Katoninongan sa Kinaban—Paano Asin Noarin?

AN PANKINABAN na katoninongan saro sa pinakamamawot nin katawohan. Alagad an ideya na kaya iyan na maabot nin mga gobyerno nin tawo sarong nakadadayang paghona. An mga leksion nin kasaysayan minaoyon sa realistikong sinasabi kan Biblia: “Mayo sa tawong naglalakaw an kakayahan na giyahan an saiyang lakad.”—Jeremias 10:23.

Solamente an makakamhan sa gabos na Kaglalang sa uniberso, si Jehova Dios, an makatatao nin nagdadanay na katoninongan. Asin itinao nia an saiyang panuga na iyan gigibohon nia. Paano? Bakong paagi sa mga paghihingoa nin tawo kundi paagi sa ginibo ni Jesu-Cristo na tema kan gabos niang pagtotokdo—an langitnon na Kahadean nin Dios. (Mateo 6:9, 10) An Hade sa Kahadean na iyan, si Cristo Jesus, inaapod sa hula na an tunay na “Prinsipe nin Katoninongan.” (Isaias 9:6) Asin an panuga nin Dios iyo na sa pagsakop kan Kahadean, magkakaigwa nin “kadakulan nin katoninongan” sa bilog na daga.—Salmo 72:7.

Minsan siring, malinaw na ipinaheheling kan Biblia na bago ini mangyari, an presenteng naggeguerrang palakaw nin mga bagay kaipuhan na haleon. (1 Juan 2:15-17) Asin ipinaririsa kan hula sa Biblia na harani na an kalaglagan kaiyan.—Mateo 24:3-14, 22, 34; Lucas 21:25-28; 1 Timoteo 3:1-5.

Kun siring, ini an dai maliliwat na katuyohan kan Dios “na dai makakapagputik.” (Tito 1:2) Kaya, bako daw na an mga namomoon sa relihiyon, nangorogna sa Kakristianohan, nagdolot kutana nin mga pamibi na kaoyon sa katuyohan na ini? Bako daw na maninigo man kutana sindang gumawe kaoyon sa katuyohan na iyan? Alagad ta, mayo ni saro sa mga relihiyosong representanteng idto sa Assisi an nakasambit manongod sa harani nang katapusan kan palakaw na ini asin sa nagdadangadang na pagsakop kan Kahadean nin Dios, an pundamental na mensahe ni Jesus asin kan Tataramon nin Dios.

Bako ining makangangalas ta an mga relihiyon na iyan dai nagtokdo sa saindang mga parasunod kan katotoohan manongod sa mga katuyohan nin Dios. Imbes, kabtang sinda kan kinaban na ini na sakop ni Satanas, asin ikinokonsentrar ninda an saindang mga paghihingoa sa pagpapadanay kaiyan. Bilang resulta, nagkabaranga an saindang mga miembro, na orog na nagtutubod sa nasyonalismo kisa Kahadean nin Dios. Ini nagbunga kan paggaradanan ninda sa mga guerra kan kinaban na ini. Kaya, an mga tataramon na ini minaaplikar sa mga relihiyon na iyan: “Mga parapakisambay, dai nindo naaaraman na an pakipagkatood sa kinaban pakipag-iwal sa Dios? An siisay man, kun siring, na boot na magin katood kan kinaban ginigibo an saiyang sadiri na kaiwal nin Dios.”—Santiago 4:4.

Kaya, an mga pakimaherak para sa katoninongan kan mga relihiyon na ini dai dinadangog. Ipinagigirumdom kaiyan an kamugtakan kan panahon ni propeta Jeremias. Kaidto an mga propeta nin falsong relihiyon nagsabi: “Igwa nin katoninongan! Igwa nin katoninongan!” Alagad, an totoo, ‘mayo nin katoninongan’ para sa sainda.—Jeremias 6:14.

