An NU—Iyo daw an Paagi nin Dios Pasiring sa Katoninongan?

“Kombensido ako na an Naciones Unidas nagtatao kan pinakamarahay na dalan pasiring sa ngapit para duman sa mga may kompiansa sa satong kakayahan na determinaran an sadiri niatong kaaabtan sa planetang ini.”

AN PAGTUBOD na iyan ipinahayag kan dating Sekretaryo-Heneral Kurt Waldheim sa saiyang libro na The Challenge of Peace. Mantang inaako an mga pagkukulang kan NU, sia nagpaliwanag man: “Dapat marealisar nin saro na an Naciones Unidas daing iba kundi an kinaban sa sadit na paagi. Kaipuhan pangenot na ipamugtak an mga kaluyahan kaiyan sa mga kontradiksion na nangyayari sa kinaban mismo.” Sia nagdagdag: “Kaipuhan kong sabihon na iyan [an NU] saro sanang salming kan kinaban na pinaglilingkodan kaiyan. An kinaban na iyan sarong komplikadong pagkasaralak nin manlaenlaen, parateng dai magobyernohan, maringis, asin antagonistikong mga nasyon.” Alagad bakong gabos na mga komentarista hiniheling an NU sa siring kapaborableng pagmansay.

Sa saindang librong A Dangerous Place—The United Nations as a Weapon in World Politics, si Propesor Yeselson asin Gaglione nagsabi na poon sa pinakaamay na mga aldaw an NU nagin sarong pagtiripon para sa pagpahayag nin iriwal, asin na iyan sarong lalagan nin mga antagonismo asin politikal na mga pagmaniobra na magpapaorog sana sa laad nin internasyonal na iriwal. Asin kumusta naman an kinaban na hinihiroan kaiyan? “An sarong biko alagad simpleng katotoohan iyo na an politika kan kinaban parehong gayo sa sarong kadlagan. An gawe-gawe nin nasyon mayor na nakagamot sa paslong interes asin pagkaligtas. An pagmawot na gayo sa nahuri nagtatao sa sistema kan nasyon bako sanang kan ley kan kadlagan kundi man kan moralidad kaiyan.” Bilang resulta, “an guerra nagin nang permanenteng kabtang kan internasyonal na relasyon.”

Kanigoan kabaliktad sa halangkaw na mga paglaom ninda kan an Carta kan Naciones Unidas pirmahan kan 1945! An introduksion kaiyan nagpahayag: “KAMI NA MGA BANWAAN KAN NACIONES UNIDAS DETERMINADO na ilibre an minasunod na mga henerasyon sa kasakitan nin guerra, na makaduwa sa kasaysayan niato nagdara nin dai masabing kamondoan sa katawohan . . . NAG-OROYON NA PAGSARALAKON AN SAMONG MGA PAGHIHINGOA NA HAMANON AN MGA PLANONG INI.”

Pakalihis nin kuwarentang taon iyan garo daing kamugtakan. Imbes na magsararo, an mga nasyon nagsurosiriblag. Maski ngonyan an guerra iyo an inaabot sa aroaldaw nin minilyon sa sarong kabtang kan daga o sa iba! Aroaldaw an mga tawo nagsasakit asin nagagadan bilang mga biktima nin guerra—sa ibong kan pag-eksister kan NU.

Siisay Man Nanggad an Nasa Likod kan NU?

Maski ngani igwa nin magkalaen na mga punto-de-vista, an duwang librong kinotar pa sana nagkanagbo sa sarong pambihirang detalye. Si Waldheim nagsasabi na an NU ‘sarong salming kan kinaban na pinaglilingkodan kaiyan,’ asin si Yeselson saka Gaglione ikinokomparar an politikal na kinaban sa sarong kadlagan. Kaya an NU talaga nanggad na magpapaheling kan kaparehong ley nin politikal na kadlagan na ineerokan kan mga miembro kaiyan.

Mantang hinohorophorop ini, tunay na nakadadagka na risahon an mga simbolo na ginamit sa Biblia. An Biblia nagtataram manongod sa sarong “mabangis na hayop” asin sa “ladawan” kaiyan, na sinabi bilang “sarong mapulang mabangis na hayop.” (Kapahayagan 13:1, 2, 14; 17:3, 8, 11) An enot na mabangis na hayop nagrerepresentar sa bilog na pangkinaban na politikal na organisasyon na naglataw sa nakaaging 4,000 taon asin natapos sa politikal na pagkaralaenlaen na naheheling sa kinaban ngonyan.a Kaya ano man nanggad an irenerepresentar kan “ladawan” kan hayop na iyan?

