Mga Kasangkapan na Nag-eedukar, Nagmomotibar, Asin Nagpapakosog
1 An mga iyan epektibong marhay sa pag-edukar sa mga tawo manongod sa Biblia asin sa Mga Saksi ni Jehova. Dakol an minotibar kaiyan na manindogan nin marigon para sa katotoohan. Pinakosog kaiyan an pagtubod asin pag-apresyar kan nagdusay na banwaan nin Dios. Ano daw iyan? An mga video na prinodusir kan organisasyon ni Jehova. Nadalan na daw nindo gabos an sampulo kaiyan? Kasuarin pa sana? Ginagamit daw nindo iyan sa saindong ministeryo? Paano kamo orog pang makikinabang sa marahayon na mga kasangkapan na ini?
2 An artikulo sa An Torrengbantayan na Hulyo 1, 1999 na “Regular na Adalan an Tataramon nin Dios Bilang Pamilya” nagrekomendar na ‘magtagama nin sarong kabtang kan oras nindo sa pag-adal sa pagdalan nin sarong kabtang kan saro sa nakapagtotokdong mga video kan Sosyedad . . . dangan pag-olayan iyan.’ Kaoyon kan marahay na sadol na iyan, iba-ibang video an itatampok sa Pagtiripon sa Paglilingkod kada duwang bulan. Ineenkaminar mi an gabos na makahihimo na dalanon an video sa harong bago iyan pag-olayan sa Pagtiripon sa Paglilingkod.
3 Ngonyan na bulan poponan niato an enot na video na prinodusir niato, an Jehovah’s Witnesses—The Organization Behind the Name. Bantayan asin hinanyogon an simbag sa mga hapot na ini:
◼ Sa ano midbid na marhay an Mga Saksi ni Jehova?
◼ An gabos na ginigibo sa Bethel konektado sa anong teksto?
◼ Anong eksena sa Biblia an naheling nindo na iinaakto, rineretrato, asin idinodrowing tangani na gamiton sa mga publikasyon?
◼ Ano an nakapukaw sa boot nindo dapit sa paagi nin pagpreparar kan satong mga babasahon?
◼ Poon kan 1920 sagkod 1990, pirang babasahon an inimprenta kan Sosyedad?
◼ Siisay nangorogna sa tahaw kan banwaan nin Dios an maninigong maghingoa na makualipikar para sa paglilingkod sa Bethel?—Tal. 20:29.
◼ Sa anong mga paagi na an pamilyang Bethel nagtatao nin ekselenteng halimbawa para sa gabos na Saksi ni Jehova?
◼ Ano an nakapukaw sa boot nindo dapit sa trabahong ginigibo sa Bethel tanganing mapaabotan kan maogmang bareta an pinakadakol na tawong mapupuede?
◼ Paano ginagastosan an gibohon sa bilog na kinaban?
◼ Anong aktibidad an puede niatong suportaran nin maigot, asin na may anong aktitud?—Juan 4:35; Gibo 1:8.
◼ Ano an saboot nindo dapit sa organisasyon na nasa likod kan satong ngaran?
◼ Paano nindo magagamit an video na ini sa ministeryo?
Sa Disyembre rerepasohon niato an video na The Bible—Accurate History, Reliable Prophecy.