Lakop sa Kinaban na Gibong Pagtotokdo

Alagad, an katuyohan nin Dios maootob. (Isaias 55:11) Kaya ngonyan ginigibo an lakop sa kinaban na pagtotokdo kan Biblia. Kaoyon ini kan hula sa Mateo 24:14, na nagsasabi: “Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”

Mantang an mga kabtang kan lakop sa dagang mobimientong ini nin tunay na pagsamba nagpapasakop sa mga kahagadan nin Dios, hinale na ninda an nakababangang impluwensia nin nasyonalismo sa tahaw ninda. Sinda nagin nang matoninong na sosyedad nin mga tawo na nagkakaminorootmootan asin nabubuhay para sa Kahadean nin Dios. Bilang resulta, inootob ninda an hula sa Miqueas 4, na nagsasabi:

“Asin mangyayari sa huring kabtang kan mga aldaw na an bukid kan harong ni Jehova [an tunay na pagsamba sa saiya] marigon na mapatitindog sa ibabaw kan alitoktok kan kabukidan [gabos na ibang klase nin pagsamba], . . . asin pasiring dian madaralagan an mga banwaan. Asin dakol na nasyon an maduruman asin masarabi: ‘Madia kamo, banwaan, asin magturukad kita sa bukid ni Jehova asin sa harong kan Dios ni Jacob; asin totokdoan nia kita mapadapit sa saiyang mga dalan, asin magraralakaw kita sa saiyang mga dana.’ . . . Asin dadaragopdopon ninda an saindang mga minasbad na magin mga tarom nin arado asin an saindang mga budyak na magin mga sanggot. Dai sinda mabingat nin minasbad, an nasyon tumang sa nasyon, ni mag-aadal pa man sinda sa pakilaban.”—Miqueas 4:1-3.

Malinaw nanggad na an hulang ini dai puwedeng naotob kan pagtiripon sa Assisi. An mga nagtuturukad sa simbolikong bukid nin malinig na pagsamba mga tawo na tinotokdoan sa mamomoton sa katoninongan na mga dalan ni Jehova asin naglalakaw sono sa saiyang katuyohan asin mga kahagadan. Bako sindang mga tawo na nagdadanay sa saindang dating mga relihiyon, na nababanga nin magkakatumang na mga doktrina asin gibo. Imbes, sinda tiripon arog kan ihinula sa Miqueas 2:12: “Sa pagkasararo ibubugtak ko sinda, siring sa aripompon sa toril.”

An bunga kan gibong pagtotokdong ini iyo na labing tolong milyon katawo sa bilog na daga an nagin mga parabalangibog kan “maogmang bareta kan kahadean.” Sinda nagin matoninong na mga tawo, asin dai sinda makua kan buhay kan saindang kapwa ano man an kamugtakan. Arog kan ihinula ni Miqueas, sainda nang ‘dinaragopdop an saindang mga minasbad na magin mga tarom nin arado . . . ; ni mag-aadal pa man sinda sa pakilaban.’ Asin an minilyon pang ibang interesado sa bilog na daga tinotokdoan ninda.

An mga Saksi ni Jehova naghahalat sa matoninong na bagong kinaban na dian an Miqueas 4:4 maootob sa gabos na tawo: “Sinda magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda; huli ta an mismong ngoso ni Jehova nin [langitnon na] mga hukbo iyo an nagtaram kaiyan.” Sumunod, sa bersikulo 5, ipinaheheling ni Miqueas an pagkakalaen kan mga nagsasamba sa dakol na falsong dios asin kan mga nagsasamba sa sarong tunay na Dios, na an sabi: “An gabos na banwaan, kun para sa sainda, maglalakaw an balang saro sa ngaran kan saiyang dios; alagad, kun para sa sato, kita maglalakaw sa ngaran ni Jehova na satong Dios sagkod sa panahon na daing katapusan, minsan sagkod lamang.” Malinaw na an ngaran nin Dios dai man lamang nasambitan sa Assisi. Minsan siring, bako daw na boot nindong makanood manongod sa Dios na ini kan Biblia? An mga Saksi ni Jehova maoogma na tabangan kamo digdi.

[Ritrato sa pahina 12]

Siisay an tunay na dinaragopdop an saindang minasbad na magin mga tarom nin arado?