Oyon sa mga kinotar sa itaas, arin na organisasyon an salming kan presenteng politikal na sistema? Siyempre, an NU kaiba an 159 miembrong nasyon kaiyan, na nagrerepresentar sa haros bilog na kinaban. (Helingon an pahina 20.) Asin an mga simbolong mabangis na hayop sa Biblia minaoyon nanggad sa ladawan kan ‘politikal na kadlagan.’ Makamomondo alagad totoo na an kadakol na politiko nag-implementar asin nag-iimplementar pa kan saindang politikal na mga pilosopiya siring sa mabangis na mga hayop—na maringis na ginagadan an minilyon na tawo, mga soldados asin sibilyan, sa saindang mga guerra asin politikal na mga panlaglag. An mga iskuwad na parapasakit asin paragadan ginamit asin danay pang ginagamit sa politikal na pandominar. Asin kadaklan kaining mga gobyernong ini asin pilosopiya igwa nin kagalang-galang na mga representasyon sa NU.

Huli kaini, rasonable daw na magtubod na an NU puwedeng magin paagi nin Dios pasiring sa katoninongan, lalo na kun, sa pinakasimpleng kahulogan, “an Dios pagkamoot”? (1 Juan 4:8) Alagad kun an NU bakong iyo an simbag nin Dios sa mga problema, siisay an yaon sa likod kan NU?

Sinisegurado kan Biblia an ginikanan kan “mabangis na hayop” na sistema politikal asin kan “ladawan” na NU kaiyan. Sa Kapahayagan 13:2 mababasa niato: “Asin an dragon nagtao sa hayop kan kapangyarihan kaiyan asin kan trono kaiyan patin dakulang autoridad.” Siisay an irenerepresentar kan “dragon”? An parehong parasurat kan Biblia liniwanag na “an dragon” iyo “an inaapod Diablo asin Satanas, na nagdadaya sa bilog na ineerokan na daga.” Alagad sa anong paagi na nandadaya si Satanas sa kinaban?—Kapahayagan 12:9.

Paagi sa gabos na posibleng politikal na pakana asin pilosopiya, kaiba an NU, si Satanas, an orihinal na putikon, pinapasalangi an atension kan tawo hale sa iyo sanang tunay na dalan pasiring sa katoninongan asin katiwasayan—an pagsakop kan Kahadean nin Dios sa dagang ini. (Juan 8:44) Haros duwang ribong taon na, an naghihingakong mga Kristiano namibi, “Dumatong logod an kahadean mo.” Alagad an kadaklan mayo nin malinaw na pakasabot kun ano an kahulogan kan Kahadean nin Dios. Ano daw an kahulogan kaiyan sa saindo? Ngonyan mantang an Kahadean na iyan harani nang marhay kaipuhan na magkaigwa nin tamang pakasabot dapit kaiyan.—Mateo 6:9, 10.

An mga kabareta kan Magmata! nakakaisi huli sa personal na pakipagtupar na an dakol na sinsero asin dedikadong mga tawo naghihingoa na mapaoswag an mga plano kan NU. An sinserong mga tawong ini naheheling man an mga kaluyahan kan organisasyon, alagad ta arog ki Kurt Waldheim asin iba pa, nagtutubod sinda na iyo sana iyan an paglaom nin tawo para sa nagdadanay na katoninongan asin katiwasayan. Dai sinda nin aram na ano man na mas marahay pang solusyon. Alagad igwa nin pansalida na tibaad dai ninda naheheling—an pagsakop kan Kahadean nin Dios.—Kapahayagan 11:15.

An Iyo Sanang Tunay na Dalan Pasiring sa Katoninongan

Ipinaheheling kan Biblia na an Kahadean nin Dios nagpapanongod sa langitnon na pagsakop, o paggobyerno sa daga hale sa lugar nin mga espiritu. (Daniel 2:44; Kapahayagan 21:1-4) An paggobyerno kan Kahadean na ini ni Cristo nagpupunsionar na sa bilog na kinaban asin nag-aandam nin sarong saralak an rasang katawohan para sa buhay na daing sagkod sa irarom kan pagsakop kaiyan. An biyong sararong grupong ini nin mga tawo hale sa gabos na nasyon asin gabos na tataramon midbid bilang mga Saksi ni Jehova. Sinda an tunay na “sararong nasyon” na ‘dinaragopdop na an saindang mga minasbad na magin tarom nin arado.’ Pinatod na ninda an mga gapos nin rasismo asin nin hayakpit na nasyonalismo, na inapod na “an pinakamakosog asin pinakamapanlaglag na puwersa sa internasyonal na politika.” An mga gapos na iyan nakagakod pa asin nagpapabuntol sa NU.—Isaias 2:2-4.

Paagi sa personal na pag-adal kan Biblia, an mga Saksi ni Jehova nakakaisi na solamente an Kahadean nin Dios an makapagtatao nin tunay asin nagdadanay na katoninongan sa dagang ini asin na an panahon haranihon na para sa Kahadean nin Dios na humiro. (Lucas 21:31-33; Kapahayagan 16:14, 16) ‘Anong paghiro?’ mahapot gayod kamo. An paglaglag sa mga tuyong naglalaglag kan daga. (Kapahayagan 11:18) Kaiba digdi an pagronot sa gabos na nakababangang politikal na mga elemento. (Daniel 2:44) Kaya sinasayumahan kan mga Saksi ni Jehova bilang daing maginibo an palsipikadong solusyon ni Satanas—an NU. Alagad taano iyan ta dai nin maginibo?

