Paano an Katoninongan Magigin Katunayan?
Ano an nagkapira sa mayor na mga kaolangan na minaolang sa permanenteng katoninongan na magin sarong katunayan? Sa naenot na artikulo, masasabi niato an minasunod:
(1) An paslong piling grupo nin mga namamahala (politikal, militar, komersial, asin relihiyoso) na nan-impluwensia sa mga tawo.
(2) Sarong sistema nin edukasyonal na pagmolde basado sa sobrang nasyonalismo na nagtotokdo nin “sagradong pagkamoot sa sadiri,” pagigin superyor kan nasyon, pagdiskompiar, asin pagkaongis.
(3) An pankagabsan na pamomogol asin paggiya kan ‘dios kan palakaw na ini nin mga bagay, na nanbubuta sa isip kan mga dai nagtutubod,’ si Satanas na Diablo.—2 Corinto 4:4.
SA BILOG na kinaban, kaipuhan na magkaigwa nin pagkaliwat sa isip, pagkaliwat sa puso. Asin iyan nangangahulogan nin pagliliwat sa edukasyon—na tokdoan an gabos na tawo nin katoninongan, pagkamoot, asin paggalang sa lambang saro. Asin iyan nangangahulogan man nin lakop sa kinaban na pagkaliwat nin pamomoon na magin saro sanang pamomoon na igagalang kan gabos na nasyon—sarong dai nalalapang pankinaban na gobyerno. Iyan man nangangahulogan nin pagkaliwat nin namomogol sa kinaban—hale sa paghade ni Satanas pasiring sa paghade nin Dios! Alagad paano gigibohon an mga pagkaliwat na ini?
Ihinula kan Biblia kaidtong labi nang 2,500 na taon an nakaagi na sa panahon kan katapusan kan palakaw na ini nin mga bagay “an Dios kan kalangitan mapatindog nin sarong kahadean na dai noarin man malalaglag.” (Daniel 2:44) Ini an daing katapusan na Kahadean na itinokdo ni Jesus sa saiyang mga parasunod na ipamibi: “Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:9, 10) An kahadean na iyan nangangahulogan nin bagong paghade ni Cristo Jesus, hale sa kalangitan, para sa bilog na daga, arog kan isinurat ni propeta Daniel: “An saiyang paghade [o, soberaniya] sarong paghade na daing katapusan na dai mapapara, asin an saiyang kahadean saro na dai malalaglag.”—Daniel 7:13, 14.
An langitnon na gobyernong ini sa kamot ni Cristo iyo an bagong areglo na masalida sa nakakabanga, paslong mga grupong namamahala na namahala sa katawohan sa salang paagi sa laog nin mga milenyo. Iyan an parteng naggogobyerno kan “bagong kalangitan asin sarong bagong daga” na “satong hinahalat oyon sa panuga [nin Dios], asin dian an katanosan an magdadanay.” (2 Pedro 3:13) An gobyernong ini iyo an tunay na “paggigikanan kan kaaabtan kan kinaban sa ngapit,” bakong an Naciones Unidas sa Nueva York na sinasabi ni Robert Muller, sarong katabang na sekretaryo-heneral kan NU. Sa ibong kan pagdeklarar kan NU sa 1986 bilang an Internasyonal na Taon nin Katoninongan, an tunay na katoninongan maabot sana paagi sa inooyonan nin Dios na ahensia na iyo an Kahadean nin Dios.
An Kabtang nin Edukasyon
Minilyon an nag-aandam nang mabuhay sa katoninongan sakop kan gobyerno kan Kahadean na iyan. Sa laog nin labi nang sanggatos na taon an mahiwas na edukasyonal na kampanya ipinaabot sa gabos na nasyon tanganing darahon an mensahe kan Kahadean na iyan sa gabos na tawo. Seguro may nagsongko na sa saindo na sarong matoninong na representante kan gobyernong iyan, minsan ngani kaidto seguro dai nindo narealisar an halaga kan pagsongkong iyan. Sia nakikikabtang sa pinakamahiwas na gibong pagtotokdo na ginibo sa kasaysayan nin tawo. Siisay an nagsongko? An saro sa mga Saksi ni Jehova. Asin taano ta nagsosongko sa saindo an mga Saksi?
An mga Saksi nag-oopresir na makipag-adal sa Biblia sa siisay man na odok na tawo na nagmamawot na makanood manongod sa dalan ni Jehova pasiring sa katoninongan. An daing bayad na edukasyon na ini nakatatabang na sa minilyon na ‘daragopdopon an saindang mga minasbad na magin tarom nin arado asin an saindang mga budyak na magin mga sanggot.’ Si propeta Isaias nagsasabi: “An nasyon dai mabingat nin minasbad tumang sa nasyon, asin dai na sinda mag-aadal sa pakilaban.”—Isaias 2:4.
Inootob na kan mga Saksi ni Jehova an hulang ini bakong arog kan mga miembro kan Naciones Unidas, na sagkod ngonyan nagraralaban sa berbal o pisikal. Asin paano ini nagibo kan mga Saksi? Paagi sa pag-adal sa Biblia tanganing makua an kaisipan ni Cristo manongod sa mga bagay; paagi sa pakanood na an Dios talagang pagkamoot asin na kaipuhan na ipaheling ninda an saiyang pagkamoot sa saindang kapwa hale sa gabos na nasyon asin rasa. Sa dahelan na iyan sinda nagpapadanay nin estriktong paninindogan na pagkaneutral sa politikal na mga isyu asin nagsasayuma na makikabtang sa ano man na guerra o ralaban, ano man an mangyari.—1 Juan 4:8; Juan 13:34, 35.
Sono sa naotob na hula sa Biblia, harani na an panahon na an Kahadean nin Dios humiro. (Mateo 24:3-35) Dai na mahahaloy an ralaban nin Dios na Armagedon tatapuson an paghade ni Satanas kaiba an gabos na nakakabanga asin mapanlaglag na politika kaiyan. (Kapahayagan 16:14-16; 19:17-21) Ngonyan na an panahon na dumolok sa Dios asin sa saiyang Tataramon. An mga Saksi ni Jehova sa saindong lugar maoogmang tumabang sa saindo na patunayan sa saindong sadiri na an daing katapusan na katoninongan bakong masakit aboton na pangatorogan kundi sarong katunayan na sa dai na mahahaloy magigin lakop sa kinaban. O sumurat sa mga kagpublikar sa magasin na ini para sa dugang pang impormasyon asin tabang.
[Blurb sa pahina 18]
“Igwa nin bagong kalangitan asin sarong bagong daga na satong hinahalat oyon sa saiyang panuga, asin dian an katanosan an magdadanay.”—Si Pedro na apostol
[Blurb sa pahina 19]
“Asin dadaragopdopon ninda an saindang mga minasbad na magin tarom nin arado . . . An nasyon dai mabingat nin minasbad tumang sa nasyon, asin dai na sinda mag-aadal sa pakilaban.”—Si Isaias na propeta
[Ritrato sa pahina 19]
“Paagi kaini an gabos makakaaram na kamo an sakong mga disipulo, kun kamo nagkakaminorootmootan.”—Si Jesu-Cristo