An NU—Pananaw nin Saro Katawo
AN Albertina, sarong apat-na-makinang DC-6B na eroplano, hababa an paglayog sa ibabaw kan tumpong nin Aprika. Uminagi pa sana iyan sa eropuwerto nin Ndola sa Northern Rhodesia (ngonyan Zambia). Sa 16 na mga lunad kaiyan kaiba an saro sa pinakaimportanteng tawo sa kinaban sa panahon na idto.
Sa kadikloman nin banggi, nagbuweltada an piloto tanganing lumanding. “Taod-taod natakras kan mga labad-labad an mga saporo kan kahoy . . . Naputol an poro kan pakpak, asin, sa suminunod na pirang segundo, padakol nang padakol an natangkas sa pakpak. . . . Haros otso sientos piye poon sa pagkasakyod sa mga kahoy, an natatadang kapidaso kan sa walang pakpak kan Albertina tuminama sa pungo nin sarong buklod. Buminirik an eroplano, tuminaririk pawala sagkod na iyan uminontok na naglalaad na nakaatubang sa pinaghalean kaiyan.”
Kan dumatong sa eroplano an mga parasalbar, nanompongan ninda duman an 14 bangkay nin mga tawo na natotong sagkod sa kagadanan. An iyo-iyo sanang naligtas nabuhay sa laog nin limang aldaw. Pirang yarda sana an distansia hale sa nabagsak an barari na hawak kan sekretaryo-heneral kan Naciones Unidas—si Dag Hammarskjöld. An pangenot sa kinaban na lingkod kan banwaan, si Mr. NU siring sa apod nin nagkapira saiya, gadan na.—The Mysterious Death of Dag Hammarskjold, ni Arthur L. Gavshon.
An NU Asin an mga Iglesya
Nabigla an kinaban sa kagadanan ni Dag Hammarskjöld. An nagkapira nag-isip-isip kun paano an NU magpupunsionar na mayo an liderato kaining daing girong, intelihenteng lalaki na nagtatak kan saiyang sadiring estilo sa pagigin sekretaryo-heneral.
Ilinadawan si Hammarskjöld bilang sarong Kristianong mistiko. An saiyang mga surat garo baga nagpapaheling na sia nagtutubod na sia inapod nin Dios sa saiyang destino sa Naciones Unidas. Kun nagtataram sa mga grupo nin iglesya, sia nagsabi na an pagtubod sa Dios asin sa NU kaipuhan pantay. Sa sarong okasyon sia nagpahayag: “An Organisasyon [nin NU] asin an mga iglesya nag-iiba-iba bilang partisipantes sa mga paghihingoa kan gabos na tawo na igwa nin marahay na boot, ano man an saindang kredo o porma nin pagsamba, na mag-establisar nin katoninongan sa daga.” Sia man naghingako: “Sa ibong kan gabos na mga pagkakalaen sa karakter asin responsibilidad, an mga iglesya asin an Naciones Unidas igwa nin parehong katuyohan asin sarong langtad nin trabaho na duman sinda iba-ibang nagtatrabaho.”
Si Hammarskjöld man iyo an kagdisenyo sa Kuwarto nin Paghorophorop na yaon sa panpublikong sala kan edipisyo nin NU. Iyan ipinatindog sa kuwarta na kinolekta kan saralak na grupo nin mga Muhammadan, Judio, Katoliko, asin Protestante. Sa tahaw kan simpleng kuwarto may pinakintab na bloke nin batbat na naiilawan nin sarong sadit na sirang nin liwanag.
Ano an pagheling ni Hammarskjöld sa blokeng batbat na idto? Sia nagsurat: “Puwede niatong ibilang iyan na sarong altar, daing laog bakong huli ta dai nin Dios, bakong huli ta iyan sarong altar para sa sarong dai namimidbid na dios, kundi huli ta iyan idinidekar sa Dios na sinasamba nin tawo sa irarom nin kadakol na ngaran asin dakol na mga porma.”
Binilyon na tawo an nagtutubod sa Dios. Kadakol sainda an nakaheling ki Papa Juan XXIII, Paulo VI, asin Juan Paulo II asin siring man sa Protestanteng mga klero na nagsuportar asin nagbendisyon sa organisasyon para sa katoninongan. An Batikano igwa ngani nin permanenteng paraobserbar sa NU. Huli kan relihiyosong pagsuportar na ini, an nagkapira nagtubod na an NU tibaad iyo na an paagi nin Dios sa pagdara nin katoninongan asin katiwasayan sa daga. Maski ngonyan sinda naghahalat sa 1986 bilang an “Internasyonal na Taon nin Katoninongan” kan NU.
Nagtutubod daw kamo na an NU iyo an tunay na paagi nin Dios na magkaigwa nin katoninongan sa daga? Naghohona daw kamo na an 40 taon nin kasaysayan kan organisasyon na ini nagtatao nin ebidensia nin bendisyon nin Dios dian? Tunay daw na napagsararo kan NU an mga nasyon sa katoninongan?
[Ritrato sa pahina 12]
Si Dag Hammarskjöld naghagad kan pagsuportar kan mga iglesya para sa NU
[Credit Line]
Retrato kan NU