinatao kan An Satong Ministeryo sa Kahadean na Abril 2002 an mga hapot para sa maogma asin sinserong pag-orolay.
6. Paano nindo ikakaareglo an nakakaparigon na asosasyon kaiba an mga katood?
6 Igwa daw nin mga katood sa kongregasyon na gusto nindong imbitaran sa harong nindo? An iribang pagdalan kan video na Respect Jehovah’s Authority magigin nakakaparigon na asosasyon, nangorogna kun pagkatapos rerepasohon nindo an mga leksion na nanodan, na ginagamit an mga hapot na nakalista sa An Satong Ministeryo sa Kahadean na Setyembre 2004.
7. Anong posibleng mga oportunidad an maiisip nindo na magagamit an satong mga video?
7 Iba Pang mga Oportunidad: Paano pa nindo magagamit an 20 laen-laen na video? An pagpadalan daw nin saro o duwa kaiyan sa saro na regular nindong sinosongko makakatabang sa saiya na umoswag sa espirituwal? Puede daw nindong ipadalan an mga video sa sarong lokal na klinika sa pag-ataman sa mga gurang asin may helang o sa sarong pasilidad para sa mga aktibidad nin mga gurang na? Makakatabang daw an mga video na makua an paggalang kan saindong bakong Saksing mga paryente, kataraed, asin katrabaho? An satong mga video kaomaw-omaw, nakakapagtokdo, asin epektibong bisual na mga pantabang. Gamiton iyan sa pagtokdo.