An Pinakadakulang Kampanya nin Paghuhulit na Naaraman Kasuarin Man kan Kinaban!
Sa laog nin labi nang 100 na taon, inorganisar an Mga Saksi ni Jehova tangani na ipalakop an maogmang bareta. (1 Cor. 9:23) Sa pinakadakulang kampanyang ini nin paghuhulit na naaraman kasuarin man kan kinaban, ipinepresentar niato an mensaheng ini sa ginatos na lenguahe. Ipinapaabot niato iyan sa labing 230 kadagaan. (Mat. 24:14) Alagad taano ta kaipuhan an gibohon na ini? Asin paano iyan ginigibo sa bilog na kinaban?
Sinisimbag an mga hapot na iyan kan video na Jehovah’s Witnesses—Organized to Share the Good News paagi sa pagtao nin detalyadong pagmansay dapit sa dakol na aspekto kan satong internasyonal na mga gibohon. Mientras na dinadalan nindo iyan, isip-isipon an mga hapot na ini: (1) Paano inoorganisar asin ginigiyahan an satong aktibidad? (2) Ano an papel kan Writing Department, Translation Services, Art Department, asin Audio/Video Services sa pagpaabot kan maogmang bareta? (3) Ano an katuyohan kan satong mahiwas na mga gibohon na pag-imprenta asin pagpaktora? (Juan 17:3) (4) Pirang kopya nin literatura an iniimprenta sa sarong taon? (5) Ano na an nagibo kan satong mga publikasyon na basado sa Biblia? (Heb. 4:12) (6) Ano an ginigibo tanganing magtao nin espirituwal na tabang sa mga buta o bungog? (7) Paano sinusuportaran sa pinansial an satong gibohon? (8) Paano kita nakikinabang sa gibohon kan Hospital Information Services, Service Department, asin kan Convention Department? (9) Bilang saro sa Mga Saksi ni Jehova, paano pinararom kan video na ini an saindong pag-apresyar sa (a) paghihingoa kan organisasyon ni Jehova na ihulit an maogmang bareta? (b) labing 100 na pamilyang Bethel sa bilog na kinaban? (c) pagsasanay na itinatao para sa mga paraataman asin misyonero? (d) kahalagahan nin pagpopoon kan kada aldaw paagi sa pagtokar sa sarong teksto sa Biblia asin pag-andam kada semana para sa mga pagtiripon kan kongregasyon? (e) mga pakinabang nin pag-atender sa satong Kristianong mga pagtiripon? (f) magigin kahulogan kan Paraiso sa daga? (Isa. 11:9) (g) personal na pakikikabtang sa nagpapadagos na pag-ani?—Juan 4:35.
Anong positibong reaksion an naheling nindo kan ipinapadalan nindo an video na ini sa saindong mga paryente, kamidbid, dinadalaw liwat, asin inaadalan sa Biblia? Taano ta dai iyan tolos-tolos na ipadalan sa iba asin ihiras sa sainda an maogmang bareta?—Mat. 28:19, 20.