An pilosopong Danes na si Spinoza kan ika-17 siglo tinawan nin kahulogan an katoninongan bilang “bakong an pagkadai nin guerra” kundi sarong bagay na orog kahiwas. Sia nagsabi: “Iyan sarong birtud, sarong kamugtakan nin isip, sarong disposisyon para sa karahayan nin boot, kompiansa, hustisya.” Maootob iyan solamente paagi sa pagtokdo sa mga tawo sa pagkamoot asin pagkaoroyon imbes na sa pagkaongis asin pagkabaranga. Siring sa isinurat kan parasurat sa Biblia na si Santiago: “An bunga nin katanosan isinasabwag an banhi kaiyan sa irarom nin matoninong na kamugtakan para sa mga nakikipagkatoninongan.” (Santiago 3:18) Paagi sa saindang pankinaban na trabahong pagtotokdo an mga Saksi ni Jehova nagtotokdo kan mga dalan nin Dios nin katoninongan, huli ta an saiyang Tataramon nagsasabi: “An saimo gabos na aki magigin mga tawo na tinokdoan ni Jehova, asin magsosopay an katoninongan kan saimong mga aki.”—Isaias 54:13.

Kun boot nindong orog na makaaram dapit sa gobyerno kan Kahadean nin Dios, dai mag-alangan na hanapon an mga Saksi ni Jehova sa saindong lugar. Maoogma sindang tumabang saindo na masabotan an dalan nin Dios pasiring sa katoninongan.

[Nota sa Ibaba]

[Kahon sa pahina 20]

Darakulang Problema na Nakakaapektar sa NU

Parsial na listahan nin presenteng darakulang problema sa kinaban na may labot sa dakol na miembrong nasyon kan NU.

1. Paorumbasan sa armas nuklear asin an paghampangan kan E.⁠U.⁠A.-U.⁠S.S.R.

2. An pagigin bakong balanse sa ekonomiya kan Amihanan asin Timog; krisis sa nagpoprogresong mga nasyon sa pagkautang sa ibang nasyon

3. Gutom asin pagtios sa Aprika, luway-luway na pagigin disyerto kan kontinente

4. Droga, internasyonal na pagnegosyo kaiyan

5. Internasyonal na terorismo

6. An palakaw sa Aprika na pagpalaenlaen sa rasa asin relasyon kaiyan sa pagtaraed na estado

7. An independensia kan Namibia sa South Africa

8. An isyu sa Israel asin Palestina

9. Kariribokan sa Lebanon

10. Pag-iiwal kan Iran asin Iraq

11. Southeast Asia, pagsakop kan Vietnam sa Kampuchea

12. Central America, ralaban nin gerilya sa El Salvador asin Nicaragua

13. Afghanistan, panggugunlabot kan Unyon Sobyet

14. Pankinaban na problema sa mga dulag, na labing sampulong milyon an apektado

15. Mga pag-abuso sa mga diretso nin tawo

An listang ini basado sa mga diskurso na iinatubang sa ika-39 sesyon kan Asamblea Heneral kan NU kan 1984 nin 150 representante, kaiba an 16 na pamayo nin estado o gobyerno. (Helingon an UN Chronicle, Tomo XXI, Numero 8/1984.)

[Kahon sa pahina 20]

Kun Paano Nagdakol an Miembro kan NU

1945 51 nasyon: Central asin South America 19; Europa 14; Asia 2; Tahaw na Sirangan 7; Aprika 3; Pasipiko 3; North America 3

1950 60 nasyon: Central asin South America 19; Europa 16; Asia 7; Tahaw na Sirangan 9; Aprika 3; Pasipiko 3; North America 3

1960 100 nasyon: Central asin South America 19; Europa 27; Asia 13; Tahaw na Sirangan 10; Aprika 25; Pasipiko 3; North America 3

1970 127 nasyon: Central asin South America 23; Europa 28; Asia 16; Tahaw na Sirangan 12; Aprika 41; Pasipiko 4; North America 3

1980 154 nasyon: Central asin South America 29; Europa 30; Asia 19; Tahaw na Sirangan 16; Aprika 50; Pasipiko 7; North America 3

1985 159 nasyon: Central asin South America 32; Europa 30; Asia 20; Tahaw na Sirangan 16; Aprika 50; Pasipiko 8; North America 3

[Ritrato sa pahina 18]

An mga bandera kan 159 nasyon na miembro nalaladlad sa atubangan kan NU

[Ritrato sa pahina 19]

Siisay an ‘dinaragopdop na an saindang mga minasbad na magin mga tarom nin arado’?